Kinsay Makalabang-Buhi sa Adlaw ni Jehova?

“Ang adlaw moabot nga nagdilaab sama sa hudno.”—MALAQUIAS 4:1.

1. Sa unsang paagi gihubit ni Malaquias ang kataposan niining daotang sistema sa mga butang?

 SI MANALAGNANG Malaquias gidasig sa Diyos aron sa pagrekord sa mga tagna bahin sa makalilisang nga mga hitabo sa duol kaayo nga umaabot. Kining mga hitaboa makaapektar sa tanang tawo sa yuta. Ang Malaquias 4:1 nagtagna: “‘Tan-awa! ang adlaw moabot nga nagdilaab sama sa hudno, ug ang tanang mapangahason ug ang tanan nga nagabuhat sa pagkadaotan mahimong sama sa dagami. Ug ang adlaw nga moabot molamoy gayod kanila,’ miingon si Jehova sa mga panon, ‘mao nga walay mahibilin kanila nga gamot o sanga.’” Unsa ka bug-os ang kalaglagan unya niining daotang sistema sa mga butang? Mahisama unya kini sa mga kahoy diin ang mga gamot niini nangadaot nga dili na gayod motubo pag-usab.

2. Sa unsang paagi gihubit sa ubang mga teksto ang adlaw ni Jehova?

² Tingalig mangutana ka, ‘Unsa kanang maong “adlaw” nga gitagna ni manalagnang Malaquias?’ Kini ra gihapong adlawa ang gihisgotan sa Isaias 13:9, nga nag-ingon: “Tan-awa! Ang adlaw ni Jehova nagsingabot, mapintas uban sa mabangis nga kasuko ug sa nagsilaob nga kasuko, aron himoon ang yuta nga usa ka butang nga makapahingangha, ug aron laglagon ang mga makasasala sa yuta gikan niini.” Ang Sofonias 1:15 naghubit niini ning paagiha: “Kanang adlawa maoy usa ka adlaw sa mabangis nga kasuko, usa ka adlaw sa kasakitan ug kagul-anan, usa ka adlaw sa bagyo ug sa kagun-oban, usa ka adlaw sa kangitngit ug kangiob, usa ka adlaw sa panganod ug sa mabagang kangiob.”

Ang “Dakong Kasakitan”

3. Unsa kining “adlaw ni Jehova”?

³ Diha sa dakong katumanan sa tagna ni Malaquias, ang “adlaw ni Jehova” maoy usa ka yugto sa panahon nga mailhan ingong “dakong kasakitan.” Si Jesus nagtagna: “Aduna unyay dakong kasakitan nga ang ingon niana wala pa mahitabo sukad sa sinugdan sa kalibotan hangtod karon, ug dili na gayod mahitabo pa.” (Mateo 24:21) Hunahunaa lang ang kasakitan nga naagoman sa kalibotan,  ilabina sukad sa 1914. (Mateo 24:7-12) Aw, ang Gubat sa Kalibotan II lang nakakalas ug kapin sa 50 ka milyong kinabuhi! Bisan pa niana, mahitabo sa panahon sa “dakong kasakitan” ang mga kalamidad nga wala ra sa kumingking kanang maong kagul-anan. Kanang hitaboa, nga sama ra sa adlaw ni Jehova, matapos sa Armagedon, nga maoy motiklop sa kataposang mga adlaw niining daotang sistema.—2 Timoteo 3:1-5, 13; Pinadayag 7:14; 16:14, 16.

4. Sa dihang matapos na ang adlaw ni Jehova, unsa unyay mahitabo?

⁴ Sa kataposan niana nga adlaw ni Jehova, ang kalibotan ni Satanas ug ang mga sumusunod niini mangalaglag na unya. Ang unang laglagon mao ang bakak nga relihiyon. Dayon ang paghukom ni Jehova ipasundayag batok sa ekonomikanhon ug politikanhon nga mga sistema ni Satanas. (Pinadayag 17:12-14; 19:17, 18) Si Ezequiel nagtagna: “Ilang isalibay ang ilang salapi sa kadalanan, ug ang ilang bulawan mahimong butang nga kasilagan. Ang ilang salapi ug ang ilang bulawan dili makaluwas kanila sa adlaw sa kasuko ni Jehova.” (Ezequiel 7:19) Mahitungod nianang adlawa ang Sofonias 1:14 nag-ingon: “Ang dakong adlaw ni Jehova haduol na. Kini haduol na, ug nagadali sa hilabihan.” Tungod sa giingon sa Bibliya bahin sa adlaw ni Jehova, kinahanglang molihok gayod kita sumala sa matarong nga mga kinahanglanon sa Diyos.

