Bug-os Ka Bang Nagasunod Kang Kristo?

‘Ingon gayod sa inyong paglakaw karon, magpadayon kamo sa paghimo niini nga mas bug-os pa.’—1 TES. 4:1.

1, 2. (a) Unsang kahibulongang mga butang ang nasaksihan sa mga tawo sa adlaw ni Jesus? (b) Nganong hinungdanon usab ang atong panahon karon?

 NAKAHUNAHUNA ka ba sukad kon unsa ka dakong pribilehiyo nga mabuhi sa dinhi pa si Jesus sa yuta? Tingali naghunahuna ka sa posibilidad nga ayohon ni Jesus ang imong sakit ug sa ingon dili na mag-antos niana. O tingali gusto nimong makita ug madungog si Jesus—nga makakat-on gikan kaniya o makakita kaniya nga naghimog milagro. (Mar. 4:1, 2; Luc. 5:3-9; 9:11) Pagkadako unta nga pribilehiyo nga makakita kang Jesus nga nagbuhat sa maong mga milagro! (Luc. 19:37) Wala nay laing kaliwatan nga nakasaksi nianang mga butanga, ug ang nahimo ni Jesus dinhi sa yuta “pinaagi sa paghalad sa iyang kaugalingon” dili na mahitabo pag-usab.—Heb. 9:26; Juan 14:19.

² Apan, hinungdanon usab ang atong panahon karon. Ngano man? Nagkinabuhi na kita sa gitagna sa Kasulatan nga “panahon sa kataposan” ug “kataposang mga adlaw.” (Dan. 12:1-4, 9; 2 Tim. 3:1) Niining yugtoa, si Satanas gitambog sa yuta. Sa dili madugay, siya pagagaposon ug igatambog “sa kahiladman.” (Pin. 12:7-9, 12; 20:1-3) Niining panahona usab nga atong nabatonan ang dakong pribilehiyo sa pagmantala sa “maayong balita sa gingharian” sa tibuok yuta, nga nagsulti sa mga  tawo bahin sa umaabot nga Paraiso—usa ka buluhaton nga dili na gayod masubli.—Mat. 24:14.

3. Sa wala pa mosaka si Jesus sa langit, unsay gisugo niya sa iyang mga sumusunod, ug unsay nalangkit niana?

³ Sa wala pa mosaka si Jesus sa langit, giingnan niya ang iyang mga sumusunod: “Kamo magadawat ug gahom sa dihang ang balaang espiritu mokunsad kaninyo, ug kamo mahimong akong mga saksi sa Jerusalem ug sa tibuok Judea ug Samaria ug hangtod sa kinalay-ang dapit sa yuta.” (Buh. 1:8) Maglangkit kana ug tibuok-kalibotang buluhaton nga pagpanudlo. Unsay tumong niana? Ang paghimog mga tinun-an—dugang mga sumusunod ni Kristo—sa dili pa moabot ang kataposan. (Mat. 28:19, 20) Unsay kinahanglan natong buhaton aron matuman ang sugo ni Kristo?

4. (a) Unsay gipasiugda sa 2 Pedro 3:11, 12? (b) Unsay kinahanglan natong bantayan?

⁴ Matikdi kining giingon ni apostol Pedro: “Unsang matanga nga mga tawo kamo unya diha sa balaang mga buhat sa panggawi ug mga buhat sa diyosnong pagkamahinalaron, nga nagapaabot ug nagabutang kanunay sa hunahuna sa presensiya sa adlaw ni Jehova!” (2 Ped. 3:11, 12) Ang gipamulong ni Pedro nagpasiugda nga kinahanglan kitang magbantay pag-ayo niining kataposang mga adlaw aron maseguro nga ang atong kinabuhi nasentro kanunay sa mga buhat sa diyosnong pagkamahinalaron. Ang maong mga buhat naglakip sa pagsangyaw sa maayong balita. Busa, makalilipay gayod nga makita ang atong mga igsoon sa tibuok kalibotan nga masibotong nagtuman sa sugo ni Kristo nga isangyaw ang maayong balita! Sa samang higayon, kinahanglang mag-amping kita nga ang adlaw-adlawng pagpit-os gikan sa kalibotan ni Satanas ug sa atong unodnong mga kiling dili makapamenos sa atong kasibot sa pag-alagad sa Diyos. Nan, atong hisgotan kon unsay atong buhaton aron makapadayon kita sa pagsunod kang Kristo.

