Lisod mangitag nindot nga regalo, kay ang bili sa regalo nagdepende sa hatagan. Ug kon unsay kinanindotan nga regalo para sa usa basin dili nindot para sa uban.

Pananglitan, tingali para sa usa ka tin-edyer, ang kinabag-ohang gadyet mao ang kinamaayohang regalo. Pero para sa hamtong, tingali ang kinamaayohang regalo mao kanang dunay sentimental value, sama sa butang nga panulondon sa pamilya. Sa ubang kultura, mas gusto nila nga kuwarta ang iregalo kanila, kay makabuot sila kon asa nila kini gamiton o kon unsay ilang paliton.

Bisag lisod, daghang tawo maningkamot gihapon sa pagpangitag kinamaayohang regalo para sa ilang minahal. Pero dunay mga butang nga makatabang nimo aron makakita kag nindot nga regalo. Atong konsiderahon kon unsa kini.

Ang gusto sa imong regalohan. Usa ka lalaki sa Belfast, Northern Ireland, miingon nga ang bisikleta nga panglumba nga gihatag kaniya sa 10 o 11 anyos pa siya mao ang kinanindotang regalo nga iyang nadawat. Ngano? “Kay gusto kaayo ko adto,” miingon siya. Sa ato pa, maapresyar sa usa ka tawo ang regalo kon siya ganahan niana. Busa hunahunaa kon unsay gusto sa imong regalohan. Hunahunaa kon unsay importante kaniya, kay ang butang nga importante niya maoy iyang pangandoyon. Pananglitan, importante sa mga lolo ug lola nga makauban ang ilang pamilya. Tingali gusto nilang makita kanunay ang ilang mga anak ug apo kon mahimo. Busa mas maapresyar nila ang pagbakasyon uban sa pamilya kay sa bisan unsang regalo.

Aron mahibaloan kon unsay gusto sa usa ka tawo, paminaw kaniya. Ang Bibliya nagdasig nato nga “magmaabtik sa pagpaminaw, magmahinay sa pagsulti.” (Santiago 1:19) Samtang makig-estorya ka sa imong mga higala o paryente, paminawg maayo kon unsay ilang mga gusto o dili gusto. Sa ingon, mahibalo ka kon unsang regalo ang makapalipay nila.

Ang gikinahanglan sa imong regalohan. Bisag unsa pa ka simple ang regalo, maapresyar ni pag-ayo sa nakadawat kon kini iyang gikinahanglan.  Pero unsaon nimo pagkahibalo kon unsay gikinahanglan sa imong regalohan?

Tingali ang kinasayonang paagi mao ang pagpangutana niya kon unsay iyang gikinahanglan o kon unsay iyang gusto. Pero kadaghanan niadtong moregalo dili ganahan niana nga paagi kay gusto nilang masorpresa ang ilang regalohan. Dugang pa, ang uban tingali mosulti sa ilang mga gusto ug dili gusto, pero maulaw silang mosulti kon unsay ilang gikinahanglan.

Busa paniid ug konsideraha kon unsay kahimtang sa imong regalohan. Bata ba siya, tigulang, dili minyo, minyo, diborsiyado, biyuda o biyudo, empleyado, o retirado? Dayon hunahunaa kon unsang mga regalo ang haom sa iyang panginahanglan.

Aron mahibalo ka kon unsay iyang panginahanglan, pangutana sa uban nga parehas niyag kahimtang. Tingali makasulti sila nimo kon unsa gyoy gikinahanglan sa imong regalohan nga sagad wala mahibaloi sa uban. Sa ingon, makahatag kag regalo nga mao gyoy iyang gikinahanglan nga wala mahunahunai sa uban.

Ang hustong panahon. Ang Bibliya nag-ingon: ‘Ang usa ka pulong sa hustong panahon, Oh pagkamaayo!’ (Proverbio 15:23) Kini nga teksto nagpakita nga ang atong mga pulong nga isulti sa hustong panahon dakog mahimo. Parehas pod kini sa atong mga lihok. Sama nga ang mga pulong nga isulti sa hustong panahon makapalipay sa maminaw, ang regalo nga ihatag sa hustong panahon o okasyon makapalipay sa makadawat niini.

Kasal sa usa ka higala, graduwasyon sa usa ka batan-on, hapit nang makabatog anak ang usa ka magtiayon​—kini maoy pipila ka okasyon diin manghatag kag regalo. Ang uban maghimog listahan sa espesyal nga mga okasyon sa umaabot nga tuig. Niining paagiha, sila makaplano kon unsay angayng iregalo sa matag okasyon. *

Siyempre, dili ka manghatag panahon lang sa espesyal nga mga okasyon. Mobati kag kalipay sa paghatag sa bisan unsang panahon. Apan dunay angayng bantayan. Pananglitan, kon ang lalaki mohatag ug regalo sa usa ka babaye bisag walay katarongan, basig maghunahuna ang babaye nga nakagusto niya ang lalaki. Gawas kon duna gyoy tinuod o hustong intensiyon, ang paghatag ug regalo basig masaypan ug sabot. Busa kinahanglang palandongon ang laing importanteng butang​—ang motibo sa mangregalo.

Ang motibo sa mangregalo. Sama sa gipakita sa nahisgotan na nga mga pananglitan, maayong konsiderahon kon masaypan bag sabot sa hatagan ang motibo sa maghatag. Maayong susihon sab sa mangregalo ang iyang motibo. Ang uban magtuo nga maayo ang ilang motibo sa paghatag, pero daghan ang mangregalo kay napresyur sila sa paghatag. Ang uban pod manghatag kay gusto sila nga mahatagag espesyal nga pagtagad o makadawat ug balos.

Unsay imong himoon aron maseguro nga maayo ang imong motibo sa pagregalo? Ang Bibliya nag-ingon: “Himoa ang tanan ninyong kalihokan uban ang gugma.” (1 Corinto 16:14) Kon mohatag ka tungod sa gugma ug kahingawa, ang imong regalo makapalipay, ug ikaw nga nanghatag mas malipay. Kon kinasingkasing ka nga mohatag, mapalipay sab nimo ang atong langitnong Amahan. Gidayeg ni apostol Pablo ang mga Kristiyano sa karaang Corinto kay sila malipayong nanghatag ug hinabang para sa ilang isigka-Kristiyano sa Judea. Si Pablo miingon kanila: “Gihigugma sa Diyos ang malipayong maghahatag.”​—2 Corinto 9:7.

Ang pagkonsiderar sa mga punto nga ato nang nahisgotan dakog mahimo aron mapalipay nimo ang imong regalohan. Kini nga mga punto​—ug ang uban pa—​dakog papel sa gihimong kahikayan sa Diyos aron ang mga tawo makadawat sa kinamaayohang regalo sa tanan. Palihog basaha ang sunod nga artikulo aron mahibalo ka kon unsa ang kinamaayohang regalo gikan sa Diyos.