5. Unsay natagamtam niadtong may kahadlok sa ngalan ni Jehova?

⁵ Human sa pagtagna kon unsay buhaton ni Jehova sa kalibotan ni Satanas, ang Malaquias 4:2 nagrekord kang Jehova nga nag-ingon: “Kaninyo nga nahadlok sa akong ngalan ang adlaw sa pagkamatarong mosidlak gayod, nga may pagpang-ayo sa mga pako niini; ug kamo mogula ug magpanikad sa yuta sama sa mga nating baka nga pinatambok.” “Ang adlaw sa pagkamatarong” mao si Jesu-Kristo. Siya mao ang espirituwal nga “kahayag sa kalibotan.” (Juan 8:12) Si Jesus mosidlak nga makapaayo, una sa espirituwal nga pagkaayo, nga atong gitagamtam karon, ug dayon ang bug-os nga pisikal nga pagkaayo diha sa bag-ong kalibotan. Sumala sa giingon ni Jehova, ang mga gipang-ayo “mogula ug magpanikad sa yuta sama sa mga nating baka nga pinatambok” nga naghinamhinam ug malipayon nga nakagawas gikan sa pagkabilanggo.

6. Unsang selebrasyon sa kadaogan ang himoon sa mga alagad ni Jehova?

⁶ Komosta ang mga tawo nga dili magtagad sa mga kinahanglanon ni Jehova? Ang Malaquias 4:3 nag-ingon: “‘Kamo [mga alagad sa Diyos] magtamak gayod sa mga daotan, kay sila mahisama sa abog ilalom sa mga lapalapa sa inyong mga tiil sa adlaw nga akong himoon kini,’ miingon si Jehova sa mga panon.” Ang tawhanong mga magsisimba sa Diyos dili makigbahin sa paglaglag sa kalibotan ni Satanas. Hinunoa, sila sa mahulagwayon ‘magtamak sa mga daotan’ pinaagi sa pagpakigbahin sa dakong selebrasyon sa kadaogan nga himoon human sa adlaw ni Jehova. Dihay dakong selebrasyong gihimo human malaglag ang mga sundalo ni Paraon diha sa Pulang Dagat. (Exodo 15:1-21) Inigkalaglag ni Satanas ug sa iyang kalibotan diha sa dakong kasakitan pagasundan usab kini ug selebrasyon sa kadaogan. Ang matinumanong mga makalabang-buhi sa adlaw ni Jehova mosinggit: “Magmalipayon kita ug magmaya diha sa iyang kaluwasan.” (Isaias 25:9) Dakong kasadyaan unya ang mahitabo sa dihang ang pagkasoberano ni Jehova mabayaw ug ang yuta mahinloan aron pagapuy-an nga may pakigdait!

Ang Kakristiyanohan Nagsundog sa Israel

7, 8. Hubita ang espirituwal nga kahimtang sa Israel sa panahon ni Malaquias.

⁷ Ang nakabaton ug bulahan nga kahimtang uban kang Jehova mao kadtong nag-alagad kaniya, nga lahi niadtong wala mag-alagad kaniya. Sama usab niini ang kahimtang sa dihang gisulat ni Malaquias ang iyang basahon. Sa 537 W.K.P., usa ka nahibilin sa Israel ang napasig-uli human sa 70 ka tuig nga pagkabihag sa Babilonya. Apan, sa milabay ang usa ka siglo, ang napasig-uling nasod nagsugod na usab sa pagkaanod ngadto sa apostasya ug pagkadaotan. Kadaghanan sa mga tawo nagpasipala sa ngalan ni Jehova; nagsalikway sa iyang matarong nga mga balaod; naghugaw sa iyang templo pinaagi sa pagdala ug buta, piang, ug masakiton nga mga hayop nga ihalad; ug nagdiborsiyo sa mga asawa sa ilang pagkabatan-on.

