Nagyaka siya sa yuta, ang iyang lawas nalukop sa ngutngot kaayong mga hubag gikan sa lapalapa hangtod sa alimpulo. Imadyina siya nga nagdungo, huyhoy ang abaga, nag-inusara, ug halos walay kusog nga mobugaw sa mga langaw nga naglibotlibot niya. Naglingkod siya sa abo sa pagpakita sa iyang pagbangotan, ug gikagis niya ang mga kugan pinaagig tipak sa kulon. Daghan kaayo ang nawala kaniya, ug nahimo siyang tinamay! Ang iyang mga higala, silingan, ug mga paryente nag-abandonar kaniya. Ang mga tawo, bisan ang mga bata, nagbugalbugal kaniya. Abi niyag ang iyang Diyos, si Jehova, mitalikod sab kaniya, pero nasayop siya.—Job 2:8; 19:18, 22.

Siya si Job. Ang Diyos miingon bahin kaniya: “Walay usa nga sama kaniya sa yuta.” (Job 1:8) Daghang katuigan sa ulahi, giisip gihapon ni Jehova si Job ingong usa sa labing matarong nga tawo nga nabuhi sukad.—Ezequiel 14:14, 20.

Nakasinati ba kag mga kalisdanan ug kasakit? Ang estorya bahin kang Job makahupay gyod kanimo. Makatabang sab ni nimo nga mas masabtan ang hiyas nga gikinahanglan sa matag matinumanong alagad sa Diyos—ang integridad. Ang mga tawo nagpakitag integridad dihang sila bug-os nga magmatinumanon sa Diyos ug magpadayon sa paghimo sa iyang kabubut-on bisan sa kalisdanan. Susihon nato kon unsa pay atong makat-onan kang Job.

Lagmit nga pipila ka panahon human mamatay si Job, gisulat sa matinumanong si Moises ang sugilanon sa kinabuhi ni Job. Ubos sa paggiya sa Diyos, gipadayag ni Moises dili lang ang mga hitabo dinhi sa yuta nga nakaapektar kang Job kondili ang pipila sab ka panghitabo didto sa langit.

Sa sinugdanan sa asoy, atong makita nga si Job malipayon ug tagbaw kaayo sa iyang kinabuhi. Siya dato, inila, ug tinahod sa yuta sa Uz—lagmit sa amihanang Arabia. Mahinatagon kaayo siya sa mga nanginahanglan ug giprotektahan niya kadtong dili makapanalipod sa ilang kaugalingon. Si Job ug ang iyang asawa gipanalanginan ug 10 ka anak. Labaw sa tanan, si Job maoy espirituwal nga tawo. Naningkamot gyod siya nga pahimut-an si Jehova, sama sa gihimo sa layo niyang mga paryente nga si Abraham, Isaac, Jacob, ug Jose. Sama sa maong mga patriarka, si Job nag-alagad ingong saserdote sa iyang pamilya, nga regular nga nagtanyag ug mga halad para sa iyang mga anak.—Job 1:1-5; 31:16-22.

Pero, kalit nga nausab ang estorya. Atong nabasa ang nahitabo sa langit ug nahibaloan ang mga butang nga wala mahibaloi ni Job. Ang matinumanong mga anghel ni Jehova nagtigom atubangan sa Diyos, ug misulod ang rebelyosong anghel nga si Satanas. Nahibalo si Jehova nga gitamay ni Satanas ang matarong nga tawong si Job, busa ang Diyos nakig-estorya kang Satanas ug iyang gihisgotan ang talagsaong integridad ni Job. Si Satanas mapahitas-ong mitubag: “Mahadlok kaha si Job sa Diyos sa wala lamay hinungdan? Dili ba imo man siyang gipanalipdan ug ang iyang pamilya ug ang tanan niyang gipanag-iya?” Magdumot si Satanas sa mga tawo nga magpakitag integridad. Dihang magpakita silag kinasingkasing nga debosyon kang Jehova nga Diyos, ilang gipamatud-an nga si Satanas traydor ug wala mahigugma kang bisan kinsa. Busa nangangkon si Satanas nga si Job nag-alagad sa Diyos tungod lang sa hakog nga motibo. Nangangkon pod siya nga kon mawad-an si Job sa tanan, iyang tunglohon si Jehova sa Iyang nawong mismo!—Job 1:6-11.

