Pagpaniid sa Kalibotan
“Sa unang bahin sa 2011, 5.4 ka bilyong tawo sa tibuok kalibotan dunay cellphone.”—UN CHRONICLE, U.S.A.
Sa miaging napulo ka tuig, “ang mga kalamidad nakapatay ug kapin sa 780 000, ug linog ang nakaingon sa halos 60% niana.”—THE LANCET, BRITAIN.
“Sa miaging 20 ka tuig, mga 800,000 ang naghikog sa Russia.”—ROSSIISKAYA GAZETA, RUSSIA.
Sa Pilipinas, diin walay diborsiyo, ang gidaghanon sa mga babayeng nag-edad ug 15 ngadto sa 49 nga “nagpuyopuyo . . . , midoble gikan sa 1993 ngadto sa 2008.”—THE PHILIPPINE STAR, PILIPINAS.
Sa Republic of Georgia, “79.2 porsiyento sa populasyon . . . nagsakit tungod sa paghanggap ug aso sa sigarilyo sa uban.” Sa kaulohan, sa Tbilisi, “87.7 porsiyento sa mga bata nagsakit gumikan ini.”—TABULA, GEORGIA.
Medikal nga Turismo sa Asia
Nagkadaghang pasyente sa lainlaing dapit sa kalibotan magpatambal sa ubang nasod sa gamay lang nga gasto apan dekalidad nga serbisyo. Ang Business World nagreport nga sa pagka-2015, usa ka milyong “turista nga magpatambal” ang gidahom nga moabot sa Pilipinas kada tuig, ug maingon-ingon nga gidaghanon ang gidahom nga moabot sa South Korea sa tuig 2020. Ang India, Malaysia, Singapore, ug Thailand maoy popular usab nga mga destinasyon. Dili lang mga taga-Kasadpan ang mangadto sa ubang nasod aron magpatambal sa bukog ug kasingkasing. Daghang sapiang Insek usab magparetoke sa ilang nawong nga magdalag mga letrato sa “mga artista ug mga mag-aawit aron moparehas ang ilang dagway niining mga tawhana,” nag-ingon ang report.
Dili Maayog Agi ang Tawong Magtrabahog Daghan sa Usa ka Higayon
Tungod sa teknolohiya, ang mga empleyado mapugos sa pag-akatar ug duha o kapin pa nga trabaho sa usa ka higayon ug sa pagtubag dihadiha sa mga pangutana. Apan ang “mga empleyado nga nag-akatar ug daghang trabaho sa usa ka higayon dili maayog agi sa trabaho,” miingon si Clifford Nass, direktor sa Communication Between Humans and Interactive Media Laboratory, sa Stanford University, U.S.A. Ang report nag-ingon nga ang mga empleyado nga mag-akatar ug daghang trabaho sa usa ka higayon sagad matensiyon, dili makapokus sa trabaho, dili makahunahunag maayo, ug busa masipyat sa importanteng mga detalye. Si Nass nagsugyot: “Kon duna kay sugdan nga trabaho, kana ray trabahoa sulod sa 20 minutos. Kini magbansay nimo sa pagpokus sa trabaho ug sa paghunahunag maayo.”
