1. Unsay pagbati ni Jehova sa iyang mga alagad?

 DIHANG magtan-aw si Jehova sa iyang mga alagad dinhi sa yuta, unsay iyang makita? Makita niya ang atong mga kalipay ug kaguol. (Sal. 37:18) Dihang makita niya nga naningkamot ta pag-ayo sa pag-alagad kaniya bisan pa sa mga kasakit nga atong giatubang, malipay gyod siya! Andam pod kaayo siyang motabang ug mohupay nato.

2. Unsay ginahimo ni Jehova sa mga dugmok ug kasingkasing, ug unsay atong himoon aron makabenepisyo sa iyang pag-atiman?

² Ang Salmo 147:3 nag-ingon nga si Jehova ‘nagbugkos sa mga samad’ niadtong dugmok ug kasingkasing. Gipakita niini nga teksto nga mahigugmaong ginaatiman ni Jehova kadtong mga nagsagubang ug emosyonal nga kasakit. Unsay angay natong himoon aron makabenepisyo sa iyang pag-atiman? Hunahunaa ni nga ilustrasyon: Ang eksperyensiyadong doktor dakog mahimo aron tabangan ang nasamdan nga pasyente. Pero aron makabenepisyo, kinahanglang sundon pag-ayo sa nasamdan nga pasyente ang instruksiyon sa doktor. Niining artikuloha, atong tan-awon kon unsay giingon ni Jehova diha sa iyang Pulong nga makatabang niadtong mga nakaeksperyensiya ug emosyonal nga kasakit. Hisgotan pod nato kon unsaon nato pagpadapat ang iyang mahigugmaong tambag.

GIPASALIGAN TA NI JEHOVA NGA BILILHON KAAYO TA

3. Nganong ang uban ubos ug panglantaw sa ilang kaugalingon?

³ Nagkinabuhi ta sa panahon diin ang mga tawo dili mahigugmaon ug dili maayog pagtratar sa uban. Tungod niana, daghan ang ubos ug panglantaw sa ilang kaugalingon. Ang sister nga si Helen a miingon: “Nagdako ko sa pamilya nga dili mahigugmaon. Si Papa bayolente, ug adlaw-adlaw mi niyang sultihan nga  wala mi pulos.” Tingali, sama kang Helen, nakasinati pod kag dili maayong pagtratar, pirme kang insultohon, o kaha sultihan nga wala kay pulos. Tungod niana, malisdan tingali ka sa pagtuo nga naay tinuod nga nagmahal nimo.

4. Sumala sa Salmo 34:​18, unsay gipasalig ni Jehova kanato?

⁴ Bisag ang uban dili maayog pagtratar nimo, makaseguro ka nga gimahal ka ni Jehova ug iya kang gipabilhan. Siya “duol niadtong mga dugmok ug kasingkasing.” (Basaha ang Salmo 34:18.) Kon mibati kang walay pulos, hinumdomi nga naay nakitang maayo si Jehova sa imong kasingkasing, ug siya mismo ang nagkabig nimo. (Juan 6:44) Andam gyod siyang motabang nimo kay gimahal ka niya pag-ayo.

5. Giunsa pagtratar ni Jesus kadtong mga gipakaubos sa uban, ug unsay atong makat-onan niana?

⁵ Makakat-on ta bahin sa pagbati ni Jehova pinaagi sa pagkonsiderar sa ehemplo ni Jesus. Panahon sa iyang ministeryo sa yuta, gihatagan ni Jesus ug pagtagad ang mga tawo nga gipakaubos sa uban, ug nagpakita siyag kaluoy kanila. (Mat. 9:​9-12) Pananglitan, dihang ang babaye nga naglaom nga maulian sa iyang grabeng sakit mihikap sa besti ni Jesus, gihupay niya ang babaye ug gikomendahan tungod sa iyang pagtuo. (Mar. 5:​25-34) Hingpit gyod nga gisundog ni Jesus ang personalidad sa iyang Amahan. (Juan 14:9) Busa makasalig ka nga gipabilhan ka ni Jehova ug nakita niya ang imong maayong mga hiyas, apil na ang imong pagtuo ug gugma kaniya.

