DIHANG DUNAY KALAMIDAD, NAKAPANGUTANA KA BA, ‘ASA ANG DIYOS?’ O DUNA BAY TRAHEDYA SA IMONG KINABUHI NGA NAKAPANGUTANA KA KON DUNA BAY PAGTAGAD ANG DIYOS KANIMO?

Tingali parehas mog gibati ni Sheila, nga nagpuyo sa United States. Ang iyang pamilya relihiyoso kaayo. Siya miingon: “Sukad sa bata pa ko, nagtuo kog Diyos kay siya ang nagbuhat nato. Pero wa gyod ko masuod niya. Nahibalo kong makakita siya nako, pero layo kaayo siya. Nagtuo ko nga ang Diyos wala masuko nako. Pero gibati nakong wala siyay pagtagad nako.” Nganong mao nay gibati ni Sheila? Siya miingon: “Sunodsunod ang trahedya sa among pamilya, ug morag wala gyod mi tabangi sa Diyos.”

Sama kang Sheila, lagmit segurado sab ka nga dunay Labing Gamhanang Diyos. Pero nakapangutana tingali ka kon may pagtagad ba siya nimo. Mao sab nay gibati ni Job, usa ka matarong nga tawo nga dunay pagtuo sa gahom ug kaalam sa Maglalalang. (Job 2:3; 9:4) Dihang nakasinati siyag sunodsunod nga trahedya, siya nangutana sa Diyos: “Nganong imo kong gitalikdan ug imo kong giisip nga kaaway?”—Job 13:24.

Unsay giingon sa Bibliya? Ang Diyos bay mabasol kon dunay mga trahedya? Duna bay mga pamatuod nga ang Diyos nagtagad sa mga tawo sa katibuk-an ug ingong indibiduwal? Para nimo, masayran ba nato kon ang Diyos ba makamatikod ug makasabot nato, may pagtagad sa atong pagbati, o motabang sa atong mga problema?

Sa mosunod nga mga artikulo, atong hisgotan kon unsay gitudlo sa kalalangan bahin sa pagtagad sa Diyos kanato. (Roma 1:20) Dayon, atong susihon kon unsay giingon sa Bibliya bahin sa gugma sa Diyos. Dihang mas mailhan nimo ang Diyos pinaagi sa iyang kalalangan ug sa iyang Pulong, mas makasalig ka nga ‘gimahal ka niya.’—1 Juan 2:3; 1 Pedro 5:7.