Bag-ong mga Membro sa Nagamandong Lawas

SA Sabado, Oktubre 2, 1999, ang Tinuig nga Miting sa Watch Tower Bible and Tract Society of Pennsylvania gitiklopan uban sa makapahinganghang pahibalo. Ang 10,594 nga mitambong o gikonektar pinaagig linya sa telepono nahinam sa pagkadungog nga upat ka bag-ong membro ang gidugang sa Nagamandong Lawas sa mga Saksi ni Jehova. Ang bag-ong mga membro, tanan maoy dinihogang mga Kristohanon, mao si Samuel F. Herd; M. Stephen Lett; Guy H. Pierce; ug David H. Splane.

• Si Samuel Herd nagsugod sa pagpayunir niadtong 1958, ug gikan sa 1965 ngadto sa 1997, nag-alagad siya sa sirkito ug distritong buluhaton. Human niana, siya ug ang iyang asawa, si Gloria, nahimong bahin sa pamilyang Bethel sa Tinipong Bansa, diin si Brader Herd nag-alagad sa Departamento sa Pag-alagad. Nag-alagad usab siya ingong katabang sa Komite sa Pag-alagad.

• Si Stephen Lett nagsugod sa pagpayunir niadtong Disyembre 1966, ug gikan sa 1967 ngadto sa 1971, nag-alagad siya sa Bethel sa Tinipong Bansa. Sa Oktubre 1971, naminyo siya sa iyang asawa, si Susan, ug misugod sa espesyal payunir nga pag-alagad. Gikan sa 1979 ngadto sa 1998, nag-alagad siya ingong magtatan-aw sa sirkito. Sukad sa Abril 1998, siya ug si Susan nahimong bahin sa pamilyang Bethel sa Tinipong Bansa. Didto siya nag-alagad sa Departamento sa Pag-alagad ug nahimong katabang sa Komite sa Pagtudlo.

• Si Guy Pierce nagbaton ug pamilya ug dayon uban sa iyang asawa nagsugod sa pagpayunir sa Abril 1982. Nag-alagad siya ingong magtatan-aw sa sirkito gikan sa 1986 hangtod sa 1997, sa dihang siya ug ang iyang asawa, si Penny, nahimong bahin sa pamilyang Bethel sa Tinipong Bansa. Nag-alagad nang daan si Brader Pierce ingong katabang sa Komite sa Kawanihan.

• Si David Splane nagsugod sa pagpayunir sa Septiyembre 1963. Kay graduwado sa ika-42 nga klase sa Gilead, nag-alagad siya ingong misyonaryo sa Senegal, Aprika, dayon sulod sa 19 ka tuig sa sirkitong buluhaton sa Canada. Siya ug ang iyang asawa, si Linda, didto na sa Bethel sa Tinipong Bansa sukad sa 1990, diin si Brader Splane nagtrabaho sa mga departamento sa Pag-alagad ug Pagsulat. Sukad sa 1998, nahimo na siyang katabang sa Komite sa Pagsulat.

Dugang pa sa upat ka bag-ong membro, ang Nagamandong Lawas nalangkoban na karon ni C. W. Barber, J. E. Barr, M. G. Henschel, G. Lösch, T. Jaracz, K. F. Klein, A. D. Schroeder, L. A. Swingle, ug D. Sydlik. Maoy pag-ampo sa tanan nga si Jehova magpadayon sa pagpanalangin ug pagpalig-on sa Nagamandong Lawas, nga karon gipadako, samtang kini magpadayon sa pagdumala sa mga kalihokan sa katawhan sa Diyos sa tibuok kalibotan ug sa pag-alagad sa ilang espirituwal nga mga interes.