ANG Spain maoy usa ka nasod sa lainlaing katawhan ug kayutaan. Halos tanang bahin sa Spain maoy katrigohan, kaubasan, ug kaolibohan. Sa habagatan, 14 lang ka kilometros ang gilay-on sa Spain gikan sa kontinente sa Africa.

Daghang tawo—sama sa mga taga-Phoenicia, Grego, ug mga taga-Cartago—namalhin niining habagatan-kasadpang bahin sa Europe. Pag-abot sa mga Romano sa ikatulong siglo B.C.E., ilang gitawag ang bag-ong nasakop nga teritoryo ingong Hispania. Dayon ang yuta gisakop sa mga Visigoth ug Moor, silang tanan wala na apan ang ilang kultura nagpabilin.

Niadtong 2015, kapin sa 68 milyones ang mibisita sa Spain. Daghan ang mobisita tungod sa init-init nga  klima, puting mga baybayon, ug sa nindot, makasaysayanhong mga bilding. Ganahan usab ang mga turista sa mga pagkaon sa Spain. Ang kasagarang mga pagkaon mao ang seafood, ham, sinabawan, salad, ug mga utanon nga giluto o sinagolan ug lana sa olibo. Ang omelet, paella, ug tapa sa Spain popular sa tibuok kalibotan.

Ang mga Katsila mahigalaon ug bibohon. Ang relihiyon sa kadaghanan maoy Romano Katoliko, apan diyutay lang ang mosimba. Sa dili pa dugayng katuigan, ang mga tawo sa Africa, Asia, ug Latin America namalhin sa Spain. Daghan kanila malingaw nga makighisgot bahin sa ilang tinuohan ug kultura. Ang kadaghanan kanila maminaw sa mga Saksi ni Jehova ug busa natabangan ang uban sa pagkat-on sa gitudlo sa Bibliya bahin sa nagkalainlaing mga topiko.

Niadtong 2015, kapin sa 10,500 ka mga Saksi ang miboluntaryo sa pagtukod ug pag-ayo sa ilang 70 ka tigomanan nga gitawag ug Kingdom Hall. Ang mga munisipalidad nagtaganag lote sa pipila niini nga proyekto. Aron matabangan ang mga namalhin dinhi, ang mga Saksi ni Jehova nagpahigayon ug mga tigom sa kapig 30 ka pinulongan gawas pa sa Kinatsila. Sa 2016, kapin sa 186,000 ang mitambong sa espesyal nga tigom nga gihimo sa mga Saksi ni Jehova sa paghandom sa kamatayon ni Jesu-Kristo.