“Gipugos Gayod Kami Niya nga Moestar”

ANG pagkamaabiabihon maoy batasan diha sa kayutaan sa Silangan. Pananglitan sa India, bahalag gutmon ang usa ka pamilya basta matagan-an lang nilag pagkaon ang usa ka wala-damhang bisita. Ang usa ka inahan sa Iran kanunayng magtipig ug pagkaon sa ilang repridyeretor aron duna siyay ikadalit sa wala-damhang mga bisita.

Ang maong espiritu sa madagayaong pagpanghatag gipakita sa daghang tawo nga gihisgotan sa Bibliya. Ang usa ka talagsaong pananglitan niini mao si Lydia, nga lagmit usa ka Hudiyang proselita nga nagpuyo sa Filipos, ang pangunang siyudad sa distrito sa Macedonia. Usa niana ka adlaw sa igpapahulay, si apostol Pablo ug ang iyang mga kauban sa panaw nakakaplag kang Lydia ug sa uban pang mga babaye nga nagtigom sa daplin sa suba sa gawas sa Filipos. Gibuksan ni Jehova ang kasingkasing ni Lydia samtang nagsulti si Pablo nianang okasyona. Ingong resulta, siya nabawtismohan kauban sa mga membro sa iyang panimalay. Dayon iyang gihangyo ang mga magpapanaw: “Kon inyo akong nahukman nga matinuohon kang Jehova, ari kamo ug estar sa akong balay.” Si Lucas nga kaubanan ni Pablo nag-ingon: “Gipugos gayod kami niya nga moestar.”—Buhat 16:11-15.

Sama kang Lydia, ang mga Kristohanon karon nagpakitag pagkamaabiabihon sa ilang mga isigkamagtutuo, sama sa mga nagapanawng magtatan-aw ug sa ilang mga kapikas. Ang mga tagbalay ‘nagpugos gayod kanila nga moestar.’ Sa baylo, kadtong nagpakitag pagkamaabiabihon gipanalanginan ug makapadasig nga panagsultihay ug espirituwal nga panag-uban. Bisag dili arangan ang kadaghanan sa mga Saksi ni Jehova, sila ‘nagsunod sa dalan sa pagkamaabiabihon.’ (Roma 12:13; Hebreohanon 13:2) Ang ilang espiritu sa pagpanghatag naghimo kanilang malipayon. Husto gayod si Jesus sa dihang siya miingon: “Adunay labaw nga kalipay sa paghatag kay sa pagdawat.”—Buhat 20:35.