1. Unsay giingon ni Jesus sa iyang mga tinun-an bahin sa kon kanus-a moabot ang kataposan, ug unsay iyang gipasidaan kanila?

 PIPILA ka adlaw una mamatay si Jesus, ang upat niya ka tinun-an nangutana niya: “Unsa man unyay ilhanan . . . sa hinapos sa sistema sa mga butang?” (Mat. 24:3) Ang mga tinun-an naghunahuna tingali kon unsaon nila pagkahibalo nga hapit nang malaglag ang Jerusalem ug ang templo niini. Sa pagtubag, si Jesus naghisgot dili lang sa kalaglagan sa Jerusalem ug sa templo kondili apil na pod sa “hinapos sa sistema sa mga butang,” nga nagtumong sa atong panahon karon. Kon kanus-a moabot ang kataposan, si Jesus miingon: “Bahin nianang adlawa o orasa walay nahibalo, bisan ang mga anghel sa langit o ang Anak, apan ang Amahan lang.” Dayon iyang gipasidan-an ang tanan niyang tinun-an nga ‘magpadayon sa pagtukaw’ ug ‘magpadayon sa pagbantay.’​—Mar. 13:32-37.

2. Nganong importante nga ang mga Kristohanon sa unang siglo magpadayon sa pagbantay?

² Ang Hudiyong mga Kristohanon sa unang siglo kinahanglang magpadayon sa pagbantay kay nagdepende niana ang ilang kinabuhi. Gisultihan ni Jesus ang iyang mga sumusunod kon unsay ilhanan nga hapit nang laglagon ang Jerusalem. Siya miingon: “Inigkakita ninyo nga ang Jerusalem gilibotan sa nagkampong kasundalohan, mahibalo kamo nga hapit na kining laglagon.” Nianang panahona, kinahanglan silang mosunod sa pasidaan ni Jesus ug “moikyas ngadto sa kabukiran.” (Luc. 21:20, 21) Kadtong namati sa iyang pasidaan naluwas dihang gilaglag sa mga Romano ang Jerusalem.

3. Unsay atong hisgotan niining artikuloha?

 ³ Karon, nagkinabuhi na ta sa panahon nga hapit nang laglagon kining daotang sistema sa mga butang. Busa kinahanglan pod natong huptan ang maayong panghunahuna ug magpadayon sa pagbantay. Niining artikuloha, atong hisgotan kon sa unsang paagi mahimo tang balanse samtang nagtan-aw sa mga panghitabo sa kalibotan, mabantayan nato ang atong kaugalingon, ug magamit ang nahibiling panahon sa kinamaayohang paagi.

4. Nganong angay tang mainteres kon sa unsang paagi ang mga panghitabo sa kalibotan nagtuman sa mga tagna sa Bibliya?

⁴ Naa tay maayong mga rason nga mainteres kon sa unsang paagi ang mga panghitabo karon nagtuman sa mga tagna sa Bibliya. Pananglitan, si Jesus naghisgot ug espesipikong mga panghitabo nga makatabang nato sa pagkahibalo nga hapit nang matapos ang sistema ni Satanas. (Mat. 24:3-14) Gidasig ta ni apostol Pedro nga hatagag pagtagad ang katumanan sa mga tagna aron magpabiling lig-on ang atong pagtuo. (2 Ped. 1:19-21) Ang unang bersikulo sa kataposang basahon sa Bibliya nag-ingon: “Usa kini ka pinadayag pinaagi ni Jesu-Kristo, nga gihatag sa Diyos kaniya, aron ipakita sa iyang mga ulipon ang mga butang nga kinahanglang mahitabo sa dili madugay.” (Pin. 1:1) Busa interesado kaayo ta sa mga panghitabo karon ug sa posibleng koneksiyon niini sa mga tagna sa Bibliya. Ug tingali ganahan kaayo tang makig-estorya sa uban bahin niini nga mga hitabo.

5. Unsay angay natong likayan, pero unsay angay natong buhaton? (Tan-awa sab ang mga hulagway.)

⁵ Dihang maghisgot ug tagna sa Bibliya, likayan nato ang paghatag ug kaugalingong interpretasyon. Ngano? Kay dili nato gustong makasultig bisan unsa nga makapabahinbahin sa kongregasyon. Pananglitan, makabalita tingali ta bahin sa mga lider sa mga nasod nga nagsabotsabot kon unsaon nila pagsulbad ang gubat aron naa nay kalinaw ug kasegurohan. Imbes maghatag ug kaugalingong opinyon nga ang ilang gihimo nagtuman sa tagna sa 1 Tesalonica 5:3, kinahanglang mahibalo ta sa kinabag-ohang impormasyon nga gi-publish sa organisasyon ni Jehova. Kon dinhi nato ibase ang atong pagpakig-estorya, makatabang ta nga magkahiusa ang kongregasyon sa “samang panghunahuna.”​—1 Cor. 1:10; 4:6.

