Tin Ékôane Bengaa be Yéhôva é ne mone nsamba bitôtôlô Bekristen ba tebele ésaé Bengaa be Yéhôva ya si ése. Ésaé jap é bili mefase mebaé:

• Ba tebele nkômesane ya miñye’elane ya Kalate Zambe bia bi e bekalate, e bisulan, a besikôlô Bengaa be Yéhôva.​—Luc 12:42.

• Ba wulu ésaé nkañete Bengaa be Yéhôva ja bobane si ése, ba tebele fe avale ba yiane belane mimvean.

Tin Ékôane ja tôñ éve’ela “minlôman a bemvendé” ya Jérusalem mi nga li’i ntete mimbu ôsu. Be mbe be nyoñe’e mintyi’an asu akônda Bekristene bese ya éyoñe jap. (Mam minlôman 15:2) Aval ane Bekristene bete, bobejañe ya Tin Ékôane be nji nyoñe bebien ane bivete ya ékôane Bengaa be Yéhôva. Kalate Zambe nnye a liti be avale ba yiane tebele ésaé; ba yeme na, Yéhôva a nga telé Yésus ane nlô ya akônda.​—1 Becorinthien 11:3; Beéphésien 5:​23.

Ngon ôsu ya mbu 2018, bobejañ Kenneth Cook, Jr., Samuel Herd, Geoffrey Jackson, Stephen Lett, Gerrit Lösch, Anthony Morris III, Mark Sanderson, a David Splane, mbe be ne bibu’a ya Tin Ékôan. Ba saé e wofise Bengaa be Yéhôva ya si ése ô ne Warwick, e tisone ba loone na New York, e si ya Amelka.

Tin Ékôane Bengaa be Yéhôva é nga telé bimo’o bisaman bia tebele bisaé bise bia yiane boban ékôane jangan, a ébu’a ése ya Tin Ékôan ja tebele émo’o jia ya été, nge lôt.

• Émo’o bobejañ ba tebele bisaé: Ja tebele mame ma fombô metiñe ya mesi, ja nyoñe fe mintyi’an éyoñ ébubua éziñe ja kui, éyoñe Bengaa be Yéhôva ya vôm éziñe ba tôban étibela’a, nge ke mame mese ma nambe Bengaa be Yéhôva.

• Émo’o asu bôte ba saé Béthel: Ja tebele mame mese ma nambe bobejañ ba saé be Béthel.

• Émo’o asu nkulan bekalate: Ja tebele ésaé nkulane bekalate, ja bo fe na bekalate bete be ke kui mekônda; ja wulu fe ésaé nlôñane Meba m’Éjôé, nlôñane menda ba kôñelane bekalate, a nlôñane bewofise ya bebéthel.

• Émo’o asu ésaé nkañete: Ja tebele ésaé nkañetane “mbamba foé ya Éjôé.”​—Matthieu 24:14.

• Émo’o asu ñye’elan: Ja tebele mame mese ma fombô ñyamane bidi ya nsisime ba ve a zene ya bisulan, besikôlô, a bevidéo.

• Émo’o asu ntilane bekalate: Ja tebele mame mese ma fombô ñyamane bidi ya nsisime ba ve a zene ya bekalate, miñye’elane bia koene mie anjeñe mefoé dangan, ja wulu fe ésaé nkôñelane bekalate.

Tin Ékôane ja bo ékôane sondô ase asu na é fase miñyiane Bengaa be Yéhôva ya si se. Éyoñe ba bo ékôan éte, ba jeñe na be yeme jé Kalate Zambe a jô, ba jô’é fe na mbamba nsisim a liti be zen; ba ve ngule ya kui tyiñ ôsusua na ba nyoñe mintyi’an.​—Mam minlôman 15:25.

Bekristen be ne tabe be ndi ba su’u bobejañe ya Tin Ékôan ésaé jap. (1 Becorinthien 4:2) Be maneya yem ésaé ya tebele bisaé be nga ve be, ba tabe fe bikôane Tin Ékôan ja bo sondô ase. Akusa bo na be nji nyoñe mintyi’an a Tin Ékôan, ve asimesan bobejañ bete ba ve, da volô Tin Ékôane na, é bo ésaé jé mvo’é, nalé a bo na ésaé ékôane Yéhôva é ke ôsu. Tin Ékôan ja lôme fe be na be jome bobejañe ya meku’u mese ya si. Ja belane fe be na, be wulu beta bisulane biziñ, ane mimôse mia dibe sikôlô ya Galaad nge beta ésulane ba bo mbu ôse.