Ang Hunahuna sa Bibliya

Makalipay ba ang Pagsimba sa Diyos?

“NAGTUO ako ug nahigugma sa Diyos,” misulat ang usa ka nag-angkong Kristiyano. “Apan . . . makalaay ang pagsimba.” Ingon ba usab niana ang imong gibati? Ang tinuod mao nga ang pagkalaay, pagkawalay katagbawan, ug kahigawad nakatukmod sa uban sa pag-imbento ug ilang kaugalingong mga paagi sa pagsimba sa Diyos.

Usa ka mantalaan dili pa dugay miingon nga daghang tawo karon nagmugna ug ilang kaugalingong matang sa pagsimba. Apan alang niadtong nagtinguha nga magmalipayon sila sa ilang pagsimba sa Diyos, kining matanga sa pagsimba dili makalipay. Ngano? Tungod kay dag-on ra usab sila sa kahigawad nga nagtukmod kanila sa pagpalayo gikan sa ilang mga relihiyon.

Tungod niini, ang pangutana motungha, Ang pagkinabuhi ba sumala sa pagtulon-an sa Bibliya makalaay, dili makalipay? Makalipay! Pananglitan, matikdi ang mga pulong sa usa ka salmista sa Bibliya: “Dali kamo, manghugyaw kita sa kalipay kang Jehova! . . . Oh dali kamo, mosimba kita ug moyukbo; moluhod kita sa atubangan ni Jehova nga atong Magbubuhat.”​—Salmo 95:1, 6.

Laing salmista sa Bibliya miawit ngadto kang Jehova nga puno sa pagdayeg: “Ikaw lamang ang Labing Hataas ibabaw sa tibuok nga yuta.” Diha sa Kasulatan, si Jehova gitawag nga “malipayong Diyos,” ug ang iyang mga magsisimba kaniadto ug karon kanunayng nagapahayag ug kalipay.​—Salmo 83:18; 1 Timoteo 1:11.

Ang Basehanan sa Kalipay

Kita magmalipayon gayod sa atong pagsimba kon mahibalo kita kon unsay nahimo ni Jehova sa pagpasundayag sa iyang gugma alang kanato. Ug unsa man kana? “Gihigugma pag-ayo sa Diyos ang kalibotan [katawhan] nga gihatag niya ang iyang bugtong nga Anak [si Jesu-Kristo], aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.”​—Juan 3:16.

Busa, sama sa giingon sa Bibliya, kabubut-on sa Diyos nga ang “tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Timoteo 2:3, 4) Sa ato pa, labaw pa ang gikinahanglan kay sa pagkahibalo lang ug pipila ka teksto sa Bibliya. Kinahanglang ‘sabton’ nato ang atong gibasa, nga nagkinahanglan ug ganid, tininuod nga pagtuon. (Mateo 15:10) Ang ganti mao kini: “Imong makaplagan ang mismong kahibalo sa Diyos.” Dili ba makapalipay gayod kana?​—Proverbio 2:1-5.

Ingon niana nga kalipay ang gibati sa mga tawo sa siyudad sa Berea sa Macedonia niadtong unang siglo. Sa dihang gitudloan sila ni apostol Pablo sa pulong sa Diyos, ‘ilang gidawat ang pulong uban  ang tumang kaikag sa hunahuna, nga nagsusi pag-ayo sa Kasulatan adlaw-adlaw kon tinuod ba kining mga butanga.’ Dili unta sila ingon niana ka maikagon kon makalaay pa o dili makalingaw ang ilang pagtuon sa Kasulatan.​—Buhat 17:11.

Si Jesus miingon: “Malipayon kadtong gigutom ug giuhaw sa pagkamatarong, sanglit sila pagabusgon.” (Mateo 5:6) Sama sa mga tawong gigutom nga regular na nga makakaon, daghan karon ang nangalipay kay busog na sila sa espirituwal nga pagkaon. Busa, sama sa mga taga-Berea, “daghan kanila ang [nangahimong] mga magtutuo.”​—Buhat 17:12.

Dalan sa Kinabuhi

Gisubay sa matuod nga mga magsisimba sa unang siglo ang “Dalan,” nga usa ka termino nga gigamit diha sa Buhat 9:2 nga nagpunting sa bag-ong dalan sa kinabuhi nga gisubay sa unang mga Kristohanon. Karon, kinahanglang mao usab kanay buhaton niadtong buot nga magmalipayon sa pagsimba sa Diyos. Kinahanglang ilang tugotan ang kamatuoran sa Bibliya sa pag-impluwensiya sa ilang kaisipan ug sa ilang adlaw-adlaw nga paggawi.

