Sundoga ang Ilang Pagtuo

“Tan-awa! Ang Ulipong Babaye ni Jehova!”

SI Maria mitan-aw nga natingala sa dihang may bisita nga misulod sa ilang balay. Ang bisita wala mangutana bahin sa iyang amahan o inahan. Siya miadto didto aron makigkita kaniya! Segurado siya nga ang bisita dili taga-Nasaret. Sa ilang gamay nga lungsod, dali rang mamatikdan ang mga estranyo. Siya mamatikdan dayon bisan asa. Nakigsulti siya kang Maria sa paagi nga bag-o gayod kaniya, nga miingon: “Maayong adlaw, usa nga pinaboran kaayo, si Jehova nagauban kanimo.”—Lucas 1:28.

Sa ingong paagi gipaila kanato sa Bibliya si Maria, nga maoy anak babaye ni Heli, sa lungsod sa Nasaret sa Galilea. Siya gipaila kanato nga samag diha siya sa kinasang-ang bahin sa iyang kinabuhi. Minyoonon siya sa panday nga si Jose, nga dili adunahan apan maunongon. Busa ang kinabuhi ni Maria daw naplano na—usa ka yanong kinabuhi ingong asawa ni Jose ug katimbang niya nga magpamilya. Apan, kalit niyang naatubang ang usa ka bisita nga may gipadayag nga buluhaton alang kaniya gikan sa iyang Diyos, usa ka responsabilidad nga makapausab sa iyang kinabuhi.

Matingala ka tingaling mahibalo nga diyutay ray gipadayag sa Bibliya bahin sa kagikan ug personalidad ni Maria, ug ilabinang wala kini maghisgot bahin sa iyang dagway. Apan makaila gayod kita kaniya sumala sa gibutyag sa Pulong sa Diyos.

Ang daghang pagtulon-an sa naandang mga relihiyon bahin kang Maria dili maoy atong susihon aron atong mailhan siya. Busa dili nato hisgotan ang di-maihap niyang mga larawan ug mga rebulto. Dili usab nato hisgotan ang komplikadong teolohiya ug mga doktrina nga naghatag niining mapaubsanong babaye ug dungganong mga titulo sama sa “Inahan sa Diyos” ug “Hara sa Langit.” Ato hinuong susihon kon unsa gayoy gipadayag sa Bibliya ug niana makabaton kitag bililhong pagsabot bahin sa iyang pagtuo ug kon unsaon nato kana pagsundog.

Pagduaw sa Usa ka Manulonda

Dili usa ka tawo ang mibisita kang Maria. Siya mao ang manulondang si Gabriel. Sa dihang iyang gitawag si Maria ug “usa nga pinaboran kaayo,” siya “nalibog pag-ayo” sa mga pulong sa manulonda ug natingala niadtong talagsaong timbaya. (Lucas 1:29) Siya pinaboran kaayo ni kinsa? Wala siya magdahom nga mahimong pinaboran kaayo taliwala sa mga tawo. Apan ang gisulti sa manulonda mao ang pagpabor o pag-uyon ni Jehova nga Diyos. Kana ang hinungdanon kaniya. Bisan pa niana, wala siya magarbohong nagtuo nga siya pinaboran sa Diyos. Kon naningkamot kitang mauyonan sa Diyos, nga dili mapahitas-ong magtuo nga gipaboran na, makakat-on kitag hinungdanong leksiyon nga bug-os nasabtan sa batan-ong si Maria. Ang Diyos supak sa mga mapahitas-on, apan nahigugma ug nagpaluyo sa mga mapainubsanon.—Santiago 4:6.

Gikinahanglan ni Maria ang maong kamapainubsanon kay ang manulonda nagtanyag kaniyag usa ka talagsaong pribilehiyo. Ang manulonda nag-ingon nga siya manganak ug usa ka lalaki nga mahimong labing hinungdanon nga tawo. Si Gabriel miingon: “Ihatag kaniya ni Jehova nga Diyos ang trono ni David nga iyang amahan, ug magamando siya ingon nga hari sa balay ni Jacob hangtod sa kahangtoran, ug walay pagkatapos ang iyang gingharian.” (Lucas 1:32, 33) Nahibalo gayod si Maria sa gisaad sa Diyos kang David kapig usa ka libo ka tuig kanhi nga ang usa sa iyang mga kaliwat magmando hangtod sa kahangtoran. (2 Samuel 7:12, 13) Busa ang iyang anak mao ang mahimong Mesiyas nga gilaoman sa katawhan sa Diyos latas sa daghang siglo!

