Makapaguol nga pagkatin-edyer nako, misugod paghuyang ang akong suod nga relasyon kang Jehova. Ang akong mga eskolmet makahimo sa bisan unsa nga gusto nila, ug gusto nako nga makabaton ug ingon ana nga kagawasan. Gibati nako nga estrikto ra kaayo ang mga balaod sa akong ginikanan ug ang Kristohanong mga sukdanan ug nga bug-at ra kaayo ang paghimo sa espirituwal nga mga kalihokan. Nagtuo ko nga tinuod si Jehova, pero mibati ko nga dili na ko suod niya.

Bisan pa niana, dili ko gustong mahimong dili aktibo, maong mosangyaw gihapon ko panagsa. Dili ko mangandam dihang mosangyaw ko, maong maglisod ko pagsugod o pagpadayon ug panag-estorya. Ingong resulta, ang akong ministeryo dili mabungahon ug walay kalipay, maong misamot nga wala na ko ganahig sangyaw. Nakaingon ko sa akong kaugalingon, ‘Kapoya aning kada semana, kada bulan, sige na lang tag sangyaw.’

Pag-edad nakog 17, gusto nako nga mahimong independente. Maong nag-empake ko, mibiya sa balay, ug mibalhin sa Australia. Naguol ang akong ginikanan pagbiya nako. Nabalaka sila, pero naghunahuna  sila nga magpadayon ra ko sa akong espirituwal nga rutina.

Sa Australia, misamot pa gyod ka luya ang akong espirituwalidad. Misugod na kog palta sa mga tigom. Nakighigala ko sa mga batan-on nga parehas nako, nga motambong ug tigom sa usa ka gabii, ug dayon sa sunod gabii mag-inom ug magsayawsayaw diha sa mga naytklab. Dihang maghunahuna ko niadtong mga panahona, makaingon ko nga ang akong usa ka tiil naa sa kamatuoran ug ang pikas naa sa kalibotan, pero mibati ko nga dili ko malipayon sa bisan asa niana.

Mga duha ka tuig sa ulahi, nakaila nako ang usa ka sister kinsa wala mahibalo nga nakatabang siya nako nga mapamalandong ang akong paagi sa pagkinabuhi. Nagpuyo ko sa usa ka balay uban ang lima ka dalagang sister, ug gidapit namo ang tigdumala sa sirkito ug ang iyang asawa, si Tamara, sa pagsaka sa among balay sulod sa usa ka semana. Samtang ang iyang bana mag-atiman sa mga buluhaton sa kongregasyon, si Tamara makig-uban namo ug magkinataw-anay mi. Ganahan ko adto. Balanse kaayo siyag hunahuna ug dili ko mataha niya. Wa ko magtuo nga naa diay tawo nga aktibo sa pag-alagad pero lingawng ikauban.

Si Tamara dasig kaayo. Ang iyang gugma sa kamatuoran ug sa ministeryo makatakod. Nalipay siya sa paghatag kang Jehova sa iyang kinamaayohan, samtang ako dili malipayon kay wala kaayo koy gihimo para kang Jehova. Ang iyang pagkapositibo ug pagkamalipayon dako kaayog epekto sa akong kinabuhi. Ang iyang ehemplo nagpahinumdom nako sa usa ka importanteng kamatuoran: Gusto ni Jehova nga kitang tanan mag-alagad kaniya “uban ang pagsadya” ug “singgit sa kalipay.”—Sal. 100:2.

Gusto kong magmalipayon sama kang Tamara, pero kinahanglan kong mohimog pipila ka dagkong kausaban. Wala dayon to mahitabo, pero sa ngadtongadto misugod ko paghimog ginagmayng kausaban. Nagsugod ko pagpangandam sa ministeryo, ug nag-oksilyare payunir ko matag karon ug unya. Nakatabang ni nako nga dili na kaayo kulbaan ug makabatog kompiyansa sa  kaugalingon. Kay pirme na nakong gamiton ang Bibliya sa pagsangyaw, mas nalingaw na ko sa ministeryo. Wa madugay, nag-oksilyare payunir na ko kada bulan.

Nakighigala pod ko sa mga igsoon nga lainlaig edad kinsa maayog espirituwalidad ug malipayon sa ilang pag-alagad kang Jehova. Ang ilang maayong ehemplo nakatabang nako sa paghunahuna kon unsay pinakaimportante sa akong kinabuhi ug sa pagsugod ug maayong espirituwal nga rutina. Mas nalingaw na ko sa ministeryo, ug sa ngadtongadto nagregular payunir ko. Human sa daghang tuig, nahibalik ang akong kalipay sa pag-alagad ug ang pagbati nga bahin ko sa kongregasyon.

Usa ka tuig sa ulahi, nakaila nako si Alex, usa ka buotan, sinserong tawo kinsa nahigugma kang Jehova ug sa ministeryo. Siya ministeryal nga alagad ug unom ka tuig nang payunir. Si Alex nakaalagad pod ug pipila ka bulan sa Malawi diin mas dako ang panginahanglan. Didto, nakig-uban siya sa mga misyonaryo kinsa naghatag ug maayong ehemplo kaniya ug nagdasig niya nga padayong unahon ang Gingharian.