Busa, gitambagan ni apostol Pablo ang mga tawo sa Efeso: ‘Hukasa ang daan nga pagkatawo nga nahiuyon sa kanhi ninyong paagi sa panggawi.’ Apan, labaw pa niana ang gikinahanglan, kay si Pablo mipadayon: ‘Isul-ob ang bag-ong pagkatawo nga gilalang sumala sa kabubut-on sa Diyos sa matuod nga pagkamatarong ug pagkamaunongon.’​—Efeso 4:22-24. a

Sa dihang kita mosanong nianang tambaga, nga maghimog mga kausaban sa atong kinabuhi nga nahiuyon sa kabubut-on sa Diyos, kita makabaton ug dakong katagbawan ug kalipay. Ngano man? Si Pablo misulat ngadto sa mga Kristohanon sa Colosas nga sila kinahanglang mag-usab sa ilang kinabuhi ‘aron makalakaw nga takos kang Jehova aron bug-os nga makapahimuot kaniya.’ (Colosas 1:10) Sa tinuod, ang pagkasayod nga nalipay ang Diyos sa atong pagkinabuhi maoy usa na ka rason sa pagkalipay! Dugang pa, ang Diyos naghimog paagi aron kita makapahimuot kaniya sa “bug-os.” Sa unsang paagi? Pinaagi sa pagpasaylo.

Kitang tanan makasala, busa kitang tanan nagkinahanglan ug pasaylo sa Diyos. “Si Kristo Jesus mianhi sa kalibotan aron sa pagluwas sa mga makasasala,” matod pa ni Pablo, nga narekord diha sa 1 Timoteo 1:15. Sa dihang gihalad ni Jesus ang iyang kinabuhi alang kanato, iyang gipaposible nga mapasaylo ang atong mga sala. Busa, ang matuod nga magsisimba mahupayan, kay ang bug-at nga palas-anon sa pagbati nga sad-an natangtang na gikan sa iyang kasingkasing. Siya makabaton ug hinlo nga konsensiya ug siya magmalipayon kay siya nasayod nga kon kinasingkasing nga motuman siya sa kabubut-on sa Diyos, ang iyang mga sala mapasaylo.

Dugang Rason sa Pagkalipay

Sa dihang mosugod na ang usa sa pagsimba sa matuod nga Diyos, siya dili mag-inusara. Ang salmista sa Bibliya nga si David nagsulat: “Nagmaya ako sa pag-ingon nila kanako: ‘Mangadto kita sa balay ni Jehova.’” (Salmo 122:1) Sa pagkatinuod, ang regular nga pagtambong uban sa matuod nga mga magsisimba makahatag kanato ug dugang kalipay.

Human makatambong sa tigom sa mga Saksi ni Jehova, usa ka lalaki misulat: “Kami giabiabi sa pagkamaluloton ug pagkamatinabangon nga maoy timaan nga suod ang tanan nga nanambong. Ang kaligdong ug kaugdang sa daghan kaayong batan-on nakahatag ug dakong garbo kanila ug sa ilang mga ginikanan. Buot kong ipahayag ang akong pasalamat nga ako nadapit sa ingon niini nga panag-ubanay nga makapatandog ug makapalipay kaayo.”

Ikaw usab mahimong magmalipayon sa pagsimba kang Jehova, sama kang David sa kanhiayng panahon. “Alagara si Jehova uban ang pagmaya,” siya miawhag. “Duol kamo sa iyang atubangan uban ang hugyaw sa kalipay.” (Salmo 100:2) Ang tanang nag-alagad sa matuod nga Diyos nga may husto nga motibo magmalipayon gayod sa ilang pagsimba.

[Footnote]

NAKAPAMALANDONG KA BA?

◼ Unsa ang basehanan sa matuod nga pagsimba?​—1 Timoteo 2:3-6.

◼ Nganong makahatag kanato ug kalipay ang halad lukat ni Kristo?​—1 Timoteo 1:15.

◼ Sa unsang paagi ang Kristohanong mga tigom makahatag kanato ug kalipay sa pagsimba?​—Salmo 100:1-5.

[Hulagway sa panid 10]

Ang pagduyog sa uban sa pagtuon sa Bibliya makapalipay kaayo