6. Unsay makatabang nimo kon mibati ka nga walay pulos?

⁶ Unsay imong mahimo kon kanunay kang mobating walay pulos? Basaha ug pamalandonga ang mga teksto sa Bibliya nga nagpasalig nimo nga bililhon ka kang Jehova. b (Sal. 94:19) Kon naay tumong nga wala nimo makab-ot  o kon naluya ka kay gamay ra ang imong mahimo kon itandi sa uban, ayawg hunahunaa nga wala na kay pulos. Si Jehova wala magdahom ug labaw sa imong makaya. (Sal. 103:​13, 14) Kon nakaeksperyensiya ka kaniadto ug pag-abuso, ayawg hunahunaa nga ikay mabasol sa nahitabo. Dili to nimo sala! Hinumdomi nga papanubagon ni Jehova ang nag-abuso, dili ang giabuso. (1 Ped. 3:12) Si Sandra nga ginakulata sa bata pa miingon, “Pirme kong mohangyo kang Jehova nga tabangan ko nga makabatog balanseng panglantaw sa akong kaugalingon, ug isipon ang akong kaugalingon sama sa iyang pag-isip nako.”

7. Sa unsang paagi ang atong dili maayong mga kasinatian kaniadto magamit nato diha sa pag-alagad kang Jehova?

⁷ Hinumdomi nga puwede kang gamiton ni Jehova sa pagtabang sa uban. Iya kang gihatagan ug pribilehiyo nga mahimong iyang isigkamagbubuhat diha sa ministeryo. (1 Cor. 3:9) Tungod sa imong mga nasinatian, mas makapakita kag empatiya sa uban ug mas makasabot ka kon unsa tingali ilang gibati. Dako kag mahimo sa pagtabang nila. Si Helen nga gihisgotan ganina nakadawat ug tabang, ug karon nagatabang na pod siya sa uban. Siya miingon: “Sa una, gibati nako nga wala koy pulos. Pero sa tabang ni Jehova, mibati na kong gimahal ug mapuslanon.” Karon, si Helen malipayong nag-alagad ingong regular payunir.

GUSTO NI JEHOVA NGA DAWATON NATO ANG IYANG KAPASAYLOAN

8. Unsang pasalig ang atong mabasa sa Isaias 1:18?

⁸ Ang ubang alagad ni Jehova nahasol pag-ayo tungod sa mga sala nga ilang nahimo kaniadto, tingali sa wala pa o human sa ilang bawtismo. Pero angay natong hinumdoman nga gitagana ni Jehova ang lukat kay gimahal ta niya pag-ayo. Gusto niya nga dawaton nato kini nga regalo. Gipasaligan ta ni Jehova nga kon ato nang ‘nahusay ang mga butang’ c uban kaniya, dili na ta niya paninglan sa mga sala nga atong nahimo kaniadto. (Basaha ang Isaias 1:18.) Mahigugmaon gyod si Jehova! Dili niya hinumdoman ang nangagi natong mga sala. Ang iyang hinumdoman mao ang maayo nga atong nahimo.—Sal. 103:​9, 12; Heb. 6:10.

9. Nganong angay tang maningkamot nga magpokus sa atong mahimo karon ug sa umaabot imbes sa atong nahimo sa nangagi?

⁹ Kon nahasol ka tungod sa imong mga nahimo sa nangagi, paningkamoti nga magpokus sa imong mahimo karon ug sa umaabot. Konsideraha ang ehemplo ni apostol Pablo. Nagbasol si Pablo nga gilutos niya pag-ayo kaniadto ang mga Kristohanon, pero nahibalo siya nga gipasaylo na siya ni Jehova. (1 Tim. 1:​12-15) Nagsige na lang bag hunahuna si Pablo sa mga sala nga iyang nahimo kaniadto? Wala, sama nga wala siya magsigeg hunahuna sa iyang mga kalamposan kaniadto ingong debotado nga Pariseo. (Filip. 3:​4-8, 13-15) Hinuon, nagkugi siya pag-ayo sa iyang ministeryo ug nagpokus sa umaabot. Sama sa kahimtang ni Pablo, dili na nimo mabag-o ang nahitabo. Pero mapasidunggan nimo si Jehova sa imong presenteng kahimtang ug makapokus sa nindot nga paglaom sa umaabot nga iyang gisaad kanimo.

10. Unsay atong himoon kon ang atong mga nahimo kaniadto nakapasakit sa uban?

¹⁰ Tingali naguol ka sa imong mga nahimo kaniadto nga nakapasakit sa uban. Unsay puwede nimong buhaton? Himoa kon unsay imong mahimo sa situwasyon, sama sa kinasingkasing nga pagpangayog pasaylo. (2 Cor. 7:11) Hangyoa si Jehova nga tabangan kadtong mga  naapektohan sa imong gihimo. Makatabang siya nimo ug niadtong imong mga napasakitan aron makalahutay mo ug makabatog kalinaw.