Si Job wala mahibalo niini, pero gihatagan siya ni Jehova ug dakong pribilehiyo: Pamatud-an nga sayop si Satanas. Gitugotan si Satanas nga kuhaon ang tanang nabatonan ni Job, basta dili lang niya kini hilabtan. Busa ang sadistang si Satanas milihok dayon. Sa usa lang ka adlaw, sunodsunod nga trahedya ang nahitabo kang Job. Nahibaloan ni Job nga ang tanan niyang kahayopan—una ang mga baka ug asno, dayon ang mga karnero, sunod mga kamelyo—nahurot ug kamatay. Mas grabe pa gyod, gipamatay ang mga sulugoon nga nagbantay sa kahayopan. Maylabot sa usa ka grupo, gireport kang Job nga ang hinungdan sa ilang kamatayon mao ang “kalayo gikan sa Diyos”—posible nga kilat. Pero wala na siyay higayon nga maghunahuna bahin sa nangamatay niyang mga sulugoon ug sa iyang kawalad-on, kay naay laing miabot nga balita nga kinagrabehan sa tanan. Ang iyang 10 ka anak didto sa balay sa ilang kamagulangan dihang ang balay kalit nga gihapak sa kusog nga hangin, mao nga naguba kini ug nangamatay silang tanan!—Job 1:12-19.

Lisod gyong imadyinon ang gibati ni Job. Gigisi niya ang iyang sinina, gikiskisan ang iyang ulo, ug nawad-an siyag umoy. Nakahinapos si Job nga si Jehova naghatag, ug si Jehova nagkuha. Ang tinuod, gimaniobra ni Satanas nga morag gikan sa Diyos ang maong mga katalagman. Pero wala tungloha ni Job ang iyang Diyos, nga maoy gihunahuna ni Satanas. Si Job miingon hinuon: “Padayong dayegon ang ngalan ni Jehova.”—Job 1:20-22.

Si Satanas naglungotlungot ug wala mosurender. Miatubang na pod siya kang Jehova dihang nagtigom ang mga anghel. Gidayeg na sab sa Diyos ang integridad nga gipakita ni Job bisan pa sa tanang pag-atake ni Satanas. Pero si Satanas miingon: “Panit alang sa panit. Ang tawo maghatag sa tanan niyang nabatonan alang sa iyang kinabuhi. Apan bakyawa ang imong kamot ug hampaka ang iyang bukog ug unod, ug tan-awon nato kon dili ba ka niya tunglohon sa imong nawong mismo.” Segurado si Satanas nga kon grabeng masakit si Job, iyang tunglohon ang Diyos. Kay dako kaayog pagsalig si Jehova kang Job, gitugotan niya nga hatagan ni Satanas ug sakit si Job, basta dili lang kini patyon.—Job 2:1-6.

Wala madugay, nasinati ni Job ang gihisgotan sa sinugdan. Imadyina ang iyang luoy kaayo nga asawa. Nasakitan na siya pag-ayo sa pagkamatay sa iyang 10 ka anak, ug karon nagtan-aw siya sa iyang bana nga nag-antos pag-ayo, ug wa siyay mahimo! Sa kaguol, siya miingon: “Huptan ba gihapon nimo ang imong integridad? Tungloha ang Diyos ug pagpakamatay!” Dili ingon niana mosulti ang asawa nga nailhan ug gimahal ni Job. Naghunahuna si Job nga nakaingon ang iyang asawa niini kay nawad-an na kini sa saktong panghunahuna. Pero wala gihapon tungloha ni Job ang Diyos. Wala siyay gisulti nga daotan.—Job 2:7-10.