 Dugang pa, ang manulonda misulti kaniya nga ang iyang anak “pagatawgon nga Anak sa Labing Hataas.” Sa unsang paagi ang usa ka tawhanong babaye mahimong manganak sa Anak sa Diyos? Unsaon man pagpanganak ni Maria ug anak nga lalaki nga kaslonon pa man siya kang Jose? Kini ang prangkang gipangutana ni Maria: “Unsaon ba pagkahitabo niini, nga wala man ako makigdulog sa usa ka lalaki?” (Lucas 1:34) Matikdi nga wala ikaulaw ni Maria ang pagsulti nga siya usa ka birhen. Siya nagmahal hinuon sa iyang kaputli. Daghang dalaga karon ang andam pa ganing motahan sa ilang pagkababaye o kaputli ug ilang bugalbugalan ang mga naghupot niana. Nausab na gayod ang kalibotan. Apan si Jehova wala mausab. (Malaquias 3:6) Sama sa adlaw ni Maria, gimahal ni Jehova kadtong nagsunod sa Iyang mga sukdanan sa moral.—Hebreohanon 13:4.

Bisan pag si Maria matinumanong alagad sa Diyos, siya dili hingpit. Nan, unsaon niya pagpanganak ug hingpit nga kaliwat, ang Anak sa Diyos. Si Gabriel mipatin-aw: “Pagakunsaran ikaw sa balaang espiritu, ug pagalandongan ikaw sa gahom sa Labing Hataas. Tungod niana usab ang matawo pagatawgong balaan, Anak sa Diyos.” (Lucas 1:35) Ang balaan nagpasabot nga “hinlo,” “putli,” “sagrado.” Normal nga mapanunod sa mga anak ang pagkadili-hingpit sa ilang mga ginikanan. Apan niini nga kahimtang, himoon ni Jehova ang usa ka talagsaong milagro. Iyang ibalhin ang kinabuhi sa iyang Anak gikan sa langit ngadto sa tagoangkan ni Maria ug gamiton ang iyang aktibong puwersa o balaang espiritu sa ‘paglandong’ kang Maria, nga manalipod sa bata nga dili maapektohan sa sala. Mituo ba si Maria sa saad sa manulonda? Unsay iyang tubag?

Tubag ni Maria Kang Gabriel

Ang mga maduhaduhaon sa maong milagro, lakip ang pipila ka teologo sa Kakristiyanohan, dili motuo nga ang usa ka birhen manganak. Bisan pa sa tanan nilang kahibalo, dili nila masabtan ang usa ka yanong kamatuoran. Si Gabriel nag-ingon, “sa Diyos walay gipahayag nga dili mahitabo.” (Lucas 1:37) Gituohan ni Maria ang mga pulong ni Gabriel kay usa man siya ka babaye nga may dakong pagtuo. Apan si Maria dili matuotuohon. Sama ni bisan kinsa nga antigong mangatarongan, si Maria nagkinahanglag ebidensiya ingong pasikaranan sa iyang pagtuo. Andam si Gabriel nga makadugang sa ebidensiya nga iya nang nahibaloan. Iyang gisuginlan siya bahin sa iyang tigulang nang paryenteng si Elisabet, nga dugay nang nasayrang apuli. Pinaagig milagro sa Diyos, siya nanamkon!

Unsay buhaton karon ni Maria? Nahibaloan na niya ang iyang buluhaton ug siya may ebidensiya nga tumanon sa Diyos ang tanang gisulti ni Gabriel. Ayawg hunahunaa nga walay nalangkit nga mga kahadlok o kalisod ang maong pribilehiyo. Sa unang bahin, siya kaslonon na kang Jose. Minyoan pa kaha siya kon masayran ni Jose nga siya mabdos? Sa laing bahin, ang pribilehiyo mismo morag makahahadlok kaayong responsabilidad. Ipanamkon niya ang labing bililhong linalang sa Diyos, ang Iya mismong minahal nga Anak! Kinahanglang atimanon niya ang luoy pa intawong masuso ug panalipdan siya diha sa daotang kalibotan. Pagkabug-at nga responsabilidad!