11. Unsay atong makat-onan kang propetang Jonas? (Tan-awa sab ang hulagway.)

¹¹ Kat-oni ang mga sayop nga imong nahimo, ug tugoti si Jehova nga gamiton ka sa bisan unsa mang paagi nga iyang gusto. Matikdi ang ehemplo ni propetang Jonas. Gisugo siya sa Diyos nga moadto sa Nineve. Pero imbes himoon na, miikyas na hinuon siya ug miadto sa laing direksiyon. Tungod ana, gidisiplina siya ni Jehova ug nakakat-on siya sa iyang sayop. (Jon. 1:​1-4, 15-17; 2:​7-10) Si Jehova wala gyod mobiya kang Jonas. Gihatagan niya si Jonas ug laing kahigayonan nga moadto sa Nineve, ug niining higayona misunod dayon si Jonas. Bisag naguol siya sa iyang sayop kaniadto, wala niya ni tugoti nga mopugong niya sa pagdawat sa asaynment nga gihatag ni Jehova.—Jon. 3:​1-3.

SI JEHOVA NAGHUPAY NATO PINAAGI SA BALAANG ESPIRITU

12. Unsay atong himoon aron madawat nato ang kalinaw gikan kang Jehova dihang makaeksperyensiya tag makapa-trauma o makapaguol kaayo nga hitabo? (Filipos 4:​6, 7)

¹² Pinaagi sa iyang balaang espiritu, hupayon ta ni Jehova dihang makaeksperyensiya tag mga hitabo nga makapa-trauma o makapaguol kaayo nato. Matikdi ang eksperyensiya ni Ron ug Carol. Naguol kaayo sila kay ang ilang anak nga lalaki nagpakamatay. Sila miingon: “Nakaagi na mig lisod nga mga pagsulay kaniadto, pero kini ang pinakalisod. Daghang gabii nga dili mi makatulog, maong nag-ampo mi kang Jehova ug gibati gyod namo ang kalinaw nga giingon sa Filipos 4:​6, 7.” (Basaha.) Kon nag-atubang ka ug lisod kaayo nga pagsulay karon, ibubo ang imong kasingkasing kang Jehova. Makaampo ka niya bisag pila pa ka beses o bisag unsa pa ka taas. (Sal. 86:3; 88:1) Pangayoa kanunay kang Jehova ang iyang balaang espiritu. Dili gyod niya balewalaon ang imong mga hangyo.—Luc. 11:​9-13.

13. Sa unsang paagi ang balaang espiritu makatabang nato nga padayong moalagad nga matinumanon kang Jehova? (Efeso 3:16)

¹³ Naluya ba ka tungod sa lisod kaayo nga pagsulay nga imong giatubang? Ang balaang espiritu makahatag nimog kusog aron makapadayon ka sa pag-alagad nga matinumanon kang Jehova. (Basaha ang Efeso 3:16.) Konsideraha ang eksperyensiya sa sister nga si Flora. Siya ug ang iyang bana nag-alagad ingong mga misyonaryo dihang ang iyang bana nagluib niya, ug nagdiborsiyo sila. Siya miingon: “Nasakitan kaayo ko sa iyang pagluib, ug dili gyod mawala sa akong hunahuna ang iyang gihimo. Nag-ampo ko kang Jehova nga hatagan kog balaang espiritu aron makapadayon. Ug gihatag gyod ni Jehova ang akong gikinahanglan. Abi nakog dili to nako makaya nga pagsulay, pero iya kong gihupay ug gitabangan nga makalahutay.” Gibati ni Flora nga gitabangan gyod siya ni Jehova nga mas mosalig niya, ug segurado siya nga dili gyod siya pasagdan ni Jehova sa tanang pagsulay nga iyang maatubang. Si Flora midugang: “Tinuod gyod sa akong kahimtang ang giingon sa Salmo 119:32: ‘Gusto gyod nakong sundon ang dalan sa imong kasugoan kay gihatagan nimo kinig dapit sa akong kasingkasing.’”

14. Unsay atong himoon aron ang espiritu sa Diyos maglihok diha kanato?

¹⁴ Human nimo hangyoa si Jehova nga hatagan kag balaang espiritu, unsay imong himoon aron mapakita nimo nga milihok ka uyon sa imong pag-ampo? Pakigbahin sa mga kalihokan nga makatabang nimo nga madawat ang espiritu sa Diyos. Apil ani ang pagtambong sa mga tigom ug pagsangyaw. Basaha ang iyang Pulong kada adlaw aron mabatonan nimo ang  panghunahuna ni Jehova. (Filip. 4:​8, 9) Samtang magbasa ka, matikdi ang mga karakter sa Bibliya nga nakasinatig mga pagsulay ug pamalandonga kon giunsa sila pagtabang ni Jehova nga makalahutay. Si Sandra, nga gihisgotan ganina, nakasinatig sunodsunod nga grabeng mga problema. Siya miingon: “Natandog gyod ko sa estorya bahin kang Jose. Wala niya tugoti ang mga pagsulay ug inhustisya nga iyang naagoman nga mopahuyang sa iyang relasyon kang Jehova.”—Gen. 39:​21-23.