6. Unsay atong makat-onan sa 2 Pedro 3:11-13?

⁶ Basaha ang 2 Pedro 3:11-13. Gitabangan ta ni apostol Pedro nga mahimong balanse dihang magsusi sa mga tagna sa Bibliya. Gidasig ta niya nga ‘maghunahuna kanunay sa presensiya sa adlaw ni Jehova.’ Ngano? Dili tungod kay gusto natong mahibaloan kon unsang “adlawa ug orasa” moabot ang Armagedon, kondili aron magamit nato ang nahibiling panahon alang sa “balaang panggawi ug mga buhat nga nagpakitag debosyon sa Diyos.” (Mat. 24:36; Luc. 12:40) Sa ato pa, gusto natong magpadayon sa paghimog maayo ug maseguro nga ang atong mga paningkamot sa pag-alagad kang Jehova nagpakita sa atong lawom nga gugma kaniya. Ug aron mahimo na, kinahanglang bantayan nato ang atong kaugalingon.

7. Sa unsang paagi mabantayan nato ang atong kaugalingon? (Lucas 21:34)

⁷ Giingnan ni Jesus ang iyang mga tinun-an nga bantayan dili lang ang mga panghitabo sa kalibotan, kondili ang ila pong kaugalingon. Klaro na niyang gihisgotan sa pasidaan nga narekord sa Lucas 21:34. (Basaha.) Matikdi ang giingon ni Jesus: ‘Bantayi ang inyong kasingkasing.’ Niini nga teksto, si Jesus samag miingon: ‘Bantayi ang inyong kaugalingon.’ Ang tawo nga nagbantay sa iyang kaugalingon alerto sa bisan  unsa nga makadaot sa iyang relasyon kang Jehova, ug maningkamot siya nga likayan na. Nianang paagiha, makapabilin siya sa gugma sa Diyos.​—Prov. 22:3; Jud. 20, 21.

8. Unsay gitambag ni apostol Pablo sa mga Kristohanon?

⁸ Gitambagan ni apostol Pablo ang mga Kristohanon nga bantayan ang ilang kaugalingon. Pananglitan, iyang giingnan ang mga Kristohanon sa Efeso: “Pagbantay pag-ayo nga ang inyong paggawi dili sama sa dili maalamon kondili sa maalamong mga tawo.” (Efe. 5:15, 16) Kanunayng naningkamot si Satanas nga daoton ang atong relasyon kang Jehova. Kanay rason nga ang Bibliya nagtambag nato nga ‘padayong sabton kon unsa ang kabubut-on ni Jehova’ aron maprotektahan nato ang atong kaugalingon sa bisan unsang taktika ni Satanas.​—Efe. 5:17.

9. Unsay atong himoon aron masabtan kon unsay kabubut-on ni Jehova para nato?

⁹ Wala hisgoti sa Bibliya ang tanang butang nga makadaot sa atong relasyon kang Jehova. Sagad, kinahanglan tang modesisyon bahin sa mga butang nga wala espesipikong hisgoti sa Bibliya. Aron makahimog maalamong desisyon, kinahanglan natong masabtan “ang kabubut-on ni Jehova.” Mahimo nato na pinaagi sa regular nga pagtuon ug pagpamalandong sa Pulong sa Diyos. Kon masabtan nato ang kabubut-on ni Jehova ug maugmad ang “panghunahuna sa Kristo,” makahimo tag maalamong mga desisyon bisan dihang walay espesipikong mga balaod nga mogiya nato. (1 Cor. 2:14-16) Usahay dali rang mamatikdan ang mga butang nga makadaot sa atong relasyon kang Jehova, pero naay mga panahon nga lisod ning mamatikdan.

10. Unsa ang pipila sa mga kapeligrohan nga angay natong likayan?

¹⁰ Ang pipila sa mga kapeligrohan nga angay natong likayan mao ang pagbirigbirig o flirting, pagpalabig inom, pagpalabig kaon, pagsultig sakit ngadto sa uban, ug ang pagtan-awg pintas nga mga kalingawan, pornograpiya, ug ubang butang nga sama niana. (Sal. 101:3) Ang atong kaaway, ang Yawa, kanunayng nangitag kahigayonan nga daoton ang atong relasyon kang Jehova. (1 Ped. 5:8) Kon dili ta magbantay, posibleng matamnan ni Satanas ang atong hunahuna ug kasingkasing ug mga binhi sa kasina, pagkadili-matinud-anon, kahakog, kasuko, pagkamapahitas-on, ug pagdumot. (Gal. 5:19-21) Sa sugod, maghunahuna tingali ta nga dili pa ni peligroso kay di pa man grabe ang atong gibati. Pero kon dili ta molihok dayon aron ibton kini, padayon ning motubo nga samag makahilong tanom ug moresultag kadaot.​—Sant. 1:14, 15.