Dawata ang Hinatag-sa-Diyos nga mga Responsibilidad

5, 6. (a) Unsang komendasyon ang gihatag ni Pablo sa iyang mga isigkamagtutuo sa Jerusalem, ug batok sa unsa nga siya nagpasidaan kanila? (b) Nganong dili nato angayng pakamenoson ang hinatag-sa-Diyos nga mga responsibilidad?

⁵ Sa iyang sulat sa mga Kristohanon sa Jerusalem, gikomendahan ni apostol Pablo ang iyang mga isigkamagtutuo tungod sa ilang matinumanong paglahutay ilalom sa paglutos. Siya miingon: “Hinumdomi kanunay ang kanhing mga adlaw diin, sa nalamdagan na kamo, milahutay kamo sa usa ka dakong sangka bisan pa sa mga pag-antos.” Oo, wala kalimti ni Jehova ang ilang pagkamatinumanon. (Heb. 6:10; 10:32-34) Seguradong nadasig pag-ayo ang Hebreohanong mga Kristohanon sa mainitong komendasyon ni Pablo. Apan, sa mao gihapong sulat, nagpasidaan usab si Pablo batok sa usa ka tawhanong kiling nga kon dili makontrolar, makapamenos sa kasibot sa usa sa pag-alagad sa Diyos. Siya miingon nga ang mga Kristohanon dili angayng “mobalibad” sa pagtuman sa mga sugo sa Diyos.—Heb. 12:25.

⁶ Ang maong pasidaan batok sa kiling nga “mobalibad” sa hinatag-sa-Diyos nga mga responsibilidad mapadapat usab sa mga Kristohanon karon. Kinahanglang magmadeterminado kita nga dili gayod pakamenoson ang atong mga responsibilidad o tugotang mawala ang atong kasibot sa pag-alagad. (Heb. 10:39) Kon buot hunahunaon, ang paghatag ug sagradong pag-alagad nagkahulogag kinabuhi o kamatayon.—1 Tim. 4:16.

7, 8. (a) Unsay motabang kanato nga magmasiboton sa pag-alagad sa Diyos? (b) Kon namenosan na ang atong kasibot, unsay angay natong hinumdoman bahin kang Jehova ug Jesus?

⁷ Unsay motabang kanato sa pagtuman sa atong mga obligasyon sa Diyos inay mobalibad niana? Ang usa ka hinungdanong paagi nga masuklan ang maong kiling mao ang kanunayng pagpamalandong sa kahulogan sa atong pahinungod. Sa pagkatinuod, kita misaad kang Jehova nga atong unahon ang pagbuhat sa iyang kabubut-on, ug buot natong tumanon kana.  (Basaha ang Mateo 16:24.) Busa, usahay kinahanglan natong mamalandong ug suknaon ang atong kaugalingon: ‘Determinado pa ba gihapon ko sa pagtuman sa akong pahinungod sama sa akong gibati niadtong ako nabawtismohan? O namenosan na ba ang akong kasibot sukad niadto?’

⁸ Kon ang matinud-anong pagsusi sa kaugalingon magpadayag nga dili na kaayo kita aktibo sa pag-alagad, maayong hinumdoman ang makapadasig nga mga pulong ni manalagnang Sofonias. Siya miingon: “Hinaot dili mahuyhoy ang imong mga kamot. Si Jehova nga imong Diyos anaa sa imong taliwala. Ingong Usa nga gamhanan, siya magaluwas. Siya magasadya tungod kanimo uban ang pagmaya.” (Sof. 3:16, 17) Kining mga pulonga unang napadapat sa karaang mga Israelinhon nga namalik sa Jerusalem gikan sa pagkabihag sa Babilonya. Apan, mapadapat usab kini sa katawhan sa Diyos karon. Sanglit iya man ni Jehova ang buluhaton, angay natong hinumdoman nga si Jehova ug ang iyang Anak magpaluyo ug magpalig-on kanato sa pagtuman sa hinatag-sa-Diyos nga mga responsibilidad. (Mat. 28:20; Filip. 4:13) Kon maningkamot kita nga magmasiboton diha sa buluhaton sa Diyos, siya magapanalangin ug magatabang kanato nga mouswag sa espirituwal.

