Duna bay Katarongan nga Molaom?

“Usa ka suliran sa daghag-kalisdanan nga mga kaminyoon mao ang hugot nga pagtuo nga ang mga kahimtang dili na moarang-arang. Ang maong pagtuo makapugong sa kausaban tungod kay maghikaw kini kanimo sa panukmod nga mosulay ug bisan unsang butang nga makaamot sa kauswagan.”—DR. AARON T. BECK.

HANDURAWA nga ikaw nag-antos sa kasakit ug miadto sa doktor aron magpahiling. Ikaw mabalak-on​—ug masabtan kon ngano. Kon buot hunahunaon, ang imong panglawas​—bisan ang imong kinabuhi mismo​—mahimong nameligro. Apan ingnon ta nga human sa eksaminasyon, gisulti sa doktor kanimo ang maayong balita nga bisan tuod ang imong sakit grabe, kini mahimong matambalan. Sa pagkatinuod, giingnan ka sa doktor nga kon mosunod ka lang pag-ayo sa usa ka makataronganong programa sa pagkaon ug ehersisyo, makadahom ka nga maulian sa bug-os. Sa walay duhaduha mahupayan ka pag-ayo ug andam nga mosunod sa iyang tambag!

Itandi kining maong kahimtang sa atong gihisgotan. Nagmagul-anon ka ba sa imong kaminyoon? Siyempre, ang tanang kaminyoon dunay mga suliran ug mga panagsumpakiay. Busa ang pagkaagom sa pipila lamang ka kalisdanan diha sa inyong relasyon wala magpasabot nga walay gugma ang inyong kaminyoon. Apan komosta kon ang makapaguol nga kahimtang magpadayon sulod sa mga semana, mga bulan, o bisan mga tuig? Kon mao, angay kang mabalaka, kay dili kini gamayng butang. Sa pagkatinuod, ang kalidad sa imong kaminyoon makaapektar sa halos tanang bahin sa imong kinabuhi​—ug nianang sa imong mga anak. Pananglitan, gituohan nga ang kalisdanan sa kaminyoon mahimong dakong hinungdan sa mga suliran sama sa depresyon, menos nga kaepisyente diha sa trabahoan, ug pagkamugbog grado sa mga bata diha sa tunghaan. Apan dili lang kay kana ra. Ang mga Kristohanon nahibalo nga ang relasyon nila sa ilang kapikas makaapektar sa ilang relasyon uban sa Diyos.​—1 Pedro 3:7.

Ang kamatuoran nga dunay mga suliran tali kanimo ug sa imong kapikas wala magpasabot nga walay paglaom ang kahimtang. Ang pag-atubang sa tinuod nga kahimtang sa kaminyoon​—nga dunay mga suliran​—makatabang sa magtiayon sa paglantaw sa ilang mga suliran sa realistikong paagi ug sa pagpaningkamot nga masulbad kini. Usa ka bana nga ginganlag Isaac miingon: “Wala ko maghunahuna nga normal sa mga magtiayon nga dunay mga panahon sa kalipay ug kagul-anan panahon sa ilang kaminyoon. Abi nakog dunay suliran sa among kaugalingon mismo!”

Bisan pag ang imong kaminyoon nakaabot sa punto nga milubad na ang gugma, kini mahimong maluwas. Itugot ta, ang emosyonal nga mga samad nga moresulta gumikan sa gubot nga relasyon laglom tingali, ilabina kon ang mga suliran nagpadayon sulod sa katuigan. Sa gihapon, dunay lig-ong katarongan nga molaom. Ang panukmod maoy hinungdanong butang. Bisan ang duha ka tawo nga dunay seryosong mga suliran sa  kaminyoon makapaarang-arang niini kon kini hinungdanon kanilang duha. *

Busa pangutan-a ang imong kaugalingon, ‘Unsa ka lig-on ang akong tinguha nga makakab-ot ug makapatagbawng relasyon?’ Ikaw ba ug ang imong kapikas andam nga maningkamot sa pagpauswag sa inyong kaminyoon? Si Dr. Beck, nga gikutlo sayosayo pa, nag-ingon: “Kasagaran matingala ako nga ang usa ka dayag nga dili maayong relasyon matabangan sa dihang ang mga magtiayon magtambayayongay sa pagtul-id sa mga kakulangan ug sa pagpalig-on sa positibong mga hiyas sa ilang kaminyoon.” Apan komosta kon ang imong kapikas magpanuko sa pagpakigtambayayong? O komosta kon siya daw dili magtagad sa kamatuoran nga dunay suliran? Wala bay kapuslanan kon ikaw ra ang maningkamot nga moarang-arang ang kaminyoon? Dili gayod! “Kon ikaw mohimog pipila ka kausaban,” matod ni Dr. Beck, “kini mismo mahimong magpatunghag mga kausaban diha sa imong kapikas​—subsob kaayong mahitabo kini.”

Ayaw dayon paghinapos nga dili kini mahitabo sa imong kahimtang. Ang negatibong tinamdan mahimong mao mismo ang kinadak-ang kapeligrohan sa imong kaminyoon! Ang usa kaninyo kinahanglang mohimo sa unang lakang. Mahimo bang ikaw kana? Sa dihang masugdan na kini, basin masabtan sa imong kapikas ang kaayohan sa pagpakigtambayayong kanimo diha sa pagtukod ug mas malipayong kaminyoon.

Busa, unsay imong mahimo​—ingong indibiduwal o kaha ingong magtiayon​—aron maluwas ang inyong kaminyoon? Ang Bibliya maoy gamhanang tabang sa pagtubag niining pangutanaha. Susihon nato kon sa unsang paagi.

[Footnote]