Nahibalo ka ba nga kining makapaguol ug tinuod nga estorya nakaapektar nimo sa personal? Matikdi nga dili lang si Job ang giakusahan ni Satanas kondili ang katawhan sa katibuk-an. Siya miingon: “Ang tawo maghatag sa tanan niyang nabatonan alang sa iyang kinabuhi.” Sa ato pa, si Satanas nagtuo nga walay bisan kinsa kanato ang makapabiling matinumanon sa Diyos! Iyang ginaingon nga wala gyod ka mahigugma sa Diyos, ug nga talikdan dayon nimo ang Diyos aron makalingkawas sa imong mga problema. Mora bag giingon ni Satanas nga mahunahunaon sab ka sa kaugalingon, parehas niya! Gusto ba nimong pamatud-an nga sayop siya? Ang matag usa kanato may kahigayonan sa paghimo niana. (Proverbio 27:11) Atong tan-awon karon kon unsang pagsulay ang sunod nga giatubang ni Job.

Ang tulo ka lalaki nga nakaila kang Job—nga gitawag sa asoy ingong iyang mga higala—nakabalita sa iyang kalisdanan ug mibisita niya aron hupayon siya. Dihang ila siyang nakita sa layo, wala na nila siya mailhi. Grabe ang pag-antos ni Job ug ang iyang panit nangitom tungod sa sakit, maong lahi na kaayo ang iyang hitsura. Ang tulo ka lalaki—si Elipaz, Bildad, ug Zopar—nagpakaaron-ingnong naguol pag-ayo, nga nagdanguyngoy ug nagsaliyab ug abog sa ilang ulo. Dayon nanglingkod sila sa yuta duol kang Job ug wala magtingog. Tibuok semana silang nanglingkod didto, adlaw ug gabii, nga walay gisulti kaniya. Dili nato hunahunaon nga ang ilang pagpakahilom maoy ilang paagi sa paghupay kang Job, kay wala sila mangutana kaniya bahin sa iyang kahimtang. Ang nahibaloan lang nila mao nga si Job grabeng nag-antos—butang nga klaro kaayo.—Job 2:11-13; 30:30.

Sa kataposan, si Job nay miunag sulti. Tungod sa kasakit sa iyang gibati, iyang gitunglo ang adlaw nga siya natawo. Ug iyang gisulti ang usa sa mga hinungdan sa iyang kasakit. Nagtuo siya nga ang Diyos maoy nagpahinabo sa iyang mga kalisdanan! (Job 3:1, 2, 23) Bisag wala siya mawad-ig pagtuo sa Diyos, nagkinahanglan gyod siyag paghupay. Pero dihang mitingog na ang iyang mga higala, nakaingon si Job nga mas maayo pang naghilom na lang unta sila.—Job 13:5.

Si Elipaz, nga tingali maoy kinamagulangan nilang tulo ug mas magulang kang Job, maoy miunag sulti. Dayon, misunod ang duha niya ka kauban. Makaingon ta nga gisundog nila ang sayop nga panghunahuna ni Elipaz. Ang uban sa gipanulti niining mga tawhana morag dili ra makadaot, kay gisulti ra nila kon unsay ginaingon sa mga tawo bahin sa Diyos nga husto paminawon. Pananglitan, sila miingon nga ang Diyos hataas, nga siya mosilot sa daotang mga tawo, ug magpanalangin sa maayong mga tawo. Pero sa una pa lang nilang gipanulti, makita na nga wala gyod silay pagtagad kang Job. Si Elipaz migamit ug mga pangatarongan nga lohikal paminawon aron ipakita nga kon ang Diyos maayo ug siya magsilot sa mga daotan, ug klaro nga gisilotan si Job, nan nakahimo siyag daotan.—Job 4:1, 7, 8; 5:3-6.

