Pamilyahanong Pagsimba—Hinungdanon sa Kaluwasan!

HANDURAWA kon unsa unya ka makahahadlok ang “gubat sa dakong adlaw sa Diyos nga Labing Gamhanan”! (Pin. 16:14) Ginamit ang buhi nga paghulagway, si manalagnang Miqueas misulat: “Ang mga bukid mangatunaw . . . , ug ang ubos nga kapatagan mangapikas, sama sa talo tungod sa kalayo, sama sa katubigan nga gibubo sa usa ka titip nga dapit.” (Miq. 1:4) Unsa may dangatan niadtong wala mag-alagad kang Jehova? Ang Pulong sa Diyos nag-ingon: “Ang mga pinatay ni Jehova nianang adlawa maoy gikan gayod sa usa ka tumoy sa yuta hangtod sa laing tumoy sa yuta.”—Jer. 25:33.

Tungod sa maong mga pasidaan, ang mga ulo sa pamilya—nga daghan kanila maoy nag-inusarang mga ginikanan—maayong mangutana sa ilang kaugalingon bahin sa ilang mga anak nga makasabot na, ‘Maluwas kaha sila sa Armagedon?’ Ang Bibliya nagpasalig nga maluwas sila kon sila aktibo ug lig-on sa espirituwal sa sukod nga haom sa ilang pangedaron.—Mat. 24:21.

Hinungdanon ang Paggahin ug Panahon Alang sa Pamilyahanong Pagsimba

Ingong ginikanan, tinoa nga himoon nimo ang tanan sa pagmatuto sa imong mga anak “sa disiplina ug sa pagdumala-sa-kaisipan ni Jehova.” (Efe. 6:4) Hinungdanon kaayo ang pagtuon sa Bibliya uban sa imong mga anak. Buot nato nga ang atong mga anak mahisama sa mga Kristohanon sa Filipos, kinsa gidayeg ni Pablo tungod sa ilang kinabubut-ong pagsunod kang Jehova. Siya misulat: “Akong mga hinigugma, sa paagi nga kamo kanunay nga nagmasinugtanon, dili lamang sa panahon nga ako anaa diha, kondili labi pa gayod karon sa panahon nga ako wala diha, magpadayon kamo sa pagpanlimbasog sa inyong kaugalingong kaluwasan uban ang kahadlok ug pagpangurog.”—Filip. 2:12.

Mosunod ba ang imong mga anak sa balaod ni Jehova bisag wala ka? Komosta kon atua sila sa eskuylahan? Sa unsang paagi makatabang ka sa imong mga anak nga makombinsir nga maalamon ang pagsunod sa mga balaod ni Jehova bisag wala ka?

Ang pamilyahanong pagsimba makatabag dako sa pagpalig-on sa pagtuo sa imong anak. Busa, atong hisgotan ang tulo ka hinungdanong mga butang nga himoon aron magmalamposon ang inyong pamilyahanong pagtuon sa Bibliya.

Himoa Kanang Regular

Gipakita sa Bibliya nga ang mga manulonda sa Diyos gidapit nga moatubang kaniya sa gitakda nga mga panahon. (Job 1:6) Himoa usab kana sa imong mga anak. Pagtakdag adlaw ug oras alang sa inyong gabii sa Pamilyahanong Pagsimba, ug sunda kana. Pagtakda usab ug laing panahon nga kapuli niana engkaso nga dunay wala damhang mga panghitabo.

Paglabay sa mga bulan, ayaw tugoti nga mahimong dili regular ang inyong pagtuon. Hinumdomi, ang imong mga anak mao ang labing importanteng mga estudyante sa Bibliya. Bisan pa niana, gusto silang tukbon ni Satanas. (1 Ped. 5:8) Kon motan-aw mog TV o mohimog uban pang dili importanteng kalihokan imbes magtuon niining gabii sa Pamilyahanong Pagsimba, modaog si Satanas.—Efe. 5:15, 16; 6:12; Filip. 1:10.

