Pagpaniid sa Kalibotan

Ang mga tigdukiduki sa Canada buot masayod sa epekto sa pornograpiya diha sa mga lalaki. “Nagsugod kami sa among pagpanukiduki nga nangitag mga lalaki nga mga bayentehon nga wala gayod makakitag pornograpiya,” miingon ang usa ka membro sa tem, apan “wala gayod kami nakaplagan.”—UNIVERSITY OF MONTREAL, CANADA.

Ang kinatas-ang bilding sa kalibotan, ang Burj Khalifa, giinagurahan didto sa Dubai niadtong Enero. Ang bilding 828 metros ang gihabogon, nga dunay kapin sa 160 ka andana, ug makita gikan sa gilay-ong 95 kilometros.—GULF NEWS, UNITED ARAB EMIRATES.

“Walay kapuslanan ang reporma sa Judaismo kon dili kini mopasignunot sa nagkabag-ong panahon. Dili pa dugay gilakip sa liturhiya niini ang espesyal nga pag-ampo para sa mga tawong nagpaopera sa ilang kinatawo aron mahimong lalaki o babaye.”—THE NEW YORK TIMES MAGAZINE, U.S.A.

Mga Bata nga Dili Makamaong Mosulti

Kon itandi sa mga ginikanan kaniadto, ang mga ginikanan karon wala na kaayoy panahon sa pagpakigsulti sa ilang mga anak panahon sa pagpangaon o sa pagbasa kanila sa dili pa matulog. “Ang mga bata moeskuyla sa primarya nga ang sinultihan samag 18 ka bulang bata ug nagkadaghan ang dili makamaong mosulti ug simpleng mga pulong,” nagtaho ang The Times sa London. Sa Britanya, “18 porsiyento sa mga bata nga nag-edad ug 5 (kapin sa 100,000) dili makamaong mosulti nga base sa ilang edad.” Busa daghang bata kinsa dili makasabot ug simpleng mga instruksiyon o makasulti sa ilang mga panginahanglan ang “morag mga langyaw diha sa klase,” nga dili makasabot kon unsay gihisgotan.

Mga Simbahan sa Ireland Mawad-ag Pari?

“Atong nakita karon nga nagkadiyutay na ang mga pari sa Iglesya Katolika,” nag-ingon ang The Irish Times. Singkuwenta ka tuig kanhi, ang Ireland mao ang kinadaghanag pari. Karon ang pagtaas sa edad sa mga pari sa Ireland nagpasabot nga sa dili madugay, dihang kining mga paria moretiro na sa edad nga 75, ang ubang mga parokya mawad-an nag pari. Ang uban miingon nga nagsugod ang kakulang ug pari dihang gipakanaog ang desisyon nga nagdili sa artipisyal nga pagpugong sa pagpanganak. Ang maong desisyon gilakip diha sa 1968 nga sulat sa papa para sa tanang obispo nga gitawag ug Humanae Vitae. Kana nga sulat sumala pa sa Times, maoy hinungdan nga “ang mga tawo misugod pagkuwestiyon sa mga pagtulon-an sa Simbahan” ug “nawad-ag pagsalig sa mga lider sa simbahan.”

Ang Magnetikong North Miirog

Sa dihang ang magnetikong North Pole natultolan niadtong 1831, didto kini sa amihanang Canada, “mga 2,750 kilometros gikan sa eksaktong lugar sa North Pole,” nag-ingon ang mantalaan sa Pransiya nga Le Figaro. Hangtod sa 1989, ang magnetikong north nagkaduol sa aktuwal nga North Pole sa distansiya nga 5 ngadto sa 15 kilometros sa usa ka tuig. Sumala pa sa Paris Institute of Global Physics, ang magnetikong north nag-irog karon ug “mga 55 kilometros sa usa ka tuig ug sa 2007 kini maoy 550 kilometros na lang gikan sa North Pole. Niini nga gikusgon ug direksiyon, gibanabana nga pagka-2020, ang aurora borealis, o northern lights, nga monunot sa magnetikong north “mas klaro ibabaw sa Siberia kay sa Canada,” nag-ingon ang mantalaan.