Yag ntseʼde keʼ ghù kum ghatshagde bo nke mbé là. Là, ndañndañ mba a naʼ mbe ngelañ ntseʼde Benkristô toʼde là, bo num ntshoʼ ghakwé mbwe tse bo ghù ywèt Nsi là num “neke mbéb” ntseʼde Nsi. (Mfaʼ Ghantum 20:28) Tshen ghakwé mbwe là bʼa ben bo kuʼ num bag ywèle, nke ntshagde ntseʼde mba ghabéb mbwe là, “ke bʼa mba bo netèn yub là, là ngù i à ntù ntshùʼ mbwe Nsi; ke bʼa num ntshoʼfaʼ tuswe, là bo nenànde.” (1 Pétro 5:1-3) Bo nke mfaʼ à ke num tu ben à?

Bo num ntomde mbèn ntshètte ben. Ghakwé mbwe num ntshagde, njwimde mbèn ntshètte ben num bag ywèle. Mba bo lèn mbe Nsi bèn mfà sen faʼ ndùb là bo là, bo keʼ be “diag à netô [zebe] bamntù, là [bo] ke neywimde [ben] num [zebe] tsiañde, nummbe [bag à bin] tsin tù ntshùadʼà njam [zebe] bamntù.” (2 Korintô 1:24) Ndañndañ mba taʼ ngabéb mbwe num ndôde njùmbwe tse ntshùʼ ntshùʼ là, ba ghakwé mbwe num nkagtùn nete lag mbèn ndèn mba zit mèn no ntùm ndà ntseʼde.​—Tànkùt 27:23.

Bo num ntswide ben neghù ze nekô Yaweh Nsi. Njoñ ngabnjù fa, ba ghakwé mbwe num ntshagde ntseʼde num neso kù num zeben bamntù. (Mfaʼ Ghantum 15:32) Tshen ba faʼ ntù ntshùʼ là num ndoʼ mbwe num faʼ nesoñ nkùn mebwô, nke soñde yag mbèn ntswide yag ntùm njoñ bag nàfaʼ fa.

Bo num nso kù mba num we lo. Nedù mbe bo lôde mba zit mèn no num bag ywèle, ghakwé mbwe kuʼni neseʼ yôg ben ndà ben, kà ndà ntseʼde lo, num neywimde mbèn fide ntù ben bo Ntshob Nsi.​—Yakobo 5:14, 15.

Nkwiʼde num faʼ ndà ntseʼde, bwoñ ghakwé mbwe ghù sub faʼ mbab wut, bo yub tunndà nelôde, yennà nke mbètte ngelañ bo. A tshwèt mbètte bag bin kuʼni tshen fètfèt là tse bo num mfaʼ yàm nà.​—1 Tésalônikà 5:12, 13.

• Faʼ ghakwé mbwe ntùm ndà ntseʼde bʼa ke?

• Ghakwé mbwe nke ndaʼde yub nzi neywimde ben à ndùke?