⁸ Busa, sila giingnan ni Jehova: “Ako moanha kaninyo aron sa paghukom, ug ako mahimong matulin nga saksi batok sa mga barangan, ug batok  sa mga mananapaw, ug batok sa mga nanumpa ug bakak, ug batok sa mga nanikas sa suhol sa sinuholang mamumuo, sa babayeng balo ug sa bata nga ilo-sa-amahan, ug sa mga nagsalikway sa langyaw nga pumoluyo, samtang sila wala mahadlok kanako, . . . kay ako si Jehova; ako dili mausab.” (Malaquias 3:5, 6) Bisan pa niana, gidapit ni Jehova ang tanan nga mihunong sa ilang daotang mga dalan: “Balik kanako, ug ako mobalik kaninyo.”—Malaquias 3:7.

9. Sa unsang paagi unang natuman ang tagna sa Malaquias?

⁹ Kadtong mga pulonga natuman usab sa unang siglo K.P. Usa ka nahibilin sa mga Hudiyo nag-alagad kang Jehova ug nahimong bahin sa usa ka bag-ong “nasod” sa dinihogan-sa-espiritu nga mga Kristohanon, nga nag-apil sa ulahi sa mga Hentil. Apan ang kadaghanan sa lumad nga Israel wala modawat kang Jesus. Busa giingnan ni Jesus ang nasod sa Israel: “Tan-awa! Ang inyong balay mabiniyaan kaninyo.” (Mateo 23:38; 1 Corinto 16:22) Sa 70 K.P., sumala sa gitagna sa Malaquias 4:1, ang “adlaw . . . nga nagdilaab sama sa hudno” midangat sa unodnong Israel. Ang Jerusalem ug ang templo niini nalaglag, ug gikataho nga kapin sa usa ka milyong tawo ang nangamatay tungod sa kagutom, pag-ilogay sa gahom, ug mga pag-atake sa mga sundalo sa Roma. Apan, kadtong nag-alagad kang Jehova nakaikyas niana nga kasakitan.—Marcos 13:14-20.

10. Sa unsang paagi ang mga tawo sa katibuk-an ug ang mga klero nagsundog sa unang-siglong Israel?

¹⁰ Ang katawhan, ug ilabina ang Kakristiyanohan, misundog sa unang-siglong nasod sa Israel. Gipalabi sa mga pangulo ug sa mga tawo sa katibuk-an sa Kakristiyanohan ang ilang kaugalingong mga doktrina sa relihiyon kay sa mga kamatuoran bahin sa Diyos nga gitudlo ni Jesus. Ang mga klero ang labing dakong sad-an. Sila nagdumili sa paggamit sa ngalan ni Jehova, ug gikuha pa gani kini gikan sa ilang mga bersiyon sa Bibliya. Ilang gipasipalahan si Jehova sa ilang dili-kasulatanhong mga doktrina, sama sa paganong mga doktrina labot sa walay-kataposang pagsakit diha sa nagkalayong impiyerno, sa Trinidad, pagkadili-mamatay sa kalag, ug ebolusyon. Busa, ilang gikuhaan si Jehova sa pagdayeg nga takos kaniya, sama sa gihimo sa mga saserdote sa panahon ni Malaquias.