Niadtong 2003, nagminyo mi ni Alex, ug sukad niadto nagpadayon mi sa bug-os panahong pag-alagad. Duna mi daghang nindot nga leksiyon nga nakat-onan, ug gipanalanginan mi pag-ayo ni Jehova.

Pagka-2009, gidapit mi nga mag-alagad ingong mga misyonaryo sa Timor-Leste, usa ka gamayng nasod diha sa Indonesian archipelago. Nakurat mi, naeksayted, ug sa samang higayon nabalaka. Lima ka bulan sa ulahi, miabot mi sa Dili, ang kaulohan.

Lahi kaayo ang kinabuhi didto. Kinahanglan ming mopahiuyon sa bag-ong kultura, pinulongan, pagkaon, ug kahimtang sa pagkinabuhi. Sa ministeryo, sagad makakita mig mga tawo nga pobre kaayo, kulag edukasyon, ug dinaogdaog. Ug daghan  ang dunay pisikal ug emosyonal nga mga problema nga epekto sa gubat ug kapintasan. *

Ang ministeryo mabungahon kaayo! Pananglitan, dihay higayon nga nasangyawan nako ang masulub-ong 13 anyos nga dalagitang si Maria. * Ang iyang inahan namatay pipila ka tuig una pa niana, ug panagsa ra niyang makita ang iyang amahan. Sama sa daghang batan-on nga parehas niyag edad, walay direksiyon ang kinabuhi ni Maria. Nahinumdom ko usa ka higayon niana nga siya mihilak ug gisulti niya nako ang iyang gibati. Pero wala ko kasabot sa iyang gisulti kay dili pa kaayo ko maayo sa ilang pinulongan. Nag-ampo ko kang Jehova, nga naghangyo niya nga tabangan ko sa pagdasig kang Maria, ug dayon gibasahan nako siyag makapahupayng mga teksto. Sa misunod nga pipila ka tuig, nakita nako nga gibag-o sa kamatuoran ang kinaiya, hitsura, ug tibuok kinabuhi ni Maria. Siya nabawtismohan ug nagdumala nag mga pagtuon sa Bibliya. Karon, si Maria duna nay dakong espirituwal nga pamilya nga nagmahal kaniya.

Gipanalanginan ni Jehova ang buluhaton sa Timor-Leste. Bisag kadaghanan sa mga magmamantala nabawtismohan sulod lang sa milabayng 10 ka tuig, daghan ang nag-alagad ingong mga payunir, ministeryal, o ansiyano. Ang uban nagboluntaryo sa remote translation office ug mitabang sa paghubad ug binase sa Bibliya nga mga publikasyon ngadto sa ilang pinulongan. Malipay kaayo kong madungog sila nga manganta panahon sa tigom, makita ang ilang mapahiyomong mga nawong, ug maobserbahan ang ilang pag-uswag sa espirituwal.

Ang among kinabuhi sa Timor-Leste lahi kaayo sa Australia, pero malipayon kaayo ang among kinabuhi didto. Usahay, maghuot mi sa usa ka gamayng bus nga puno sa mga tawo ug naay kargang mga bulad ug gulay gikan sa merkado. May mga adlaw nga mag-Bible study mi diha sa alimuot kaayo ug gamay nga balay, nga yuta ang salog ug may mga manok nga nagdagandagan. Pero bisan pa sa mga kalisdanan, sagad moingon ko, ‘Lingawa ani oy!’

Dihang maghunahuna ko sa nangagi, mapasalamaton ko nga ang akong ginikanan naningkamot sa pagtudlo nako bahin kang Jehova ug pagsuportar nako, bisag naluya ko sa pag-alagad panahon sa akong pagkabatan-on. Tinuod gyod ang Proverbio 22:6 sa akong bahin. Si Mama ug Papa nalipay kaayo namo ni Alex kay nakita nila nga gigamit mi ni Jehova. Sukad niadtong 2016, nag-alagad mi sa sirkitong buluhaton sa teritoryo sa sangang buhatan sa Australasia.

Di ko katuo nga dihay panahon nga bug-at kaayo para nako ang pagsangyaw. Karon, ganahan na kaayo kong mosangyaw! Akong nakita nga bisag unsa pay mahitabo sa atong kinabuhi, tinuod lang tang magmalipayon kon kinasingkasing tang mag-alagad sa Diyos. Oo, ang milabayng 18 ka tuig nga pag-alagad kang Jehova uban ni Alex mao ang pinakamalipayong mga tuig sa akong kinabuhi. Nasabtan na nako karon nga tinuod gyod ang giingon ni salmistang David kang Jehova: “Ang tanang modangop kanimo magsadya; sila kanunayng maghugyaw sa kalipay. . . . Ug kadtong nahigugma sa imong ngalan magsadya.”—Sal. 5:11.