Masiboton sa “Pagpangita Pag-una sa Gingharian”

9, 10. Unsang punto ang gipasiugda sa ilustrasyon ni Jesus bahin sa dakong panihapon, ug unsay atong makat-onan niana?

⁹ Samtang mikaon diha sa balay sa usa ka magmamando sa mga Pariseo, si Jesus naghatag ug ilustrasyon bahin sa usa ka dakong panihapon. Diha sa ilustrasyon, iyang gihisgotan ang kahigayonan nga gipaabot ngadto sa lainlaing indibiduwal nga mahimong magmamando sa Gingharian sa mga langit. Giilustrar usab niya kon unsay buot ipasabot sa ‘pagbalibad.’ (Basaha ang Lucas 14:16-21.) Ang mga dinapit diha sa ilustrasyon ni Jesus mibalibad sa maong pagdapit. Ang usa miingon nga kinahanglan niyang tan-awon ang uma nga iyang napalit. Ang lain miingon nga nakapalit siyag mga baka ug gusto niyang susihon kini. Ang lain pa miingon: ‘Dili ko makatambong kay bag-o pa kong naminyo.’ Kini maoy mga pasumangil lamang. Sagad susihon sa usa ang uma o mga hayop sa dili pa niya kini paliton, busa dili dinalian nga susihon niya kini pag-usab. Ug nganong ang pagkabag-ong minyo sa usa makapugong man kaniya sa pagdawat nianang importanteng pagdapit? Bantog ra nga nasuko pag-ayo ang nagdapit kanila!

¹⁰ Kitang tanan adunay makat-onan sa ilustrasyon ni Jesus. Unsa man kana? Dili gayod nato tugotan ang personal nga mga kalihokan, sama nianang gihisgotan sa ilustrasyon ni Jesus, nga mahimong hinungdanon kaayo kanato nga mapadaplin na hinuon ang pag-alagad sa Diyos. Kon unahon sa usa ka Kristohanon ang personal nga mga kalihokan, mag-anam kawala ang iyang kasibot sa ministeryo. (Basaha ang Lucas 8:14.) Aron dili kana mahitabo, magkinabuhi kita sumala sa tambag ni Jesus: “Magpadayon sa pagpangita pag-una sa gingharian ug sa iyang pagkamatarong.” (Mat. 6:33) Makapadasig gayong makita nga ang mga alagad sa Diyos—bata ug tigulang—nagpadapat nianang hinungdanong tambag! Gani, daghan ang nagpasimple sa ilang kinabuhi aron makagugol ug mas daghang panahon sa ministeryo. Ilang nasinati mismo nga ang masibotong pagpangita pag-una sa gingharian maghatag ug tinuod nga kalipay ug dakong katagbawan.

11. Unsang asoy sa Bibliya ang nag-ilustrar sa kahinungdanon sa masiboton ug kinasingkasing nga pag-alagad sa Diyos?

¹¹ Sa pag-ilustrar sa kahinungdanon sa pagkamasiboton sa pag-alagad sa Diyos, matikdi ang usa ka hitabo sa kinabuhi ni Haring Jehoas sa Israel. Kay nabalaka sa mahimong dangatan sa Israel sa kamot sa mga Siryanhon, si Jehoas miadto kang Eliseo nga naghilak. Giingnan siya sa manalagna sa pagtira ug pana patumong sa Sirya, nga magpaila nga ihatag ni Jehova kanila ang kadaogan. Angay gayod unta kining makapadasig sa hari. Dayon giingnan ni Eliseo si Jehoas nga kuhaon ang iyang mga pana ug ibunal kini sa yuta. Gibunal niya kinig katulo. Nasuko si Eliseo kay ang pagbunal sa mga pana sa lima o unom ka beses magpaila unta ug ‘paghampak sa Sirya hangtod matibawas kini.’  Busa si Jehoas makabaton lamag tulo ka dili bug-os nga kadaogan. Tungod sa kakulang niyag kasibot, limitado lang ang iyang kadaogan. (2 Hari 13:14-19) Unsay atong makat-onan sa maong asoy? Si Jehova dagayang magpanalangin kanato kon kita kinasingkasing ug masibotong naghimo sa iyang buluhaton.

12. (a) Unsay motabang kanato nga magmasiboton sa pag-alagad bisan pag nagsagubang ug kalisdanan? (b) Sa unsang paagi nakabenepisyo ka sa pagkapuliki diha sa ministeryo?

