Nehemias 1:1-11
1 Ang mga pulong ni Nehemias*+ nga anak ni Hacalias: Karon sa bulan sa Kislev,* sa ika-20 nga tuig, didto ko sa palasyo* sa Susan.*+
2 Unya miabot si Hanani,+ usa sa akong mga igsoon, uban sa pipila ka lalaki gikan sa Juda. Gipangutana nako sila bahin sa nahibiling mga Hudiyo nga mipauli gikan sa pagkabihag+ ug bahin sa Jerusalem.
3 Sila mitubag: “Makaluluoy kaayo ug makauulaw ang kahimtang sa mga namauli sa probinsiya* gikan sa pagkabihag.+ Nangaguba ang paril sa Jerusalem+ ug nangasunog ang mga ganghaan* niini.”+
4 Pagkadungog nako niini, milingkod ko ug mihilak ug nagbangotan sa pipila ka adlaw. Nagpuasa ko+ ug nag-ampo sa Diyos sa kalangitan.
5 Ako miingon: “Oh Jehova, ang Diyos sa kalangitan, ang gamhanan ug kahibulongang Diyos nga nagatuman sa iyang pakigsaad ug nagapakitag maunongong gugma niadtong nahigugma kaniya ug nagatuman sa iyang mga sugo,+
6 palihog, ayawg sampongi ang imong dalunggan ug ayawg ipiyong ang imong mata sa pag-ampo sa imong alagad karon. Adlaw ug gabii kong nag-ampo+ bahin sa imong mga alagad ug sa mga sala sa katawhan sa Israel batok kanimo. Kami nakasala, ako ug ang panimalay sa akong amahan.+
7 Daotan gyod ang among gihimo+ kay wala namo tumana ang mga sugo, regulasyon, ug hudisyal nga mga hukom nga gihatag nimo kang Moises nga imong alagad.+
8 “Palihog hinumdomi ang imong giingon* kang Moises nga imong alagad: ‘Kon dili mo magmatinumanon, patibulaagon mo nako taliwala sa mga katawhan.+
9 Apan kon mobalik mo nako ug motuman sa akong mga sugo, bisan pag magkatibulaag mo hangtod sa kinalay-ang dapit sa yuta, tapokon mo nako+ ug dad-on sa dapit nga akong gipili nga butangan sa akong ngalan.’+
10 Sila imong mga alagad ug imong katawhan, nga gitubos nimo pinaagi sa imong dakong gahom ug gamhanang kamot.+
11 Oh Jehova, palihog, paminawa ang akong pag-ampo ug ang pag-ampo sa imong mga alagad nga nagpakitag kahadlok sa imong ngalan, ug palihog, tabangi ko nga molampos karong adlawa ug hinaot kaluy-an ko sa hari.”+
Ako ang tig-ipis* sa ilimnon sa hari.+
Mga Footnote
^ Kahulogan, “Si Jah Nagahupay.”
^ Tan-awa ang Apendise B15.
^ O “kuta.”
^ O “Susa.”
^ O “sakop nga distrito.”
^ Iningles, gate.
^ O “gipasidaan.”
^ Opisyal sa palasyo nga tigsilbig bino o ubang ilimnon sa hari.