11. Sa unsang paagi gipakita sa relihiyon sa kalibotan kon kinsa gayod ang ilang gialagaran?

¹¹ Sa 1914, sa dihang nagsugod ang kataposang mga adlaw, kining mga relihiyon sa kalibotan, nga gipangunahan niadtong nag-angkong mga Kristohanon, nagpadayag kon kinsa gayod ang ilang gialagaran. Sa panahon sa duha ka gubat sa kalibotan, ilang gidasig ang ilang mga sakop sa pagpakiggubat gumikan sa mga kasungian sa nasod, bisan pag mosangpot kini sa pagpatay sa mga tawo nga sama nila ug relihiyon. Klarong gipaila sa Pulong  sa Diyos kadtong nagmasinundanon kang Jehova ug kadtong wala: “Ang mga anak sa Diyos ug ang mga anak sa Yawa dayag niining butanga: Ang matag usa nga wala magpadayon sa pagbuhat ug pagkamatarong wala magagikan sa Diyos, ni siya nga wala mahigugma sa iyang igsoon. Kay kini mao ang mensahe nga inyong nadungog sukad pa sa sinugdan, nga kita kinahanglang magbaton ug gugma alang sa usag usa; dili sama kang Cain, nga naggikan sa usa nga daotan ug nagpatay sa iyang igsoon.”—1 Juan 3:10-12.

Nagtuman sa Tagna

12, 13. Unsang mga tagna ang gituman sa mga alagad sa Diyos sa atong panahon?

¹² Sa hapit nang matapos ang Gubat sa Kalibotan I sa 1918, ang mga alagad ni Jehova nakasabot nga gihukman sa Diyos ang Kakristiyanohan ug ang tanan sa nahibilin sa bakak nga relihiyon. Sukad niadto, ang panawag gipalanog ngadto sa mga matinud-anon ug kasingkasing: “Gumula kamo kaniya, katawhan ko, kon dili kamo buot makaambit sa iyang mga sala, ug kon dili kamo buot makadawat ug bahin sa iyang mga hampak. Kay ang iyang mga sala nagtipun-og sangko sa langit, ug nahinumdoman sa Diyos ang iyang dili matarong nga mga buhat.” (Pinadayag 18:4, 5) Kadtong nagtinguha sa pag-alagad kang Jehova nagsugod sa paghinlo sa mga timaan sa bakak nga relihiyon ug nagsugod sa pagsangyaw sa maayong balita sa natukod nga Gingharian sa tibuok-kalibotan, usa ka buluhaton nga kinahanglang taposon sa dili pa matapos kining daotang sistema sa mga butang.—Mateo 24:14.

¹³ Kini nahiangay aron matuman ang tagna sa Malaquias 4:5, diin si Jehova nag-ingon: “Tan-awa! Ipadala ko kaninyo si Elias nga manalagna sa dili pa moabot ang dako ug makalilisang nga adlaw ni Jehova.” Kanang maong tagna unang natuman diha sa buluhaton ni Juan Bawtista, nga gilandongan ni Elias. Gihimo ni Juan ang buluhaton nga sama kang Elias sa dihang iyang gibawtismohan ang mga Hudiyo nga naghinulsol sa ilang mga sala batok sa Balaod sa pakigsaad. Labawng hinungdanon, si Juan mao ang mag-uuna sa Mesiyas. Apan, ang buluhaton ni Juan maoy unang katumanan lang sa tagna ni Malaquias. Si Jesus, samtang naghisgot bahin kang Juan ingong ang ikaduhang Elias, nagpakita nga aduna pay umaabot nga “Elias” nga buluhaton.—Mateo 17:11, 12.

14. Unsang hinungdanong buluhaton ang kinahanglang pagahimoon sa dili pa matapos kining maong sistema?

¹⁴ Ang tagna ni Malaquias nagpakita nga kining buluhaton sa dakong Elias pagahimoon sa dili pa moabot ang “dako ug makalilisang nga adlaw ni Jehova.” Kanang adlawa pagataposon sa duol na kaayong gubat sa dakong adlaw sa Diyos nga Labing Gamhanan, sa Armagedon. Kini nagpasabot nga sa kataposan niining daotang sistema sa mga butang ug sa sinugdanan sa Milenyal nga Pagmando sa langitnong Gingharian sa Diyos ilalom sa naentronong si Jesu-Kristo pagahimoon ang buluhaton nga sama nianang gihimo ni Elias. Sumala pa sa tagna, sa dili pa laglagon ni Jehova kining daotang sistema, ang modernong-adlawng Elias nga matang, nga gisuportahan sa minilyong mga isigka-Kristohanon nga adunay yutan-ong paglaom, maabtikon ug masibotong nagabuhat sa buluhaton sa pagpasig-uli sa putli nga pagsimba, pagbayaw sa ngalan ni Jehova, ug pagtudlo sa samag-karnerong mga tawo sa mga kamatuoran sa Bibliya.