11. Unsa ang usa ka kapeligrohan nga dili daling mamatikdan, ug nganong angay nato ning likayan?

¹¹ Ang usa ka kapeligrohan nga dili daling mamatikdan mao ang pagpakig-uban niadtong dili maayog impluwensiya. Niay pananglitan. Naa kay kauban sa trabaho nga dili Saksi ni Jehova. Gusto nimo nga maayo siyag impresyon sa mga Saksi, maong buotan ug matinabangon ka niya. Tingali mosugot pod ka nga makigdungan niyag paniudto usahay. Ngadtongadto, pirme na mong mag-ubag kaon. Usahay mag-estorya siyag imoral nga mga butang, ug sa primero wa ka kaangay. Pero wala madugay, naanad na ka niana maong dili na ka lainan sa iyang ginapanulti. Dayon usa ka adlaw, gi-invite ka niya nga mag-inom mo human sa trabaho, ug misugot ka. Paglabay sa panahon, parehas na mog panghunahuna. Sa imong tan-aw, unsa kaha ka dugay nga masundog na nimo ang iyang binuhatan? Siyempre, buotan ug matinahoron ta sa tanan. Pero angay natong hinumdoman nga ang atong mga kauban dakog impluwensiya nato. (1 Cor. 15:33) Kon bantayan nato ang atong kaugalingon sama sa gidasig ni Jesus, likayan nato ang wala kinahanglanang pagpakig-uban niadtong wala magsunod sa mga sukdanan ni Jehova. (2 Cor. 6:15) Makita nato ang mga kapeligrohan ug malikayan kana.

12. Unsay kinahanglang himoon sa mga tinun-an ni Jesus samtang nagpaabot sa hinapos sa sistema sa mga butang?

¹² Gusto ni Jesus nga ang iyang mga tinun-an naay buhaton samtang nagpaabot sa hinapos sa sistema sa mga butang. Busa gihatagan niya silag buluhaton. Iya silang gisugo nga isangyaw ang maayong balita “sa Jerusalem, sa tibuok Judea ug Samaria, ug hangtod sa kinalay-ang bahin sa yuta.” (Buh. 1:6-8) Dako gyod nga asaynment ang nadawat sa mga sumusunod ni Jesus! Kay naningkamot sila sa pagsangyaw, nagamit nila ang ilang panahon sa kinamaayohang paagi.

13. Nganong kinahanglan natong gamiton ang atong panahon sa kinamaayohang paagi? (Colosas 4:5)

¹³ Basaha ang Colosas 4:5. Aron mabantayan nato ang atong kaugalingon, kinahanglan natong hunahunaon pag-ayo kon giunsa nato paggamit ang atong panahon. Ang “wala damhang panghitabo” puwedeng modangat natong tanan. (Eccl. 9:11) Posible nga kalit rang matapos ang atong kinabuhi.

14-15. Unsaon nato paggamit ang atong panahon sa kinamaayohang paagi? (Hebreohanon 6:11, 12) (Tan-awa sab ang hulagway.)

¹⁴ Magamit nato ang atong panahon sa kinamaayohang paagi kon himoon nato ang kabubut-on ni Jehova ug palig-onon ang atong relasyon kaniya. (Juan 14:21) Kinahanglan tang  “magmalig-on, dili matarog, nga kanunayng puliki diha sa buluhaton sa Ginoo.” (1 Cor. 15:58) Dayon inig-abot sa kataposan​—kataposan man sa atong kinabuhi o kataposan niining daotang sistema—​wala tay mahayan.​—Mat. 24:13; Roma 14:8.

¹⁵ Karon, si Jesus padayong naggiya sa iyang mga tinun-an sa ilang pagsangyaw bahin sa Gingharian sa Diyos sa tibuok kalibotan. Gihimo ni Jesus ang angay niyang himoon. Pinaagi sa organisasyon ni Jehova, gibansay ta ni Jesus kon unsaon pagsangyaw ug gihatag niya ang tanan natong gikinahanglan aron mas daghan ang makadungog sa maayong balita. (Mat. 28:18-20) Sa ato pong bahin, kinahanglan tang magkugi sa pagsangyaw ug pagpanudlo ug magpadayon sa pagbantay samtang nagpaabot nga taposon ni Jehova kining sistemaha sa mga butang. Kon ipadapat nato ang tambag sa Hebreohanon 6:11, 12, mahuptan nato ang atong paglaom “hangtod sa kataposan.”​—Basaha.

16. Unsay determinado natong himoon?

¹⁶ Naa nay gitakda si Jehova nga adlaw ug oras kon kanus-a niya taposon kining sistema ni Satanas. Nianang adlawa, tumanon gyod ni Jehova ang tanang tagna nga iyang gipasulat sa Bibliya. Usahay, maghunahuna tingali ta nga morag nalangan ang pagtapos niining sistemaha. Pero ang adlaw ni Jehova “dili maulahi!” (Hab. 2:3) Busa hinaot nga determinado ta nga “padayong magbantay [samtang] naghulat kang Jehova,” ug ‘mapailobong magpaabot sa Diyos, ang atong manluluwas.’​—Miq. 7:7.