Himoa Kanang Praktikal

Ang Pamilyahanong Pagsimba dili lamang panahon sa pagkat-on. Paningkamoti nga himoon kanang praktikal. Sa unsang paagi? Pagpili usahay ug mga topiko nga adunay kalabotan sa mga situwasyon nga mahimong maatubang sa imong anak sa umaabot nga mga adlaw o semana. Pananglitan, nganong dili ilakip ang mga praktis sesyon alang sa ministeryo? Ang mga bata ganahang mobuhat sa mga butang diin sila hanas. Ang pag-ensayo ug mga presentasyon ug paghunahunag mga paagi sa pag-atubang sa mga  pagsupak motabang kanila sa pagbatog kompiyansa sa kaugalingon, samtang sila makigbahin sa lainlaing natad sa pagsangyaw sa Gingharian.—2 Tim. 2:15.

Makahimo usab kamog praktis sesyon nga motabang sa imong mga anak sa pagsagubang sa pagpit-os sa isigkaingon. Ang kapitulo 15 sa librong Mga Pangutanang Gisukna sa mga Batan-on—Mga Tubag nga Mosaler, Tomo 2, mahimong gamiton diha sa panaghisgot sa pamilya. Ang seksiyong “Kon Unsay Himoon Kon Pit-oson” diha sa panid 132 ug 133 naghatag mga sugyot ug mga kahigayonan diin ang imong anak dali rang makatubag. Ang pamulong sa ubos sa panid 133 nag-awhag sa mga batan-on: “Sana-sanaha ang imong mga tubag uban sa imong ginikanan o sa usa ka hamtong nga higala.” Matag karon ug unya, nganong dili kana himoon ingong bahin sa inyong Pamilyahanong Pagsimba?

Ang pamilyahanong pagsimba naghatag kahigayonan sa mga ginikanan sa pagpasiugda sa mga kaayohan sa pagbaton ug espirituwal nga mga tumong. Niining bahina, ang Gisukna sa mga Batan-on, Tomo 2, adunay maayo kaayong mga sugyot diha sa kapitulo 38, nga nag-ulohang “Unsay Akong Himoon sa Akong Kinabuhi?” Samtang naghisgot sa maong kapitulo, tabangi ang imong anak sa pagsabot nga ang pag-una sa pagsimba kang Jehova mao ang labing maayong buhaton. Ugmara diha sa kasingkasing sa imong anak ang tinguha nga magpayunir, mag-alagad sa Bethel, motambong sa Tunghaan sa Ministeryal nga Pagbansay, o mosulod sa laing matang sa bug-os-panahong pag-alagad.

Aniay pahimatngon: Ang pipila ka maayog-tuyo nga ginikanan nagsentro pag-ayo sa ilang pagtagad diha sa tumong nga gusto nilang kab-oton sa ilang anak. Tungod niana wala na hinuon sila makahatag ug komendasyon sa maayong mga butang nga ginahimo sa ilang anak. Siyempre, maayong dasigon ang imong mga anak nga himoon nilang tumong ang mga pribilehiyo sama sa pag-alagad sa Bethel ug pagmisyonaryo. Apan sa pagbuhat niana, mag-amping nga dili maglagot o masubo ang imong anak. (Col. 3:21) Hinumdomi kanunay nga ang imong anak kinahanglang kinasingkasing nga mahigugma kang Jehova, dili tungod kay mao nay imong gusto. (Mat. 22:37) Busa pangitag mga paagi nga makahatag kag komendasyon sa imong anak tungod sa maayong mga butang nga iyang gibuhat, ug ayawg isentro ang imong pagtagad sa wala niya buhata. Tabangi siya nga pabilhan ang tanan nga nahimo ni Jehova. Dayon pasagdi ang imong anak nga mosanong sa pagkamaayo ni Jehova.

Himoa Kanang Makalingaw

Hinungdanon usab nga himoong makalingaw ang Pamilyahanong Pagsimba. Sa unsang paagi mahimo nimo kana? Tingali makapaminaw kamo sa usa sa mga audio drama o motan-aw ug maghisgot sa usa sa mga video nga gihimo sa mga Saksi ni Jehova. O makabasa kamo ug usa ka bahin sa Bibliya, nga mag-asayn sa matag membro sa pamilya sa pagbasa sa gisulti sa usa ka karakter.

