Kinsa ang mga Nepilim?
Tubag sa Bibliya
Ang mga Nepilim maoy bayolenteng mga higante nga mas kusgan kay sa ordinaryong tawo. a Sila mga anak sa daotang mga anghel ug sa mga babaye sa panahon ni Noe.
Ang Bibliya nag-ingon nga “nakita sa mga anak sa matuod nga Diyos nga guwapa ang mga anak sa mga tawo.” (Genesis 6:2) Ang maong ‘mga anak sa Diyos’ maoy espirituhanong mga linalang nga mirebelde sa Diyos dihang sila “mibiya sa ilang nahiangay nga puloy-anan” sa langit, nagpakatawo, ug ‘nangasawa sa tanan nilang nagustohan.’—Judas 6; Genesis 6:2.
Kining dili natural nga panag-ipon miresultag mga liwat nga dili ordinaryo. (Genesis 6:4) Ang mga Nepilim maoy madaogdaogong mga higante, nga nagpunog kapintasan sa kalibotan. (Genesis 6:13) Ang Bibliya nag-ingon nga sila “ang kusgan kaayo kaniadto, ang bantogang mga lalaki.” (Genesis 6:4) Sa ulahi, ang mga tawo nagsundog sa ilang kinaiya nga miresultag kapintasan ug kahadlok.—Genesis 6:5; Numeros 13:33. b
Sayop nga mga ideya bahin sa mga Nepilim
Sayop nga ideya: Ang mga Nepilim buhi pa hangtod karon.
Ang tinuod: Si Jehova nagpahinabog lunop sa tibuok kalibotan aron laglagon ang tanang daotan sa karaang panahon. Ug apil sa nalaglag ang mga Nepilim. Pero si Noe ug ang iyang pamilya nakabatog maayong relasyon kang Jehova ug mao ray naluwas niadtong panahona.—Genesis 6:9; 7:12, 13, 23; 2 Pedro 2:5.
Sayop nga ideya: Tawo ang mga amahan sa mga Nepilim.
Ang tinuod: Ang ilang mga amahan gitawag nga “mga anak sa matuod nga Diyos.” (Genesis 6:2) Mao pod nay gigamit nga ekspresyon sa Bibliya para sa mga anghel. (Job 1:6; 2:1; 38:7) Kaniadto ang mga anghel dunay gahom sa paghimo sa ilang kaugalingon nga tawo. (Genesis 19:1-5; Josue 5:13-15) Si apostol Pedro naghisgot bahin sa “mga espiritu nga gibilanggo, nga kaniadto wala magmasinugtanon dihang ang Diyos mapailobong nagpaabot sa panahon ni Noe.” (1 Pedro 3:19, 20) Bahin niana, ang magsusulat sa Bibliya nga si Judas nag-ingon nga ang ubang anghel “wala magpabilin sa ilang orihinal nga pagkabutang, hinuon mibiya sa ilang nahiangay nga puloy-anan.”—Judas 6.
Sayop nga ideya: Ang mga Nepilim maoy mga anghel nga nakasala ug gisalikway sa Diyos.
Ang tinuod: Gipakita sa Genesis 6:4 nga ang mga Nepilim dili mga anghel, kondili mga anak sa mga anghel nga nagpakatawo ug sa mga babaye. Human ‘pangasaw-a sa mga anghel ang tanan nilang nagustohan,’ si Jehova miingon nga paglabayg 120 ka tuig mohimo siyag aksiyon batok sa dili diyosnong kalibotan niadtong panahona. (Genesis 6:1-3) Ang rekord dugang miingon nga “niadtong panahona,” ang nagpakatawong mga anghel “nakigdulog sa mga anak nga babaye sa mga tawo” ug sila nanganak sa mga “kusgan kaayo kaniadto,” ang mga Nepilim.—Genesis 6:4.
a Ang Hebreohanong pulong nga gihubad ug “Nepilim” posibleng nagkahulogang “Mga Tigpukan.” Ang Wilson’s Old Testament Word Studies nag-ingon nga ang maong pulong nagtumong niadtong “nagdaogdaog sa mga tawo pinaagig kapintasan ug pagpangilog, ug nagpukan kanila.”
b Klaro nga ang Israelinhong mga espiya nga gikutlo sa Numeros 13:33 nakakitag mga tawo nga ang gidak-on nagpahinumdom nila sa estorya bahin sa mga Nepilim, nga niadtong panahona ginatos ka tuig nang nangamatay.—Genesis 7:21-23.
Basin Ganahan Pod Ka
TUBAG SA MGA PANGUTANA BAHIN SA BIBLIYA
Tinuod ba ang mga Demonyo?
Unsa ang mga demonyo? Diin sila gikan?
ANG BANTAYANANG TORRE
Si Noe “Naglakaw Uban sa Matuod nga Diyos”
Unsay atong makat-onan kang Noe, sa iyang asawa, ug sa ilang pamilya?
BAHIN KANAMO
Hangyo nga Magpaduaw
Pakighisgot bahin sa usa ka topic sa Bibliya, o pagkat-og dugang bahin sa mga Saksi ni Jehova.