Planta sa Koryente Gihimong Kingdom Hall

TINAMPO SA MAGSUSULAT SA PAGMATA! SA ITALYA

◼ Sa unang bahin sa katuigan sa 1900, daghang industriya ang gipanukod diha sa kabukiran sa Pistoia, Italya. Aron mahatod ang gamitonong mga materyales ug ang nahuman nga mga produkto, dihay riles sa tren nga gitukod. Giinagurahan sa Hunyo 21, 1926, ang hiktin nga riles nag-ekis-ekis diha sa kabungtoran ug kabukiran duolan sa 15 kilometros.

Ang tren gipaandar sa koryente gikan sa gamayng planta (wala sa ibabaw). Apan sa ulahi, tungod sa pagmenos sa biyahe, kini gisira niadtong 1965. Apan unsay gihimo sa mga bilding nga gipanukod sa daplin sa riles? Ang pipila nangaguba; ang uban gihimong mga bar ug mga pondohanan sa mga bus.

Ang gamayng planta sa koryente giayo. Niadtong 1997 gipalit kini sa Asosasyon sa mga Saksi ni Jehova sa San Marcello Pistoiese ug gihimong usa sa nindot kaayong mga Kingdom Hall sa Tuscany (wala sa ubos). Ang mga sakop sa kongregasyon nga nagtigom niining bilding nga kaniadto planta sa koryente puliki nga “nagasidlak ingong mga magbabanwag” niini nga kabukiran, nga nagwali sa maayong balita sa Gingharian sa Diyos. (Filipos 2:15; Mateo 24:14) Oo, ang planta nga kaniadto naghatod ug koryente gigamit na karon sa pagpadan-ag ug espirituwal nga kahayag.—Mateo 5:14-16; 28:19, 20.