Ang pagpihigpihig sagad gibase sa sayop nga impormasyon. Niay pipila ka pananglitan:

• Naay mga tag-iyag kompaniya nga naghunahuna nga dili kaya sa mga babaye ang mga trabaho nga nalangkit ang makinarya o computer.

• Sa Europe, niadtong mga 500-1500 C.E., ang mga Hudiyo giakusahan nga maoy nagbutang ug hilo sa mga atabay ug nagpakaylap ug sakit. Panahon sa Nazi, gipasanginlan na sab sila sa pagkahugno sa ekonomiya sa Germany. Grabe gyod ang ilang giantos, ug bisan karon naa gihapoy nagpihigpihig nila.

• Daghan ang sayop nga nagtuo nga ang tanang baldado magul-anon o dili makadawat sa ilang kahimtang.

Ang mga tawo nga nagtuo nianang bakak nga mga impormasyon lagmit mogamit ug mga pananglitan o gituohang ebidensiya nga morag mosuportar sa ilang pagkamapihigon. Ug naghunahuna sila nga ignorante kadtong dili mouyon nila.

“Ang tawong walay kahibalo dili maayo.”​—PROVERBIO 19:2.

Unsay gipasabot niini? Kon wala ta mahibalo sa tinuod, makahimo tag sayop nga mga desisyon. Kon tuohan nato ang sayop nga impormasyon imbes ang tinuod, masayop ang atong panglantaw sa uban.

Kon nahibalo ta sa tinuod nga impormasyon bahin sa mga tawo, dili dayon ta motuo sa komon pero sayop nga panglantaw bahin kanila. Ug dihang  masayran nato nga dili diay tinuod ang atong nahibaloan bahin sa usa ka grupo sa mga tawo, lagmit susihon sab nato kon sakto ba ang atong panglantaw sa ubang grupo.

• Kon dunay moingon nga ang usa ka grupo sa mga tawo dili maayog batasan, hinumdomi nga dili tanan nianang grupoha ang ingon nianag batasan.

• Hunahunaa nga ang imong nahibaloan bahin sa uban limitado lang.

• Seguroa nga kasaligan ang imong gikuhaan sa impormasyon.