SI JEHOVA NAGHUPAY NATO PINAAGI SA MGA IGSOON

15. Kinsay makahupay nato, ug unsaon ta nila pagtabang? (Tan-awa sab ang hulagway.)

¹⁵ Dihang naa ta sa lisod nga situwasyon, ang atong mga igsoon ‘makahupay pag-ayo nato.’ (Col. 4:11) Ang mga igsoon gigamit ni Jehova aron ipakita ang iyang gugma kanato. Hupayon ta nila pinaagi sa ilang presensiya ug sa pagpaminaw nato dihang mosulti ta sa atong gibati. Ila tingali tang hatagan ug makapalig-on nga teksto sa Bibliya o moampo sila uban nato. d (Roma 15:4) Usahay, naa tingali brader o sister nga magpahinumdom nato sa panghunahuna ni Jehova aron tabangan ta nga makapabiling kalmado. Ang mga igsoon makahatag pod natog praktikal nga tabang, sama sa pagtaganag pagkaon dihang magul-anon ta.

16. Unsa tingali ang kinahanglan natong himoon aron madawat ang tabang sa mga igsoon?

¹⁶ Aron madawat nato ang tabang sa uban,  kinahanglan tingali nato ning pangayoon. Gimahal ta sa mga igsoon ug gusto ta nilang tabangan. (Prov. 17:17) Pero wala tingali sila mahibalo kon unsay atong gibati o kon unsay atong gikinahanglan. (Prov. 14:10) Kon naguol ka pag-ayo, isulti ang imong gibati ngadto sa hamtong nga mga higala. Sultihi sila kon unsay imong gikinahanglan. Puwede nimo ning isulti sa usa o duha ka ansiyano nga komportable ka. Ang ubang sister komportable pong makig-estorya sa ubang hamtong nga sister.

17. Unsay pipila ka hinungdan nga dili tingali ta makadawat ug pagdasig, ug unsay angay natong buhaton?

¹⁷ Sukli ang tendensiya nga ipalain ang imong kaugalingon. Tungod sa imong mga kasakit o kaguol, tingali mas ganahan kang mag-inusara. Usahay, masaypan tingali kag sabot sa mga igsoon o makasulti silag sakit nga mga pulong. (Sant. 3:2) Ayawg tugoti nga tungod niini nga mga hinungdan, dili na nimo madawat ang pagdasig nga imong gikinahanglan. Ang ansiyano nga si Gavin, nga nag-antos sa depresyon, miingon: “Sagad, dili ko ganahang makig-uban o makig-estorya sa mga igsoon.” Pero wala gyod magpadaog si Gavin sa tendensiya nga ipalain ang iyang kaugalingon, maong nakabenepisyo siya sa pagpakig-uban sa mga igsoon. Ang sister nga si Amy miingon: “Tungod sa akong mga nasinatian, maglisod kog salig sa uban. Pero nakakat-on ko nga higugmaon ang mga igsoon ug mosalig nila sama sa ginahimo ni Jehova. Nahibalo ko nga nakapalipay ni kang Jehova, ug nakapalipay pod ni nako.”

ANG MGA SAAD NI JEHOVA SA UMAABOT MAKAPAHUPAY NATO

18. Unsay atong madahom sa umaabot, ug unsay atong himoon karon?

¹⁸ Makalaom gyod ta ug nindot nga kaugmaon kay nahibalo ta nga sa dili madugay, bug-os nang ayohon ni Jehova ang tanan natong pisikal ug emosyonal nga kasakit. (Pin. 21:​3, 4) Nianang panahona, ang sakit nga mga hitabo nga atong naeksperyensiyahan dili na gyod “motungha sa [atong] kasingkasing.” (Isa. 65:17) Sa ato nang nahisgotan, bisan karon pa lang, ‘gibugkosan [na] ni Jehova ang atong mga samad.’ Daghan siyag gitagana aron hupayon ug tabangan ta, busa pahimusli kini pag-ayo. Ayaw gyod pagduhaduha nga gimahal ka pag-ayo ni Jehova.—1 Ped. 5:7.