Mga Pagtulon-ang Nakat-onan Gikan sa Kaagi ni Loida

ANG artikulong “Ang Pagbiya ni Loida sa Pagkaamang” (Mayo 8, 2000) nagpatunghag mga sanong gikan sa among mga magbabasa sa daghang dapit. Daghang kasingkasing ang natandog sa dulot nianang tinuod nga estorya sa usa ka batan-ong babaye nga nasakit sa cerebral palsy nga dili makasulti hangtod nga siya 18 anyos na. Ang mosunod maoy pipila sa mga komentong nadawat.

“Walay hunong ang akong paghilak sa nabasa ko ang mga mensahe ni Loida ngadto sa iyang pamilya sa dihang sa kataposan siya nakasulti na. Ang iyang kaisog ug kalig-on bisan pa sa lisod niyang kahimtang maoy mga butang nga paningkamotan kong masundog.”​—K. G.

“Ekselente ang akong panglawas, apan usahay moreklamo ako bahin sa nagkalainlaing mga butang. Human sa pagbasa mahitungod kang Loida, militok akog usa ka pag-ampo kang Jehova, nga nangayog pasaylo tungod sa dili pagpabili sa akong nabatonan.”​—R. H.

“Niadtong 1980 ang akong manghod nga lalaki natawong may daghang suliran sa panglawas, lakip ang cerebral palsy, ug siya dili makasulti. Kining kasinatiana nagdasig sa among pamilya nga dili gayod mosurender, bisan kon unsa ka lisod tingali ang kahimtang.”​—L. W.

“Ako 14-anyos nga dalagita, ug ako naghunahuna kanunay nga ako lamang ang may mga suliran. Gusto kong makita si Loida nga mamaayo na ug makigsulti kaniya sa Paraiso. Siya usa sa mga tawo sa akong listahan nga akong himamaton ug himoong mga higala sa walay kataposan.”​—R. K.

“Kining artikuloha nakapatandog sa akong kasingkasing. Ako kinahanglang mag-antos sa tanang matang sa mental ug emosyonal nga mga sakit. Ang pagbasa mahitungod sa kon unsa ka dako gayod ang paghinamhinam ni Loida sa bag-ong kalibotan sa Diyos naghimo kanako nga labi pang matinguhaon nga maatua didto.”​—P. B.

“Ako usab may cerebral palsy, apan dili ako maglisod sa pagsulti. Kining artikuloha nagpaila kanako nga si Jehova makakita sa tanan nga masinati nato ug magpabili sa matag usa kanato tungod sa kon unsay ikaamot nato matag usa sa pag-alagad kaniya.”​—D. J.

“Labing nakapatandog kanako mao ang pagbasa kon sa unsang paagi si Loida nagpahinungod sa iyang kinabuhi kang Jehova sa linghod nga panuigon ug usab sa iyang pagpakigbahin sa buluhatong pagsangyaw. Kadtong mas lig-on ug lawas kanato makakat-on gikan kang Loida sa daghang paagi.”​—A. R.

“Ang kasinatian ni Loida naghimo kanako nga manlimbasog nga mas maghunahuna sa uban ug sa kon unsay akong mahimo alang kanila. Dili ko gayod sayonsayonon lamang ang akong pribilehiyo sa pagkamakaarang sa pagsulti sa uban mahitungod kang Jehova nga Diyos.”​—B. M.

“Pagkatalagsaong artikulo! May kaila kaming usa ka magtiayon sa duol nga kongregasyon nga adunay anak babaye nga may cerebral palsy. Akong padalhan silag kard karong adlawa sa pagpahibalo kanila nga gipabilhan ko sila ug ang tanang ginahimo nila alang kaniya.”​—T. G.

“Sa dihang bation ko ang depresyon, usahay ako mahimong hakog, apan si Loida may linaing kaikag sa uban. Kana ang gipaningkamotan ko sa pagbuhat. Kinahanglan usab nga ako mas manlimbasog pa nga mahisama kang Loida ug mag-ampo kang Jehova sa dihang bation ko ang kaluya.”​—N. D.

“Ako 14 anyos, ug ako hubakon. Usahay makahunahuna ko nga ang akong sakit mao ang kinagrabehan, apan sa pagbasa niining kasinatiana, akong nasayran nga kana dili tinuod. Salamat niining makapasubo apan sa samang panahon makalipayng kasinatian nga mohatag kanatog paglaom.”​—M. C.