NAGGAMIT ka bag digital technology? * Daghan ang motubag ug oo, ug duna silay maayong rason. Ang mga electronic device gamit kaayo sa trabaho, sa pagkontak sa uban, ug sa paglingawlingaw.

Apan sama kang Jenni ug Dennis, daghang tawo ang morag dili mabuhi kon wala kini. Pananglitan, ang 20-anyos nga si Nicole miingon: “Ulaw kaayo nga isulti ni, pero dili gyod ko magsilbi kon way cellphone. Magdaladala ko niini kanunay. Maglagot ko kon way signal, ug kon tunga na gani sa oras, tan-awon dayon nako kon may message ba ko. Grabe gyod!”

Ang uban mapulaw ug pagsigeg check sa ilang message ug update. Sila dili mahimutang kon dili sila makadala sa ilang gadyet. Gitawag sa mga tigdukiduki kini ingong pagkaadik—sa bisan unsang matanga sa digital technology o sa Internet o sa usa ka  gadyet, sama sa smartphone. Ang uban dili mogamit ug terminong “pagkaadik.” Mas gusto nila nga tawgon kini ingong problema, dili makontrolar, o obsesyon.

Bisag unsa pay pagtawag niini, ang dili balanse nga paggamit sa digital technology makahatag ug problema. May mga kahimtang nga kini nakadaot sa pamilya. Pananglitan, usa ka 20 anyos nga dalaga nag-ingon: “Wa nay kalibotan si Papa kon unsa nay nahitabo nako. Siya maglingkod sa sala ug magtayp ug e-mail samtang makig-estorya nako. Dili niya mabutang ang iyang cellphone. Seguro gimahal ko ni Papa, pero wa nako na batia.”

Aron matabangan kadtong naadik sa paggamit ug digital technology, ang mga nasod sama sa China, South Korea, United Kingdom, ug United States naghimog mga center nga gitawag ug “digital detox,” diin ang pasyente dili pagamiton ug Internet ug mga gadyet sulod sa daghang adlaw. Pananglitan, si Brett nga usa ka batan-on miingon nga miabot siya sa punto nga 16 ka oras siyang mag-online game kada adlaw. “Kon mag-Internet ko, mora kog nakahithit ug droga,” siya miingon. Pagsulod ni Brett sa digital detox center, siya wala nay trabaho, naglago, ug wala nay higala. Unsay imong himoon aron dili kini mahitabo kanimo?

SUSIHA ANG IMONG PAGGAMIT SA TEKNOLOHIYA. Tan-awa kon unsay epekto sa teknolohiya sa imong kinabuhi. Pangutan-a ang imong kaugalingon niini:

• Dili ba ko mahimutang o sapoton pa gani, kon dili ko makagamit ug Internet o gadyet?

• Mag-Internet ba gihapon ko o mogamit ug gadyet bisag lapas na sa oras nga akong gitagal sa pag-undang?

• Kulang ba kog tulog tungod sa pagsigeg check sa miabot nga mga message?

• Napasagdan na ba nako ang akong pamilya tungod sa paggamit ug digital technology? Uyon kaha sila sa akong tubag niini nga pangutana?

Kon napasagdan na ang “mas hinungdanong mga butang”—lakip ang imong pamilya ug ubang responsibilidad—karon na ang panahon nga magbag-o. (Filipos 1:10) Sa unsang paagi?

PAGTAKDAG MAKATARONGANONG MGA LIMITASYON. Bisan unsang butang, bisag maayo pa, makadaot basta sobra. Busa naggamit ka man ug digital technology para sa negosyo o sa lingawlingaw, pagtakda ug limitasyon kon unsa ka kadugay mogamit niini, ug sunda kini.

Sugyot: Pangayog tabang sa usa ka membro sa pamilya o higala. Ang Bibliya nag-ingon: “Ang duha mas maayo kay sa usa, . . . kay kon ang usa kanila mapukan, ang usa makabangon sa iyang kauban.”—Ecclesiastes 4:9, 10.

Samtang ang bag-ong mga gadyet makapasayon ug makapadali sa pagkuha ug pagpasag impormasyon, seguradong modaghan pa ang mogamit niini sa dili balanseng paagi. Pero ayaw itugot nga mahimong “adiksiyon” ang imong atraksiyon. Pinaagi sa maayong paggamit sa imong panahon, imong malikayan ang dili balanseng paggamit sa digital technology.—Efeso 5:16.