Gipanalanginan ni Jehova ang Iyang mga Alagad

15. Sa unsang paagi hinumdoman ni Jehova ang iyang mga alagad?

¹⁵ Panalanginan ni Jehova kadtong moalagad kaniya. Ang Malaquias 3:16 nag-ingon: “Niadtong panahona kadtong mga nahadlok kang Jehova nagsultihanay sa usag usa, ang matag usa sa iyang isigkaingon, ug si Jehova nagpadayon sa pagtagad ug sa pagpamati. Ug usa ka basahon sa handomanan gisulat sa iyang atubangan alang kanila nga nahadlok kang Jehova ug kanila nga nagapalandong sa iyang ngalan.” Sukad pa sa panahon ni Abel hangtod sa unahan, ang Diyos nagsulat diha sa usa ka basahon, pagaingnon pa, sa mga ngalan sa mga tawo nga pagahinumdoman nga hatagan ug kinabuhing walay kataposan. Ngadto kanila si Jehova nag-ingon: “Dad-a ang tanan nga ikapulo ngadto sa balay-tipiganan, aron adunay pagkaon sa akong balay; ug sulayi ako, palihog, niining bahina . . . kon dili ko ba buksan nganha kaninyo ang mga ganghaan sa tubig sa kalangitan ug magbubo nganha kaninyo sa panalangin hangtod nga wala nay panginahanglan.”—Malaquias 3:10.

16, 17. Sa unsang paagi gipanalanginan ni Jehova ang iyang katawhan ug ang ilang buluhaton?

 ¹⁶ Tinuod nga gipanalanginan gayod ni Jehova kadtong nag-alagad kaniya. Sa unsang paagi? Ang usa ka paagi mao ang kauswagan sa pagsabot sa iyang mga katuyoan. (Proverbio 4:18; Daniel 12:10) Ang lain mao ang paghatag kanila ug katingalahang bunga sa ilang buluhatong pagsangyaw. Daghang matinud-anon ug kasingkasing nga mga tawo ang miduyog kanila sa matuod nga pagsimba, ug kini sila ang naglangkob sa “dakong panon . . . gikan sa tanang kanasoran ug mga tribo ug katawhan ug mga pinulongan, . . . ug sa makusog nga tingog sila nanagsinggit, nga nag-ingon: ‘Ang kaluwasan utang namo sa atong Diyos, nga naglingkod sa trono, ug sa Kordero.’” (Pinadayag 7:9, 10) Kining dakong panon nadayag sa katingalahang paagi, ug ang aktibong nag-alagad kang Jehova adunay gidaghanon karon nga kapin sa sayis milyones diha sa kapin sa 93,000 ka kongregasyon sa tibuok kalibotan!

¹⁷ Ang panalangin ni Jehova makita usab tungod kay ang mga Saksi ni Jehova nagpatik sa labing kaylap nga pagkapanagtag nga mga basahon nga gipasukad sa Bibliya sa tibuok kasaysayan. Sa pagkakaron, 90 ka milyong kopya sa magasing Bantayanang Torre ug Pagmata! ang ginapatik matag bulan, Ang Bantayanang Torre sa 144 ka pinulongan, ang Pagmata! sa 87. Ang libro sa pagtuon sa Bibliya nga Ang Kamatuoran nga Motultol sa Kinabuhing Dayon, nga gipatik sa 1968, nakaabot sa sirkulasyon nga kapin sa 107 milyones sa 117 ka pinulongan. Ang Ikaw Mabuhing Walay Kataposan sa Paraiso sa Yuta, nga giluwatan sa 1982, nakaabot ug kapin sa 81 milyones sa 131 ka pinulongan. Ang librong Kahibalo nga Motultol sa Kinabuhing Walay Kataposan, nga giluwatan sa 1995, sa pagkakaron naimprenta sa kapin sa 85 milyones sa 154 ka pinulongan. Ang brosyur nga Unsay Gikinahanglan sa Diyos Kanato?, nga gipatik sa 1996, naapod-apod sa duolan sa 150 milyones ka kopya sa 244 ka pinulongan sa pagkakaron.

