KON nakasinati na kag kalamidad, makasabot tingali ka sa gibati sa uban nga nakasinati sab niana: nakuratan, dili makatuo, naglibog, nabalaka, ug nagdamgodamgo sa nahitabo. Tungod sa kaluya ug kakapoy, daghan ang halos nawad-ag gana nga mabuhi.

Kon nawad-an ka sa tanan tungod sa kalamidad, tingali bation nimo nga kasurenderon na ka. Basig bation pa gani nimo nga wala nay pulos ang imong kinabuhi. Pero gipakita sa Bibliya nga naay pulos ang imong kinabuhi ug makasalig ka nga naay maayong kaugmaon para nimo.

Ang Ecclesiastes 7:8 nag-ingon: “Mas maayo pa ang kataposan sa usa ka butang kay sa sinugdanan niini.” Human ka makasinatig kalamidad, tingali morag wala nay paglaom ang imong kinabuhi. Pero samtang maningkamot ka nga mabalik sa normal ang imong kinabuhi, moarang-arang ra ang kahimtang.

Ang Bibliya nagtagna nga moabot ang panahon nga “wala na unyay madungog . . . nga tingog sa paghilak o hilak sa kasakit.” (Isaias 65:19) Kanay mahitabo dihang ang yuta mahimo nang paraiso ubos sa pagmando sa Gingharian sa Diyos. (Salmo 37:11, 29) Wala na unyay kalamidad. Ang sakit nga mga kaagi ug ang nagpabilin nga trauma mawala na hangtod sa hangtod, kay ang Labing Gamhanang Diyos nagsaad: “Ang kanhing mga butang dili na hinumdoman, ug dili na kini motungha sa kasingkasing.”​—Isaias 65:17.

Hunahunaa kini: Ang Diyos naghimog kahikayan “aron makabaton [kag] maayong kaugmaon ug paglaom”​—usa ka malinawong kinabuhi ubos sa hingpit nga pagmando sa Diyos. (Jeremias 29:11) Ang pagkahibalo ba niini nga kamatuoran makatabang nimo nga dili mosurender sa kinabuhi? Si Sally, nga gihisgotan sa nag-unang artikulo, miingon: “Kon imong hunahunaon ang tanang nindot nga butang nga himoon sa Gingharian sa Diyos para kanato sa umaabot, makatabang ni nimo nga dili na magpokus sa dili maayong mga kasinatian ug molahutay sa imong kahimtang karon.”

Gidasig ka namo sa pagkat-on ug dugang bahin sa himoon sa Gingharian sa Diyos para sa katawhan sa dili madugay. Kon imo ning himoon, makasalig ka nga bisan pa sa kalamidad nga imong nasinatian, dunay pulos ang imong kinabuhi karon samtang mahinamon kang nagpaabot sa kinabuhi nga wala nay kalamidad. Sa pagkakaron, ang Bibliya dunay praktikal nga giya nga makatabang nimo sa paglahutay human sa kalamidad. Konsideraha ang pipila niini.