¹² Ang mga kalisdanan magsulay sa atong kasibot ug debosyon diha sa pag-alagad sa Diyos. Daghang igsoon ang nagsagubang ug kalisod sa ekonomiya. Ang uban nahigawad tungod kay nalimitehan sa usa ka grabeng balatian ang ilang mahimo diha sa pag-alagad kang Jehova. Bisan pa niana, aduna kitay mahimo aron magpadayon ang atong kasibot ug bug-os nga pagsunod kang Kristo. Palihog tan-awa ang pipila ka sugyot ug mga teksto sa kahong “Unsay Motabang Kanimo sa Pagpadayon sa Pagsunod Kang Kristo?” Susiha kon sa unsang paagi nimo kini mapadapat sa bug-os. Kon himoon nimo kini, makabaton kag daghang kaayohan. Ang pagkapuliki diha sa ministeryo magpalig-on kanato, magpauswag sa kalidad sa atong kinabuhi, ug maghimo kanatong mas malinawon ug malipayon. (1 Cor. 15:58) Dugang pa, ang bug-os-kalag nga pag-alagad sa Diyos motabang kanato sa ‘pagbutang kanunay sa hunahuna sa presensiya sa adlaw ni Jehova.’—2 Ped. 3:12.

Matinud-anong Susiha ang Imong Kahimtang

13. Sa unsang paagi nato matino kon unsay kahulogan alang kanato sa bug-os-kalag nga pag-alagad?

¹³ Apan, maayong hinumdoman nga ang pagkahimong bug-os kalag wala magtumong sa gidak-on sa panahon nga atong gigugol sa ministeryo. Lainlain ang atong sirkumstansiya. Kon ang usa makagugol lamang ug usa o duha ka oras sa kanataran matag bulan tungod sa kahimtang sa iyang panglawas, malipay na kaayo si Jehova niana. (Itandi ang Marcos 12:41-44.) Busa, aron matino kon unsay kahulogan alang kanato sa bug-os-kalag nga pag-alagad, kinahanglang matinud-anon natong susihon ang atong mga katakos ug sirkumstansiya. Ingong mga sumusunod ni Kristo, buot usab natong mabatonan ang iyang panglantaw. (Basaha ang Roma 15:5; 1 Cor. 2:16) Unsay giuna ni Jesus sa iyang kinabuhi? Siya miingon sa panon sa katawhan nga gikan sa Capernaum: “Kinahanglan nga . . . ipahayag ko ang maayong balita  sa gingharian sa Diyos, tungod kay alang niini gipadala ako.” (Luc. 4:43; Juan 18:37) Nga maghunahuna sa kasibot ni Jesus sa ministeryo, susiha ang imong sirkumstansiya kon mapauswag pa nimo ang imong ministeryo.—1 Cor. 11:1.

14. Sa unsang mga paagi nato mapauswag ang atong ministeryo?

¹⁴ Ang pagsusi sa atong sirkumstansiya mahimong magpadayag nga ato pang madugangan ang panahon nga atong gigugol sa ministeryo. (Mat. 9:37, 38) Pananglitan, libolibo sa atong mga batan-on nga bag-o lang migraduwar ang nagpauswag sa ilang ministeryo ug nakatagamtam karon sa kalipay nga nasinati niadtong masibotong nag-alagad ingong mga payunir. Buot ba usab nimong matagamtaman ang maong kalipay? Ang pipila ka igsoon nagsusi sa ilang sirkumstansiya ug nakadesisyon nga mahimo silang mobalhin sa laing dapit diha sa ilang nasod, o bisan sa laing nasod, diin mas dako ang panginahanglan alang sa mga magmamantala sa Gingharian. Ang uban nagtuon ug laing pinulongan aron makatabang sa mga langyaw. Tingali usa ka hagit ang pagpauswag sa atong ministeryo, apan magdala kinig daghang panalangin ug makatabang kita sa mas daghan pa nga “makadangat sa tukmang kahibalo sa kamatuoran.”—1 Tim. 2:3, 4; 2 Cor. 9:6.

Mga Ehemplo sa Bibliya nga Angayng Sundogon

15, 16. Kang kinsang mga ehemplo ang atong masundog diha sa pagkahimong masiboton nga mga sumusunod ni Kristo?