18. Nganong ang espirituwal nga kauswagan atong natagamtam bisan pa sa pagsupak?

¹⁸ Kining espirituwal nga kauswagan natagamtam bisan pa sa labing grabe ug padayon nga  pagsupak gikan sa kalibotan ni Satanas. Kini nagpakita nga tinuod ang Isaias 54:17: “‘Bisan unsa nga hinagiban nga buhaton batok kanimo dili magmalamposon, ug ang matag dila nga mosulti batok kanimo sa paghukom imong pagahukman. Mao kini ang panulondon sa mga alagad ni Jehova, ug ang ilang pagkamatarong maoy gikan kanako,’ mao ang giingon ni Jehova.” Pagkamakapahupay alang sa mga alagad ni Jehova ang pagkasayod nga diha kanila adunay dakong katumanan ang Malaquias 3:17: “‘Sila mahimong akoa gayod,’ miingon si Jehova sa mga panon, ‘sa adlaw nga ako magpatunghag usa ka linaing katigayonan.’”

Malipayong Nag-alagad Kang Jehova

19. Sa unsang paagi kadtong nag-alagad kang Jehova lahi gikan niadtong wala mag-alagad?

¹⁹ Ang kalainan sa matinumanong mga alagad ni Jehova ug sa mga daotan sa kalibotan ni Satanas dugang nga nagkatin-aw matag labay sa panahon. Ang Malaquias 3:18 nagtagna: “Kamo makakita gayod pag-usab sa kalainan tali sa usa nga matarong ug sa usa nga daotan, tali sa usa nga nagaalagad sa Diyos ug sa usa nga wala mag-alagad kaniya.” Usa sa daghang kalainan mao nga kadtong nag-alagad kang Jehova nag-alagad nga may dakong kalipay. Apil sa mga katarongan niini mao ang katingalahang paglaom nga ilang nabatonan. Bug-os gayod ang ilang pagsalig kang Jehova sa dihang siya miingon: “Ania, ako naglalang ug bag-ong mga langit ug usa ka bag-ong yuta; ug ang unang mga butang dili na pagahinumdoman, ni kini sila motungha pa sa kasingkasing. Apan pagsadya kamo ug paglipay hangtod sa kahangtoran sa kon unsay akong gilalang.”—Isaias 65:17, 18; Salmo 37:10, 11, 29; Pinadayag 21:4, 5.

20. Nganong kita maoy malipayon man nga mga tawo?

²⁰ Kita nagtuo sa saad ni Jehova nga ang iyang maunongong katawhan makalabang-buhi sa iyang dakong adlaw ug pagadalhon ngadto sa bag-ong kalibotan. (Sofonias 2:3; Pinadayag 7:13, 14) Ug samtang ang uban tungod sa pagkatigulang, sakit, o aksidente mamatay sa dili pa moabot kana, sila gipasaligan ni Jehova nga sa umaabot iyang banhawon sila ug hatagan ug kinabuhing walay kataposan. (Juan 5:28, 29; Tito 1:2) Busa bisag kita adunay mga problema ug mga kalisod, samtang nagsingabot ang adlaw ni Jehova, kita may katarongan gayod nga mahimong labing malipayong mga tawo sa nawong sa yuta.

Unsaon Nimo Pagtubag?

• Unsa ang “adlaw ni Jehova”?

• Sa unsang paagi gisundog sa mga relihiyon sa kalibotan ang karaang Israel?

• Unsang mga tagna ang gituman sa mga alagad ni Jehova?

• Sa unsang paagi gipanalanginan ni Jehova ang iyang katawhan?

[Mga Pangutana sa Pagtuon]

[Hulagway sa panid 21]

Ang unang-siglong Jerusalem ‘nagdilaab sama sa hudno’

[Mga hulagway sa panid 23]

Si Jehova motagana sa panginahanglan niadtong nag-alagad kaniya

[Mga hulagway sa panid 24]

Tungod sa ilang katingalahang paglaom, ang mga alagad ni Jehova tinuod gayod nga malipayon