Nkùn mebwô mfà num mba benntùn tswe matmat num nsitshaʼ be ntùm Ñwaʼni Nsi là. (Yobkwi 37:29) Ñwaʼni Nsi ghù bon ntoʼ mbuʼ mi 66. Nsi naʼ loʼ benntùn bamntù ntu 40 num nekidʼé. A nguan nguʼ 3500 li mba Mosé kide mbwe mbuʼ mi tse 5 nà. A tôg nguʼ 1900 mba Yohané kide miagdʼé là. Tsit nkwade ghakide Ñwaʼni Nsi naʼ njab mbwe à? Yaweh Nsi naʼ tshobte boa ghakide Ntshob mi ntshùadʼà njam ywèt nelàne. (2 Samuél 23:2) Bo naʼ kidʼà nkwade Nsi ke bʼa mube. Ndùlala, Yaweh bèn be tu num Ñwaʼni Nsi.​—Siañ 2 Timôtio 3:16; 2 Pétro 1:20, 21.

Lôde la’de netshañ We zʼa be tu num Ñwaʼni Nsi à?

Be lèn mbe Ñwaʼni Nsi fe à Nsi nummbe a num ntshob ntshob ndamnjù a bumde. Sàm mènntùn keʼ kuʼni neghù lèn i. (Yoshua 23:14) Ndaʼ Nganeta ntshùade tùʼ i mbèn kuʼni nelèn ndùmànyam ju ke tsi bwe.​—Siañ Esaya 42:9; 46:10.

Bag bin ghù nebébte mbe kà Ñwaʼni zʼa fe Nsi là ghù nguanni; a keʼ ne ngù. Bo ghapte ntshuʼ ntshuʼ mbuʼ Ñwaʼni Nsi ntùm ntshob nzenze. Kà mba ndù a yà tswe neshu, Ñwaʼni Nsi num nzin nku ntshùʼ bo zenu njù. Mbèn be mbe ghakide 40 naʼ be ntshu ntshùʼ. * Mbe nèn mbwe, Ñwaʼni Nsi be ndaʼde nkôni Nsi zʼa làn miagde là; a bèn ngù mba neta nebade yôg benntùn a be mebwô. Tshen tshu li tshwèt ngù mbe bwoñ benntùn bam mbe Ñwaʼni Nsi bʼa kuaʼ Ntshob Nsi.​—Siañ 1 Tésalônikà 2:13.

Lôde la’de netshañ Be lèn à ndùke mbe Ñwaʼni Nsi bʼa nenùn à?

Ñwaʼni Nsi tshwèt nsañlañ num nkùn mebwô mfà num ju ze Nsi tshwèt nkwade neghù benntùn nyiañtu là. Ntshob Nsi tshwèt mbagde mba benntùn naʼ mbi paradis num nsitshaʼ fe mba tshô njù naʼ ntoʼde là, mbèn ntshob mba paradis nsi bèn be là.​—Siañ Apokalipse 21:4, 5.

Ñwaʼni Nsi mbèn ngù ba ntshùʼ, tun ntshùʼ, ngù ntage. Ñwaʼni Nsi tshwèt nsoñ tshô mfà num ngùninu Nsi bo benntùn​—yen tshô là tswide ben mèn a be yi là. Ndùlala, Ñwaʼni Nsi kuʼni neywimdʼo o lèn Nsi. A tshwèt mbagde mba o kuʼni nebe nshun i là.​—Siañ Yobkwi 19:7, 11; Yakobo 2:23; 4:8.

Ntshùade njam mat ze Yésu nke ntswide yi là, yen kam buʼ ñwaʼni li aʼ ywimdʼo nejuʼ Ñwaʼni Nsi. A lo nke ndoʼ nka Ñwaʼni Nsi ntshùʼ ntshùʼ, mbèn nke ngaʼ zenu benntùn bo juʼ mbagde mi.”​—Siañ Lukas 24:27, 45.

Tshu tsʼa bwô mba nkùn mebwô tsʼa fe Nsi là keʼ yàm. Là, a keʼ be kwag bwoñ benntùn, mbèn nke ngùtni tsemoʼ à neghùtni. Kà fañ mbu mu bole. Yu nywinde neghù yôg matmat yéʼdʼà num yu kagtùn nelèn Nsi.​—Siañ Yohané 17:3.