Dili ikatingala nga wala dawata ni Job ang maong pangatarongan. Iya dayon ning gisalikway. (Job 6:25) Pero ang tulo ka magtatambag mas naghunahuna na hinuon nga si Job duna gyoy gitagong sala ug busa angay lang mahitabo kaniya kadtong tanang daotang butang. Giakusahan ni Elipaz si Job nga siya kuno mapangahason, daotan, ug walay kahadlok sa Diyos. (Job 15:4, 7-9, 20-24; 22:6-11) Giingnan ni Zopar si Job nga biyaan ang pagkadaotan ug ang pagpakasala. (Job 11:2, 3, 14; 20:5, 12, 13) Ug gisultihan siya ni Bildad ug sakit kaayong mga pulong. Si Bildad miingon nga ang mga anak ni Job duna gyoy nahimong sala ug busa angay lang silang mamatay!—Job 8:4, 13.

Duna pay mas grabeng gihimo kining mga tawong sayop ug panghunahuna. Gawas nga gisultihan nila si Job nga wala niya hupti ang iyang integridad, miingon sab sila nga way pulos ang paghupot ug integridad! Sa sinugdanan sa iyang gisulti, gihisgotan ni Elipaz ang iyang makapanglimbawot nga kasinatian uban sa dili makitang espiritu. Ang iyang kasinatian uban niana nga demonyo miresultag daotan kaayo nga konklusyon: Ang Diyos “walay pagsalig sa iyang mga alagad, ug pangitaan niyag sayop ang iyang mga anghel.” Kon tinuod ni, imposible gyong mapalipay sa tawo ang Diyos! Sa ulahi, si Bildad miingon nga dili magpakabana ang Diyos kon huptan ni Job ang iyang integridad, sama ra nga dili siya magpakabana sa usa ka ulod!—Job 4:12-18; 15:15; 22:2, 3; 25:4-6.

Nakasulay na ba kag hupay sa usa nga nag-antos pag-ayo? Dili ni sayon. Pero daghan tag makat-onan sa sayop ug panghunahuna nga mga higala ni Job—ilabina kon unsay dili angayng isulti. Sa kataas sa ilang gipanulti nga morag husto o lohikal paminawon, wala man gani nila tawga si Job sa iyang ngalan! Wala sila magpakabana sa nadugmok nga kasingkasing ni Job ug wala maghunahuna nga kinahanglan silang magmalumo kaniya. * Kon ang usa sa imong mga minahal naguol, kinahanglan kang magmabination, magmapinanggaon, ug magmalumo. Palig-ona ang iyang pagtuo ug dasiga siya, nga tabangan siya nga mosalig sa Diyos ug motuo sa Iyang pagkamaayo, kaluoy, ug hustisya. Kana gyoy buhaton ni Job sa iyang mga higala kon sila pay naa sa iyang situwasyon. (Job 16:4, 5) Pero unsay iyang reaksiyon sa ilang way hunong nga pag-atake sa iyang integridad?

Ang makaluluoy nga si Job daan nang naguol dihang nagsugod ning taas nga debate. Sa sugod pa lang, miangkon na siya nga usahay ‘magpasagad’ siyag sulti ug ang iyang mga pulong sama nianang sa “tawo nga nawad-ag paglaom.” (Job 6:3, 26) Masabtan nato kon ngano. Nasulti to niya tungod sa kasakit nga iyang gibati ug kay wala niya masabti ang nagakahitabo. Kay ang mga trahedya nga midangat kaniya ug sa iyang pamilya kalit nga nahitabo ug morag katingalahan pa gani, nagtuo si Job nga si Jehova ang hinungdan niana. May importanteng mga hitabo nga wala mahibaloi ni Job, busa nakahimo siyag konklusyon nga binase sa sayop nga mga ideya.