Adunay mga artikulo sa Ang Bantayanang Torre ug Pagmata! nga maayong basehan sa panaghisgot sa pamilya. Pananglitan, mahimo nimong gamiton ang panid 31 sa magasing Pagmata!, nga may ulohang “Unsay Imong Tubag?” Matag duha ka bulan, ang publikong edisyon sa Ang Bantayanang Torre adunay ulohan nga “Alang sa Atong mga Batan-on.” Magpulipuli kini ug ang artikulo  nga nag-ulohang “Tudloi ang Inyong mga Anak,” nga alang sa mga bata.

Ang mga artikulo sa serye sa Pagmata! nga “Mga Batan-on Nangutana” ilabinang makapainteres sa mga ginikanan nga dunay mga anak nga batan-on, maingon man usab ang librong Gisukna sa mga Batan-on, Tomo 2. Sa dihang mogamit nianang libroha, ayaw sayloi ang kahon nga “Unsay Imong Hunahuna?” diha sa kataposan sa kapitulo. Dili lang pagsubli sa artikulo ang mga pangutana nga anaa sa maong kahon. Magamit usab kana ingong basehanan sa panaghisgot sa pamilya.

Apan pagbantay nga dili mahulog sa pagsukitsukit ang pagtuon sa pamilya. Pananglitan, ayaw pugsa ang imong anak sa pagbasag kusog sa iyang gisulat diha sa mga panid nga nag-ulohang “Akong Notahanan” o sa bisan unsang bahin sa libro nga nag-awhag sa bata sa pagsulat sa iyang hunahuna. Diha sa “Pahinumdom sa mga Ginikanan” sa panid 3, ang libro nag-ingon: “Aron madasig ang imong mga anak sa pagsulat diha sa ilang libro nga walay lipodlipod, hatagi silag pribasiya. Sa ngadto-ngadto dili na sila magpanuko sa pagpakigsulti kanimo bahin sa ilang gipanulat.”

Kon inyong himoong regular, praktikal, ug makalingaw ang inyong pamilyahanong pagsimba, si Jehova dagayang magapanalangin sa inyong paningkamot. Kining espesyal nga panahon sa pamilya makatabang sa inyong mga minahal sa pagpabiling aktibo ug lig-on sa espirituwal.

[Kahon sa panid 31]

Magmamugnaon

“Sa dihang magtuon uban sa among mga anak nga babaye, kami sa akong bana maghisgot bahin sa materyal nga gamiton sa tigom ug dayon among padrowingon ang among mga anak ug hulagway nga magsumaryo sa maong ulohan. Usahay, among dramahon ang mga esena sa Bibliya o ensayohon ang mga presentasyon nga gamiton sa kanataran. Among himoon ang pagtuon nga makaiikag, positibo, makalingaw, ug haom sa ilang edad.”—J.M., United States.

“Aron matabangan ang anak nga lalaki sa akong ginatun-an sa Bibliya nga makasabot kon giunsa paggamit ang linukot nga basahon panahon sa Bibliya, among giimprenta ang libro ni Isaias human namo kuhaa ang mga numero sa kapitulo ug bersikulo. Among gisumpaysumpay ang mga panid ug gipapilit ang matag tumoy sa usa ka tubo. Dayon gisundog sa bata ang gibuhat ni Jesus sa sinagoga sa Nasaret. Ang asoy sa Lucas 4:16-21 nag-ingon nga “gibuksan [ni Jesus] ang linukot nga basahon [ni Isaias] ug nakaplagan” ang teksto nga iyang gipangita. (Isa. 61:1, 2) Apan, sa dihang gisundog kana sa bata, nalisdan siya sa pagpangita sa Isaias 61 diha sa linukot nga basahon nga walay numero sa kapitulo ug bersikulo. Kay nakadayeg sa kahanas ni Jesus sa paggamit sa linukot nga mga basahon, ang bata miingon: ‘Kahawod gyod ni Jesus no!’”—Y.T., Japan.

[Hulagway sa panid 30]

Ang mga praktis sesyon makatabang sa imong mga anak sa pagsagubang sa pagpit-os sa isigkaingon

[Hulagway sa panid 31]

Paningkamoti nga mahimong makalingaw ang gabii sa Pamilyahanong Pagsimba