Hunahunaa ang suod nga relasyon sa mga identical twin o managsamang kaluha. Sila dunay talagsaong kasuod. Ang uban pa gani nila “mahibalo dayon kon unsay gustong ipasabot sa ilang kaluha, bisag dili na ipatin-aw pa,” miingon ang director sa Twin Studies Center, si Nancy Segal nga duna poy kaluha. Usa ka babaye ang mikomento bahin sa ilang kasuod sa iyang kaluha niining paagiha: “Nailhan namo pag-ayo ang usag usa.”

Unsay hinungdan niining talagsaong kasuod? Sumala sa mga pagtuon, gawas nga dunay epekto ang palibot ug ang pagmatuto sa ginikanan, lagmit ang parehong genes sa mga kaluha mao ang pangunang hinungdan niini.

HUNAHUNAA KINI: Walay laing persona nga mas nakaila nato kondili ang atong Maglalalang. Maoy hinungdan nga si salmistang David miingon: “Gisalipdan ko nimo sa tagoangkan sa akong inahan. Ang akong mga bukog wala matago kanimo dihang gibuhat ko sa tago. . . . Nakita ko nimo bisan niadtong binhi pa ko sa tagoangkan; sa imong basahon nasulat ang tanang bahin niini.” (Salmo 139:13, 15, 16) Ang Diyos lang ang nahibalo ug bug-os nga nakasabot kon unsa nga mga genes ug kasinatian sa kinabuhi ang nakaapektar sa atong kinaiya. Kini nagpasalig nato nga ang Diyos nahibalo sa tanang detalye bahin kanato.

Si David miampo: “Oh Jehova, gisusi mo ako, ug nakaila ka kanako. Nahibalo ka dihang molingkod ko ug dihang motindog. Nahibalo ka sa akong mga hunahuna bisan sa halayo. Sa dili pa ko makasulti bisag usa ka pulong, Oh Jehova, ikaw nahibalo na pag-ayo niini.” (Salmo 139:1, 2, 4) Dugang pa, si Jehova nasayod sa atong mga pagbati ug iyang “ginaila ang matag hunahuna ug intensiyon.” (1 Cronicas 28:9; 1 Samuel 16:6, 7) Unsay gitudlo niini bahin sa Diyos?

Bisag dili nato mabungat ang tanan natong gihunahuna ug gibati dihang moampo, ang atong Maglalalang nahibalo kon unsay atong gihimo ug kon nganong gihimo nato kana. Nasayod sab siya nga gusto natong himoon ang maayo, bisag malisdan ta sa pagbuhat niana tungod sa atong mga limitasyon. Kay gibutang ni Jehova ang gugma diha sa atong kasingkasing, segurado nga siya andam—malipay pa gani—nga magmatikod ug mosabot sa atong maayong mga tinguha ug motibo.—1 Juan 4:7-10.

 Ang Bibliya nagpasalig nato

• “Ang mga mata ni Jehova anaa sa mga matarong, ug ang iyang mga dalunggan mamati sa ilang mga hangyo.”—1 PEDRO 3:12.

• Ang Diyos nagsaad: “Hatagan ka nakog lawom nga pagsabot ug tudloan sa dalan nga angay nimong laktan. Tambagan ka nako samtang nagatan-aw ko kanimo.”—SALMO 32:8.

Ang pagkasayod ba nga ang Diyos nakasabot sa atong kahimtang ug pagbati makatabang nato nga malahutay ang mga kalisdanan? Pamalandonga ang nahitabo kang Anna, nga taga-Nigeria. “Nagduhaduha ko kon posible pa bang magmalipayon ang akong kinabuhi tungod sa mga kalisdanan,” siya miingon. “Balo ko. Samtang nag-atiman ko sa akong anak nga babaye nga naospital tungod sa hydrocephalus (sobra ang pluwido sa utok), na-diagnose sab ko nga naay breast cancer ug kinahanglang magpaopera, magpa-chemotherapy, ug magpa-radiotherapy. Lisod kaayo to para nako kay naospital ko samtang nag-atiman sa akong anak nga dunay sakit.”

Unsay nakatabang kang Anna? “Gipamalandong nako ang mga teksto sama sa Filipos 4:6, 7, nga nag-ingong ‘ang kalinaw nga gikan sa Diyos, nga labaw sa tanang pagsabot, magbantay sa inyong kasingkasing ug hunahuna.’ Dihang mahinumdom ko niining tekstoha, bation nako nga suod kaayo ko kang Jehova, nga masaligong mas nakasabot siya nako kay sa akong kaugalingon. Nakadawat sab kog mga pagdasig gikan sa mga isigka-Kristohanon sa kongregasyon.

“Bisag duna gihapon koy sakit, ang kahimtang namo sa akong anak miarang-arang. Kay andam motabang si Jehova, among nakat-onan nga dili maghunahunag negatibo dihang makasinatig kalisdanan. Ang Santiago 5:11 nagpasalig nato: ‘Giisip natong malipayon kadtong nakalahutay. Inyong nadungog ang bahin sa pagkamalahutayon ni Job, ug tungod sa gihimo ni Jehova kaniya, inyong nasayran nga si Jehova mabination kaayo ug maluluy-on.’” Nasabtan pag-ayo ni Jehova ang kahimtang ni Job, ug makasalig ta nga nasabtan sab niya ang tanan natong kalisdanan.