SI Yomara ug ang iyang mga manghod nga lalaki, si Marcelo ug Hiver, nagpuyo sa usa ka gamayng baryo sa Guatemala. Si Yomara ang unang nagpa-Bible study sa mga Saksi, ug sa ulahi nagpa-study pod ang iyang mga igsoon. Pero naay problema. Silang tulo buta, ug dili sila makabasag braille. Busa ang nag-Bible study nila maoy mobasa sa mga parapo ug teksto sa Bibliya.

Lisod pod para nila ang pagtambong sa mga tigom. Kon sila lang, dili nila mahimo ang 40 minutos nga pagbiyahe paingon sa pinakaduol nga Kingdom Hall. Pero gitabangan sila sa mga igsoon sa kongregasyon aron makatambong sila sa tanang tigom. Ug dihang naa na silay mga bahin sa midweek nga tigom, gitabangan sila sa mga igsoon nga ma-memorize ang ilang mga bahin.

Pagka-Mayo 2019, gisugdan ang mga tigom sa kongregasyon sa ilang baryo. Nianang panahona, naa nay regular payunir nga magtiayon nga mibalhin didto. Bisag dili kamaong mag-braille ang magtiayon, gusto nilang tudloan ang tulo ka magsoon nga makabasa ug makasulat ug braille. Miadto silag library aron tun-an ang braille system ug ang mga paagi kon unsaon ni pagtudlo.

Sulod lang sa pipila ka bulan, ang magsoon kamao nang mobasag braille, maong mas miuswag sila sa espirituwal. a Karon si Yomara, Marcelo, ug Hiver mga regular payunir na. Si Marcelo usa na ka ministeryal nga alagad. Busy kaayo sila sa espirituwal nga mga buluhaton sa tibuok semana. Makatakod ang ilang kadasig.

Ang tulo ka magsoon mapasalamaton sa gugma ug tabang sa mga igsoon sa kongregasyon. “Sukad sa una namong pagkaila sa mga Saksi, nakita namo ang ilang tinuod nga gugma,” miingon si Yomara. “Daghan mig mga higala sa kongregasyon, ug nahiusa mi sa among mga igsoon sa tibuok kalibotan tungod sa gugma,” miingon si Marcelo. Si Yomara ug ang iyang mga igsoon eksayted nang makita nga mahimong Paraiso ang tibuok yuta.—Sal. 37:10, 11; Isa. 35:5.