Hinungdanon ang igong pahulay. “Mas maayo pa ang usa ka hakop nga pahulay kay sa duha ka hakop nga kahago ug paggukod sa hangin.” (Ecclesiastes 4:6) Tungod sa kapuliki ug sa kabaldahan sa kinabuhi karon, menos nag kinatulgan ang mga tawo. Apan ang pagkatulog hinungdanon aron mabatonan ang maayong panglawas. Ang mga pagtuon nagpakita nga panahon sa pagkatulog ang atong lawas ug utok mag-ayom sa kaugalingon niini, nga moresulta sa maayong memorya ug maayong buot.

Ang pagkatulog makapalig-on sa immune system ug manalipod kanato batok sa impeksiyon, diabetes, estrok, sakit sa kasingkasing, kanser, sobrang katambok, depresyon, ug bisan tingali sa sakit nga Alzheimer. Imbes mokaog tam-is, moinom ug kape, o uban pang pawala sa duka, angay kitang matulog. Kadaghanan sa mga hamtong nagkinahanglag pito ngadto sa walo ka oras nga pagkatulog kada gabii aron himsog tan-awon, maayo ang pamati, ug makatrabahog tarong. Ang mga batan-on nagkinahanglag mas taas pa nga pagkatulog. Ang kulag tulog nga mga batan-on mas daling makasinatig sikolohikal nga mga problema ug hayan makatagpilaw samtang magdrayb.

Ang pagkatulog ilabinang hinungdanon kon kita masakit. Ang atong lawas makasukol sa pipila ka balatian, sama sa sip-on, kon mas taas ang atong pagkatulog ug kon kita moinom ug daghang pluwido.

Atimana ang imong ngipon. Ang pagsepilyo ug pag-floss humag kaon, ilabina una matulog, makatabang nga malikayan ang pagkadaot sa ngipon ug lagos ug ang pagkapangag. Kon pangag na ta, lagmit dili na kaayo kita makabenepisyo sa atong gikaon. Gikataho nga ang mga elepante dili mamatay tungod sa katigulangon kondili sa kagutom kay dili na nila mausap pag-ayo ang pagkaon human mangadaot ang ilang ngipon. Ang mga bata nga gitudloan sa pagpanepilyo ug pag-floss humag kaon makabaton ug mas maayong panglawas hangtod sa ilang pagkatigulang.

Pagpatsek-ap sa doktor. Ang pipila ka balatian nagkinahanglag pag-atiman sa doktor. Kon sayong madayagnos ang sakit, sagad mas dali kining matambalan ug mas menos ang gasto. Busa kon maglain ang imong pamati, magpatsek-ap aron mahibaloan ang hinungdan ug matambalan kana, imbes alibyohan lang ang mga simtoma.

Ang regular nga pagpatsek-ap sa kasaligang mga doktor makatabang nga malikayan ang seryosong mga problema. Hinungdanon usab ang pagpahiling sa doktor panahon sa pagmabdos. * Apan, hinumdomi nga ang mga doktor dili makahimog milagro. Ang bug-os nga pagkaayo sa tanan natong balatian mahitabo lamang sa dihang ‘bag-ohon sa Diyos ang tanang butang.’​—Pinadayag 21:4, 5.