Ang “creative play” maoy mga dula nga makatabang sa mga bata nga matagbaw ang ilang pagka-curious ug magamit ang ilang imahinasyon. Makatabang pod ni nga mag-mature sila ug makakat-on ug mga skill.

 Apil ani ang:

•   Pagdrowing

•   Paglutoluto

•   Pagbalaybalay

•   Pagkanta

•   Paggamit ug mga dulaan nga asembolon

•   Pagdulag simpleng mga butang (sama sa karton)

 Sa daghang lugar, imbes padulaog parehas ani, ang mga bata patan-awon na lang pirmeg mga video o paapilon sa mga activity nga naandam na daan.

 Angay ba nimo ning tagdon?

•   Ang angay nimong mahibaloan

•   Ang imong mahimo

•   Makatabang ang creative play aron mag-mature ang bata. Makaayo ni niya sa pisikal ug mental. Magamit niya ang iyang imahinasyon ug makakat-on siya nga makig-amigo. Makakat-on pod siya nga magpailob, maghimog maayong desisyon, makontrol ang iyang emosyon, ug dili makig-away sa iyang mga kadula. Sa ato pa, ang creative play makatabang sa bata nga maandam inigdako niya.

•   Makadaot ang sobrang paggamit ug gadyet. Makaadik ang sobrang paggamit ug gadyet, ug daghan nga naadik ani nanambok pag-ayo ug hilig makig-away. Mao nga angayng hunahunaon pag-ayo sa mga ginikanan kon ila bang tugotan ang gadyet nga maoy molingaw sa ilang gagmayng anak.

•   Dili maayog epekto kon ang mga bata paapilon sa daghang activity. Kon sunodsunod na ang nakaeskedyul nga mga activity sa mga bata, wala na silay panahon para sa mga dula nga matagbaw ang ilang pagka-curious ug magamit ang ilang imahinasyon.

•   Paghatag ug panahon para sa creative play. Kon posible, padulaa sa gawas ang imong mga anak aron maobserbahan nila ang lainlaing butang nga gibuhat sa Diyos. Tugoti sila sa paghimo sa gusto nilang mga hobby ug padulaa sila sa mga dulaan nga makatabang nila nga mahimong creative. a

   Hunahunaa kini: Kon padulaon nako ang akong anak sa mga dula nga magamit niya ang iyang imahinasyon, unsang mga kinaiya ug skill ang iyang makat-onan? Unsay ikatabang ana inigkadako niya?

   Prinsipyo sa Bibliya: “Ang pag-ehersisyo naay . . . kaayohan.”—1 Timoteo 4:8, footnote.

•   Limitahe ang panahon sa gadyet o sa TV. Hunahunaag maayo kon tugotan ba nimo ang imong anak nga magsigeg gamit ug cellphone o tablet o magsigeg tan-aw ug TV aron malingaw siya. Ang mga pediatrician nagrekomendar nga dili pagamiton ug gadyet o patan-awon ug TV ang mga bata nga wala pay dos anyos, ug dili palapason ug usa ka oras kada adlaw para sa mga bata nga dos hangtod singko anyos. b

   Hunahunaa kini: Unsa ka dugay nakong pagamiton ug gadyet o patan-awon ug TV ang akong anak? Kinahanglan ba nako siyang ubanag tan-aw? Unsa may maayong ipuli sa gadyet o TV?

   Prinsipyo sa Bibliya: “Pagbantay pag-ayo nga ang inyong paggawi dili sama sa dili maalamon kondili sa maalamong mga tawo, nga gamiton ang inyong panahon sa kinamaayohang paagi.”—Efeso 5:15, 16.

•   Hunahunaa kon unsay epekto sa naandam na daan nga mga activity. Tinuod, makatabang ni sa imong anak nga mohawod sa usa ka sport o sa paghimo sa usa ka butang. Pero sagad, kon sobra ka daghan ang ingon ani nga activity, ma-stress siya, apil ang ginikanan nga maghatod-kuha niya. Siyempre, ang prinsipyo sa Efeso 5:15, 16 bahin sa maayong paggamit sa panahon mapadapat pod ani nga kahimtang.

   Hunahunaa kini: Sobra ba ka daghan ang activity nga giapilan sa akong anak? Kon mao, unsang kausaban ang among himoon?

   Prinsipyo sa Bibliya: ‘Seguroa ang mas importanteng mga butang.’—Filipos 1:10.