Sumala sa usa ka panukiduki, mga 30 porsiyento sa mga tawong nanabok ug karsada dunay gikalingahan—namatig musika, nakig-estorya sa cellphone, ug uban pa. Ang labing peligroso niini mao ang pag-text. Kadtong nag-text maoy 18 porsiyento nga mas dugayng makatabok, ug 3.9 ka pilo nga mas dakog posibilidad nga dili mosunod sa traffic light, motabok bisag asa, o motabok nga walay tan-aw-tan-aw.

Ang mga babaye sa Nigeria nga gidala sa mga human trafficker ngadto sa Europe gipapanumpa sa mga diwatahan diha sa mga rituwal aron mahadlok sila sa pagtug-an. Aron mosunod ang mga babaye nga himoong sex slave, gipahimuslan sa mga trafficker ang kahadlok niining mga babayhana nga daoton sa mga espiritu.

Dihang ang mga tawo nga dugay nang walay trabaho mangaplay ug trabaho, mga 5 ngadto sa 10 porsiyento kanila dili magbutang diha sa ilang résumé kon unsang kurso ang ilang natapos ug mga trabaho nga ilang nasudlan aron dili sila mahimong sobra ka kuwalipikado sa trabaho nga ilang aplayan.

Ang aso gikan sa sug-angan giisip nga maoy pangunang hinungdan sa kamatayon diha sa kabos nga mga nasod, diin upat ka milyong tawo ang mangamatay kada tuig sa sakit sa baga gumikan sa aso. Ang mga tigpanukiduki nag-ingon nga ang mga kemikal sa aso sa kahoy o uling makamatay sama sa mga hilo sa aso sa sigarilyo.