Pero si Job tawo nga lig-on ug pagtuo. Ang iyang pagtuo klarong makita diha sa iyang gipanulti nianang taas nga debate—mga pulong nga tinuod, nindot, ug makapadasig nato karon. Dihang misulti siya bahin sa nindot nga mga kalalangan, iyang gidayeg ang Diyos pinaagi sa paghisgot sa mga butang nga dili mahibaloan sa tawo kon wala ipadayag sa Diyos. Pananglitan, siya miingon nga “gibitay [ni Jehova] ang yuta sa wala,” butang nga nadiskobrehan lang sa mga siyentipiko paglabayg gatosan ka tuig. * (Job 26:7) Ug naghisgot si Job bahin sa iyang paglaom, nga gilaoman pod sa ubang matinumanong mga tawo. Siya nagtuo nga kon siya mamatay, ang Diyos mahinumdom niya, mingawon niya, ug sa ulahi magbanhaw kaniya.—Job 14:13-15; Hebreohanon 11:17-19, 35.

Pero komosta ang isyu bahin sa integridad? Si Elipaz ug ang iyang duha ka higala nangangkon nga dili importante sa Diyos ang integridad sa tawo. Gidawat ba ni Job kanang sayop nga ideya? Wala gayod! Si Job miingon nga ang iyang integridad importante sa Diyos. Kombinsido siyang miingon bahin kang Jehova: “Iyang makita ang akong integridad.” (Job 31:6) Dugang pa, nakita ni Job nga ang sayop nga pangatarongan sa iya kunong mga maghuhupay sa pagkatinuod maoy pag-atake sa iyang integridad. Tungod niana gisulti ni Job ang iyang kinatas-ang pamulong, nga nakapahilom ra gyod niadtong tulo ka lalaki.

Nasabtan ni Job nga ang iyang integridad konektado sa iyang adlaw-adlawng pagkinabuhi. Busa iyang gisaysay kon giunsa niya paghupot ang iyang integridad diha sa tanan niyang gibuhat. Pananglitan, wala siya makigbahin sa bisan unsang idolatriya; gipakitaan niyag kaayo ug dignidad ang uban; nagpabilin siyang hinlo sa moral, nga gipabilhan ang iyang kaminyoon; ug labaw sa tanan, nagpabilin siyang maunongon ug matinumanon sa bugtong matuod nga Diyos, si Jehova. Busa si Job kinasingkasing nga nakaingon: “Hangtod nga ako mamatay, dili gyod nako wad-on ang akong integridad!”—Job 27:5; 31:1, 2, 9-11, 16-18, 26-28.

Parehas ba kang Job ang imong panglantaw sa integridad? Sayon rang isulti ning pulonga, pero nasabtan ni Job nga dili igo ang pag-ingon nga duna tay integridad; kinahanglang pamatud-an ni sa buhat. Atong gipakita ang atong bug-os, kinasingkasing nga debosyon sa Diyos pinaagi sa pagsunod kaniya ug pagbuhat kon unsay husto sa iyang mga mata diha sa atong adlaw-adlawng pagkinabuhi—bisan dihang nag-atubang tag kalisdanan. Kon magkinabuhi ta nianang paagiha, seguradong mapalipay nato si Jehova ug mapasuko ang iyang kaaway, si Satanas, sama sa gihimo ni Job dugay na kanhi. Kini ang kinamaayohang paagi nga masundog nato ang pagtuo ni Job!

Pero wala pa mahuman ang estorya ni Job. Nalimot si Job kon unsa gyoy importante, ug mas nagpokus siya sa pagdepensa sa iyang kaugalingong pagkamatarong imbes sa reputasyon sa Diyos. Nagkinahanglan siyag pagtul-id ug espirituwal nga tabang. Ug nag-antos gihapon siya sa tumang kasakit ug kaguol, nga nagkinahanglag tinuod nga kahupayan. Unsay buhaton ni Jehova para niining tawo nga lig-og pagtuo ug integridad? Ang sunod nga artikulo niini nga serye magtubag nianang mga pangutanaha.