¹⁵ Unsay reaksiyon niadtong nahimong mga apostoles sa dihang gidapit sila ni Kristo nga mahimong iyang sumusunod? Mahitungod kang Mateo, ang asoy nag-ingon: ‘Iyang gibiyaan ang tanan ug misunod kaniya.’ (Luc. 5:27, 28) Bahin kang Pedro ug Andres, nga nangisda, atong mabasa: ‘Dihadiha ilang gibiyaan ang mga pukot ug misunod kaniya.’ Dayon nakita ni Jesus si Santiago ug Juan, nga nagtahi sa ilang mga pukot kauban sa ilang amahan. Unsay ilang reaksiyon sa pagdapit ni Jesus? ‘Dihadiha ilang gibiyaan ang sakayan ug ang ilang amahan ug misunod kaniya.’—Mat. 4:18-22.

¹⁶ Ang laing maayong ehemplo mao si Saulo, kinsa nahimong apostol Pablo. Bisan tuod kanhi usa siya ka pintas nga maglulutos sa mga sumusunod ni Kristo, siya nagbag-o ug nahimong “piniling sudlanan” nga magdala sa ngalan ni Kristo. “Sa walay langan diha sa sinagoga [si Pablo] misugod sa pagwali kang Jesus, nga Siya mao ang Anak sa Diyos.” (Buh. 9:3-22) Ug bisan pag nakaagom siyag daghang kalisdanan ug paglutos, wala gayod mawala ang iyang kasibot.—2 Cor. 11:23-29; 12:15.

17. (a) Unsay imong determinasyon maylabot sa pagsunod kang Kristo? (b) Unsang mga panalangin ang atong matagamtam tungod sa pagbuhat sa kabubut-on ni Jehova sa bug-os natong kasingkasing ug kusog?

¹⁷ Buot gayod natong sundogon ang maayong ehemplo sa maong mga tinun-an ug mosanong dayon ug dili mag-ukon-ukon. (Heb. 6:11, 12) Unsang mga panalangin ang atong matagamtam kon kita padayong maningkamot nga magmasiboton ug bug-os nga magsunod kang Kristo? Atong bation ang tinuod nga kalipay sa pagbuhat sa kabubut-on sa Diyos ug ang katagbawan sa pagdawat ug dugang mga pribilehiyo sa pag-alagad ug responsibilidad sa kongregasyon. (Sal. 40:8; basaha ang 1 Tesalonica 4:1.) Oo, samtang manlimbasog kita sa pagsunod kang Kristo, atong matagamtam ang dagaya ug dumalayong mga panalangin sama sa kalinaw sa hunahuna, kalipay, katagbawan, pag-uyon sa Diyos, ug paglaom nga mabuhi sa walay kataposan.—1 Tim. 4:10.

Nahinumdom Ka Ba?

• Unsang hinungdanong buluhaton ang gihatag kanato, ug unsay angay natong tinamdan niana?

• Unsang tawhanong kiling ang angay natong bantayan, ug ngano?

• Unsang matinud-anong pagsusi sa kaugalingon ang angay natong himoon?

• Unsay motabang kanato sa pagpadayon sa pagsunod kang Kristo?

[Mga Pangutana sa Pagtuon]

[Kahon/Hulagway sa panid 27]

Unsay Motabang Kanimo sa Pagpadayon sa Pagsunod Kang Kristo?

▪ Basaha ang Pulong sa Diyos sa adlaw-adlaw, ug palandonga ang imong gibasa.—Sal. 1:1-3; 1 Tim. 4:15.

▪ Pag-ampo kanunay alang sa tabang ug giya sa espiritu sa Diyos.—Zac. 4:6; Luc. 11:9, 13.

▪ Pakig-uban niadtong adunay tinuod nga kasibot sa ministeryo.—Prov. 13:20; Heb. 10:24, 25.

▪ Ilha ang pagkadinalian sa panahon diin kita nagkinabuhi.—Efe. 5:15, 16.

▪ Hunahunaa ang dili maayong sangpotanan sa ‘pagbalibad.’—Luc. 9:59-62.

▪ Palandonga kanunay ang imong pahinungod ug ang dagayang panalangin nga mabatonan sa pag-alagad kang Jehova ug sa kinasingkasing nga pagsunod kang Kristo.—Sal. 116:12-14; 133:3; Prov. 10:22.