Pait ang Inhustisya!

SA 2010, si Michael gipagawas sa prisohan sa Texas, U.S.A. human mapriso sa 27 ka tuig sa kasong pagpanglugos​—krimen nga wala niya buhata. Gipagawas siya kay ang iyang DNA test​—pamaagi nga wala pa kaniadto​—nagpakita nga siya inosente. Nasakpan sa ulahi ang tinuod nga mga kriminal apan dili na makasohan kay lapas na ang panahon nga gitakda sa balaod alang niana nga krimen.

Daghang kriminal nakaikyas sa hustisya. Pananglitan, sa Britain “ang wala masulbad nga mga kaso sa pagpatay midoble sa milabayng dekada, mao nga daghan ang nabalaka kon masulbad ba sa kapolisan ug korte ang grabeng mga krimen,” nagreport ang The Telegraph.

Sa Agosto 2011, ang kapolisan sa Britain naglisod sa pagkontrol sa laing matang sa krimen​—mga pagrayot sa Birmingham, Liverpool, London, ug sa ubang dapit. Ang mga nagrayot nanunog, namuak ug mga bentana sa tindahan, ug nangransak, busa nangadaot ang mga negosyo, balay, sakyanan, ug panginabuhian. Unsay ilang motibo? Kadalo ang motibo sa kadaghanan. Apan sa uban, kini morag maoy ilang reaksiyon sa ilang gituohang mga inhustisya. Ang ubang komentarista miingon nga ang mga nagrayot lagmit maoy mga batan-ong hinikawan nga nagdako sa pobreng mga komunidad ug walay kaugmaon.

Si Job, nga gihisgotan sa Bibliya, miingon: “Ako nagasigeg tuaw alang sa tabang, apan walay hustisya.” (Job 19:7) Karon usab, daghan ang nangitag hustisya apan wala makakaplag niini. Duna ba gayoy makawagtang sa inhustisya? Dili kaha hinanduraw lang ang pagtuo nga mawala kini sa umaabot? Aron matubag kini, kinahanglang atong susihon ang pipila ka hinungdan sa inhustisya.