Gihisgotan ni Jesus kon unsaon nato pagkahibalo nga “duol na ang Gingharian sa Diyos.” (Lucas 21:31) Gitagna niya nga naay mahitabong dagkong gubat, kusog nga mga linog, kakulang sa pagkaon, ug kamatay. Ug kini nga mga hitabo mao gyoy atong nakita karon.​—Lucas 21:10-17.

Gipakita sab sa Bibliya nga ang “kataposang mga adlaw” sa pagmando sa tawo mailhan pinaagi sa daotang kinaiya o binuhatan sa mga tawo. Mabasa nimo kini sa 2 Timoteo 3:1-5. Dihang makita nimo kini nga mga kinaiya ug binuhatan karon, seguradong makaingon ka nga kini nga tagna sa Bibliya nahitabo na karon.

Unsay gipasabot niini? Ang Gingharian sa Diyos hapit nang mohimog dagkong kausaban dinhi sa yuta aron makabaton ang mga tawo ug mas maayong kinabuhi. (Lucas 21:36) Sa Bibliya, ang Diyos nagsaad ug maayong kaugmaon para sa yuta ug sa mga tawo. Niay pipila ka pananglitan.

“Siya [si Jesus] gihatagag awtoridad sa pagmando, dungog, ug gingharian, aron ang tanang katawhan nga lainlaig nasod ug pinulongan mag-alagad kaniya. Ang iyang pagmando maoy hangtod sa hangtod​—kini dili matapos. Ug ang iyang gingharian dili malaglag.”​—DANIEL 7:14.

Kahulogan niini: Magmalipayon ka ubos sa kinalabwang gobyerno nga gitukod sa Diyos nga ang Hari mao ang iyang Anak.

“Walay residente nga moingon: ‘Masakiton ko.’”​—ISAIAS 33:24.

Kahulogan niini: Dili na ka magsakit o mabaldado; mabuhi ka sa walay kataposan ug dili na mamatay.

“Gipahunong niya ang mga gubat sa tibuok yuta.”​—SALMO 46:9.

Kahulogan niini: Wala na unyay hulga sa gubat ug wala nay mag-antos tungod sa epekto sa gubat.

“Ang daotan mawala na . . . Ang mga maaghop manag-iya sa yuta.”​—SALMO 37:10, 11.

Kahulogan niini: Mawala na ang mga tawong daotan; mga masinugtanon sa Diyos na lang ang magpabilin.

“Magtukod silag mga balay ug magpuyo niini, ug magtanom silag mga ubasan ug magkaon sa bunga niini.”​—ISAIAS 65:21, 22.

Kahulogan niini: Ang tibuok yuta nindot na kaayong puy-an. Tumanon sa Diyos ang atong pag-ampo nga ang iyang kabubut-on matuman dinhi “sa yuta.”​—Mateo 6:10.