Nganong Ania man Kita Dinhi?

ANG Bibliya nag-ingon nga si Jehova nga Diyos mao ang labing intelihente. Siya ang Tinubdan sa tanang puwersa sa uniberso ug ang Maglalalang niini. (Salmo 83:18; 92:5) Ang unang kapitulo sa Bibliya nag-ingon: “Sa sinugdan gilalang sa Diyos ang mga langit ug ang yuta.” Human niadto, ang Diyos nagbuhat sa tawo sumala sa iyang “larawan”—sa ato pa, may mga hiyas nga sama sa iyaha—ug gisugo sa Diyos ang tawo sa pagsanay ug sa pagpuno sa yuta.—Genesis 1:1, 26, 28.

Nagpasabot ba kini nga ang katuyoan sa Diyos sa paglalang sa uniberso, lakip sa yuta ug sa daghang hayop ug tanom, maoy aron lamang sa pagsuportar sa mga panginahanglan sa tawo? Kita ba ania dinhi aron lang magkinabuhi sa pipila ka dekada, mokaon, moinom, ug magpatunghag mga liwat?

Nganong Gilalang man Kita sa Diyos?

Gilalang ni Jehova nga Diyos ang tawo tungod sa iyang gugma—buot niya nga ang tawo mabuhi ug malipay. Walay duhaduha nga gibati sa Diyos ang dakong kalipay sa dihang iyang giumol ang tanang matang sa kalalangan aron ang tawo malibotan sa katahom ug kadagaya. Labaw sa tanan, buot sa Maglalalang nga ang tawo masuod kaniya, nga sa ato pa makaila ug moduol kaniya. Sila gilalang aron mabuhi sa walay kataposan diha sa hingpit ug malinawong mga kahimtang.—Genesis 3:8, 9; Salmo 37:11, 29.

Gihatagan usab ni Jehova ang tawo ug makapatagbaw ug hinungdanong buluhaton. Giingnan sa Diyos ang unang mga tawo: “Magmabungahon ug magdaghan kamo ug pun-a ang yuta ug gamhi kini, ug pagabut-i ang mga isda sa dagat ug ang nagalupad nga mga linalang sa kalangitan ug ang matag buhing linalang nga nagalihok diha sa yuta.” (Genesis 1:28) Oo, ang buluhaton sa unang magtiayon ug sa ilang mga anak mao ang paghimo sa tibuok yuta nga usa ka paraiso nga puno sa kalipay.

Wala matuman dihadiha ang katuyoan ni Jehova. a Apan ang iyang orihinal nga katuyoan alang sa tawo matuman ra unya.—Isaias 46:9-11; 55:11.

Sa pagkakaron, ang pagpangita sa tawo ug katuyoan sa kinabuhi nagpadayag sa iyang tinguha o panginahanglan nga mailhan ug masuod ang Diyos. Ang tawo gilalang ingong intelihenteng linalang nga may tinguha sa pagsusi ug pagsabot sa mga butang. Ug ang Bibliya nag-ingon nga ang tawo magpadayon sa pagkat-on bahin sa Diyos ug sa iyang kalalangan sa walay kataposan.

Usa ka tagsulat sa Bibliya nagpahayag sa katuyoan sa Diyos sa paglalang sa tawo: “Nakita ko ang buluhaton nga gihatag sa Diyos sa mga anak sa mga tawo aron pagabuhaton. Ang tanang butang iyang gihimo nga matahom sa panahon niini. Bisan ang panahong walay tino iyang gibutang sa ilang kasingkasing, aron ang tawo dili makatugkad sa buhat nga nahimo sa matuod nga Diyos sukad sa sinugdan hangtod sa kataposan. Nasayran ko nga walay mas maayo alang kanila kay sa pagmaya ug sa pagbuhat ug maayo samtang buhi pa; ug usab nga ang matag tawo mokaon ug moinom ug magpahimulos ug maayo sa tanan niyang kahago. Kini ang gasa sa Diyos.” (Ecclesiastes 3:10-13) Busa wala gayoy kinutbanan ang makat-onan sa tawo bahin sa Diyos ug sa iyang kalalangan.

Pagkat-on Bahin sa Diyos

Ikaw makakat-on bahin kang Jehova pinaagi sa pagsusi sa iyang kalalangan. Usa ka magsusulat sa Bibliya miingon nga ang “dili-makita nga mga hiyas [sa Diyos], nga mao ang iyang walay kataposang gahom ug pagka-Diyos, tin-awng makita sukad sa paglalang sa kalibotan padayon, tungod kay kini sila maila pinaagi sa mga butang nga gihimo.” (Roma 1:20) Oo, dayag diha sa kalalangan ang dakong gugma, kaalam, ug gahom ni Jehova.

 Ang laing kasaligang tinubdan sa impormasyon bahin sa Diyos mao ang Bibliya. Daghan kitag makat-onan bahin sa mga panghunahuna, hiyas, ug katuyoan ni Jehova diha sa maong inspiradong basahon kay sa basta pagsusi lamang sa iyang kalalangan.

Ang Bibliya nag-ingon bahin sa katuyoan sa Diyos: “Kon bahin sa mga langit, iya ni Jehova ang mga langit, apan ang yuta iyang gihatag sa mga anak sa mga tawo.” (Salmo 115:16) Dayag nga sa tibuok uniberso, ang yuta lamang ang bugtong dapit nga kapuy-ag tawo, kay kana gilalang ni Jehova alang sa maong katuyoan.

Busa, unsay ikasulti bahin sa way-kinutobang uniberso? Ang tuyo lang ba sa mga kabituonan sa atong uniberso maoy sa pagbalanse sa atong sistema solar aron magpadayon ang kinabuhi sa yuta? O ang tuyo niini mao lang ang pagpatahom sa kalangitan panahon sa kagabhion? Daghan pa gayod kitag mga butang nga wala masayri. Apan maayo ra usab kana! Ngano?

Bisag mabuhi kita hangtod sa hangtod, dili gayod nato matugkad ang tanang nahimo sa Diyos ug ang iyang katuyoan niana. Gusto niya nga walay kataposan ang atong pagkat-on bahin sa iyang mga linalang ug nga kita magmalipayon hangtod sa hangtod. Ang walay-kataposan ug malipayong kinabuhi sa yuta mohatag kanatog daghang kahigayonan sa pagkat-on ug mas pa gayod bahin sa uniberso.

[Footnote]

[Blurb sa panid 9]

Ang tawo gilalang nga intelihente ug may tinguha nga makakat-on

[Mga hulagway sa panid 10]

Gipadayag sa Bibliya nga ang yuta gilalang aron ang tawo magmalipayon