PANGUTANA 7
Unsay Akong Himoon Kon Presyuron Ko sa Pagpakigsekso?
UNSAY IMONG HIMOON?
Handurawa kini: Si Heather ug Mike duha ka bulan pa lang nga manag-uyab, pero morag dugay na kaayo silang magkaila. Pirme silang mag-text, magtawganay, ug mahibalo pa gani sila kon unsay sunod isulti sa usag usa! Pero karon, labaw pa sa panag-estoryahay ang gusto ni Mike.
Sa miaging duha ka bulan, igo lang silang magkuptanayg kamot ug maghalok kadiyot. Gusto ni Heather nga diha lang sila kutob. Pero dili pod niya gusto nga bulagan siya ni Mike. Walay laing lalaki nga nakapabati niya nga siya guwapa kaayo ug gimahal. ‘Gawas pa,’ siya miingon, ‘nagkahigugmaay mi ni Mike . . .’
Kon ikaw si Heather ug husto nag edad nga makigtrato, unsay imong himoon?
HUNONG UG PAMALANDONG!
Ang pagpakigsekso regalo sa Diyos para lang sa mga minyo. Kon makigsekso ka nga wala pay kasal, imong gidaot ang maong regalo. Morag imong gihimong trapo ang nindot kaayong sinina nga giregalo kanimo
Kon supakon nimo ang balaod sa grabidad, ang resulta dili gyod maayo. Ingon sab niana ang resulta kon supakon nimo ang balaod sa moralidad, sama sa balaod nga: ‘Ayri ang pakighilawas [o, seksuwal nga imoralidad].’—1 Tesalonica 4:3.
Unsay mga resulta kon imo kining supakon? Ang Bibliya nag-ingon: “Siya nga nagapakighilawas [o, nagahimog seksuwal nga imoralidad] nagapakasala batok sa iyang kaugalingong lawas.” (1 Corinto 6:18) Nganong tinuod kana?
Nakita sa mga researcher nga daghan niadtong nakigsekso una pa maminyo nakasinati niini nga mga resulta:
-
GRABENG KAGUOL. Kadaghanang batan-on nga nakigsekso nga wala pay kasal nagbasol sa ulahi.
-
MAWAD-AG PAGSALIG. Human makigsekso, ang kada usa maghunahuna, ‘Kinsa pa kahay lain niyang gika-sex?’
-
PAGKADISMAYA. Daghang babaye gustog lalaki nga manalipod nila imbes pahimuslan sila. Ug daghang lalaki dili ganahan ug babaye nga ila nang napahimuslan.
-
Ang punto: Kon makig-sex ka nga wala pay kasal, imong gipakaubos ang imong kaugalingon pinaagi sa paghatag lang sa usa ka butang nga bililhon kaayo. (Roma 1:24) Ang imong lawas bililhon kaayo ug dili puwedeng ipanghatag lang!
Ipakita nga lig-on kag baroganan ug dili gyod mohimog seksuwal nga imoralidad. (1 Tesalonica 4:3) Ug kon maminyo ka na, mahimo ka nang makigsekso. Matagbaw ka pag maayo, kay dili ka makonsensiya, magbasol, ug maguol, nga maoy sagad bation niadtong nakigsekso nga wala pay kasal.—Proverbio 7:22, 23; 1 Corinto 7:3.
UNSAY IMONG HUNAHUNA?
-
Kon gihigugma gyod ka sa usa ka tawo, gusto ba niyang madaot ang imong panglawas ug emosyon?
-
Kon gimahal gyod ka sa usa ka tawo, tentalon ka ba niya sa pagdaot sa imong relasyon sa Diyos?—Hebreohanon 13:4.
Basin Ganahan Pod Ka
MGA BATAN-ON NANGUTANA
Andam na ba Kong Makigdeyt?
Lima ka punto nga makatabang nimong mahibaloan kon andam na ba kang makigdeyt ug magminyo.
MGA BATAN-ON NANGUTANA
Unsay Angay Nakong Dahomon Dihang Makigdeyt?
Tulo ka butang nga angay ninyong konsiderahon sa imong trato samtang mas nagkailhanay mo.
MGA BATAN-ON NANGUTANA
Pagpakigdeyt—Bahin 3: Angay ba Ming Magbulag?
Angay pa bang ipadayon ang inyong relasyon kon nagduhaduha na ka? Kini nga artikulo makatabang nimo nga makahimog desisyon.
MGA WORKSHEET
Kon Unsaon Pagpatin-aw sa Imong Baroganan Bahin sa Pagpakigsekso
Dili kalikayan nga ang matag usa kanato makahatag ug eksplinasyon bahin sa atong pagtuo. Gamita kini nga worksheet sa pag-ugmad ug pagdepensa sa imong pagtuo.
