Kon ang pag-antos dili gikan sa Diyos, kinsay mabasol sa grabeng kagutom, kalisod, giyera, makamatayng sakit, ug mga kalamidad? Ang Bibliya naghisgot ug tulo ka pangunang hinungdan kon nganong nag-antos ang mga tawo:

1. Kahakog, Kadalo, ug Pagdumot. “Ang tawo nagmando sa tawo alang sa iyang ikadaot.” (Ecclesiastes 8:9) Sagad mag-antos ang mga tawo tungod kay sila nabiktima sa dili perpekto, hakog, o pintas nga mga tawo.

2. Panahon ug Wala Damhang Panghitabo. Ang mga tawo sagad mag-antos “kay ang panahon ug ang wala damhang panghitabo modangat kanilang tanan.” (Ecclesiastes 9:11) Sa ato pa, mahitabo usahay ang aksidente kay ang mga tawo naa sa sayop nga lugar ug panahon, o wala sila mag-amping o kaha nakahimo silag mga sayop.

3. Ang Daotang Magmamando sa Kalibotan. Ang Bibliya klarong naghisgot sa pangunang hinungdan sa pag-antos. Kini nag-ingon: “Ang tibuok kalibotan nailalom sa gahom sa usa nga daotan.” (1 Juan 5:19) Kanang “usa nga daotan” mao si Satanas nga Yawa. Siya anghel sa Diyos kaniadto pero “wala mobarog sa kamatuoran.” (Juan 8:44) Ang ubang anghel miduyog kang Satanas ug mirebelde sa Diyos tungod sa ilang hakog nga tinguha, nga naghimo sa ilang kaugalingon ingong mga demonyo. (Genesis 6:1-5) Sukad sa ilang pagrebelde, si Satanas ug ang iyang mga demonyo naggamit sa ilang gahom sa pag-impluwensiya sa mga kalihokan sa kalibotan. Tinuod kini sa atong panahon. Karon, ang Yawa dunay dakong kasuko ug “nagpahisalaag sa tibuok gipuy-ang yuta,” nga miresultag pag-antos. (Pinadayag 12:9, 12) Busa, si Satanas maoy pintas nga magmamando. Malipay siyang makita nga nag-antos ang tawo. Si Satanas—dili ang Diyos—ang nagpahinabog pag-antos.

HUNAHUNAA KINI: Ang way kaluoy, mamumuhat ug daotan lang ang magpahinabog pag-antos sa inosenteng mga tawo. Sa kasukwahi, ang Bibliya nag-ingon: “Ang Diyos gugma.” (1 Juan 4:8) Tungod sa iyang gugma, “ang matuod nga Diyos dili gayod mobuhat ug daotan, ug ang Labing Gamhanan dili gayod mohimog sayop nga binuhatan!”—Job 34:10.

Pero tingali mangutana ka, ‘Unsa ka dugay nga tugotan sa Diyos ang daotang pagmando ni Satanas?’ Base sa atong nasayran, gidumtan sa Diyos ang pagkadaotan ug siya nasakitan pag-ayo sa atong mga pag-antos. Dugang pa, ang Bibliya nag-awhag: “Itugyan kaniya ang tanan ninyong kabalaka, kay gimahal mo niya.” (1 Pedro 5:7) Gihigugma ta sa Diyos ug siya dunay gahom sa pagwagtang sa tanang pag-antos ug inhustisya, sumala sa hisgotan sa sunod nga artikulo. *