Gipakita sa Bibliya nga may mga higayon nga bisan mga tawong lig-on ug matinumanon nagpanuko sa pagdawat ug lisod nga mga buluhaton gikan sa Diyos. Si Moises mitutol ug miingon nga dili siya larinong manulti aron mahimong tigpamaba sa  Diyos. (Exodo 4:10) Si Jeremias misupak ug miingon nga siya “usa ka bata lamang,” nga wala pay katakos sa pag-abaga sa gisugo sa Diyos kaniya. (Jeremias 1:6) Ug gilayasan ni Jonas ang iyang buluhaton! (Jonas 1:3) Komosta si Maria?

Lanog kaayo ang iyang yano ug mapainubsanong mga pulong latas sa daghang katuigan. Giingnan niya si Gabriel: “Tan-awa! Ang ulipong babaye ni Jehova! Matuman unta kana kanako sumala sa imong gipahayag.” (Lucas 1:38) Ang usa ka ulipong babaye maoy labing ubos nga sulugoon; ang iyang kinabuhi bug-os nga kontrolado sa iyang agalon ug kanay gibati ni Maria bahin kang Jehova nga iyang Agalon. Nahibalo si Maria nga siya luwas diha sa mga kamot ni Jehova, nga Siya maunongon sa mga maunongon Kaniya, ug panalanginan siya kon tumanon niya ang maong lisod nga buluhaton kutob sa iyang maarangan.—Salmo 18:25.

Usahay, may ipabuhat ang Diyos kanato nga sa atong hunahuna morag lisod ug imposible pa. Apan gipadayag sa iyang Pulong ang daghang katarongan nga mosalig kita kaniya ug itugyan ang atong kinabuhi diha sa iyang mga kamot sama kang Maria. (Proverbio 3:5, 6) Himoon ba nato kana? Kon mao, siya moganti ug mohatag kanato ug mga katarongan nga mas makapalig-on sa atong pagtuo kaniya.

Ang Pagduaw Kang Elisabet

Makahuloganon kaayo ang gipahibalo ni Gabriel kang Maria bahin kang Elisabet. Kinsa pang bayhana ang makasabot sa iyang kahimtang gawas kang Elisabet? Midali pag-adto si Maria sa bukirong dapit sa Juda, nga mibiyahe tingalig tulo o upat ka adlaw. Sa pag-abot niya sa balay ni Elisabet ug Zacarias nga saserdote, si Jehova mihatag kang Maria ug dugang ebidensiya nga mas makapalig-on sa iyang pagtuo. Sa pagkadungog ni Elisabet sa pangomosta ni Maria, nabatyagan dayon niya nga ang bata sa iyang tiyan miulpot sa kalipay. Siya napunog balaang espiritu ug iyang gitawag si Maria nga “inahan sa akong Ginoo.” Gipadayag sa Diyos kang Elisabet nga ang anak ni Maria mahimong iyang Ginoo, ang Mesiyas. Dugang pa, pinaagi sa inspirasyon iyang gidayeg si Maria tungod sa iyang pagtuo ug pagkamasinugtanon, nga miingon: “Malipayon usab siya nga mituo.” (Lucas 1:39-45) Seguradong matuman ang tanang gisaad ni Jehova kang Maria!

Unya si Maria misulti. Ang iyang mga pulong natala sa Lucas 1:46-55. Kini ang kinatas-ang gipamulong ni Maria diha sa Bibliya, ug daghan kinig gipadayag bahin kaniya. Kini nagpakita nga siya mapasalamaton ug mapabilhon samtang iyang gidayeg si Jehova tungod sa paghatag kaniyag pribilehiyo nga mahimong inahan sa Mesiyas. Nagpadayag kini sa iyang lalom nga pagtuo samtang naghisgot siya nga si Jehova magpaubos sa mga mapahitas-on ug gamhanan ug motabang sa mga timawa ug kabos nga matinguhaon sa pag-alagad kaniya. Nagbutyag usab kini sa iyang dakong kahibalo. Sumala sa usa ka banabana, mikutlo siyag kapin sa 20 ka beses gikan sa Hebreohanong Kasulatan!

Tin-aw nga si Maria kanunayng namalandong sa Pulong sa Diyos. Bisan pa niana, siya nagpabiling mapainubsanon pinaagi sa paggamit sa Kasulatan imbes mosulti sa iyang kaugalingon aron ipatin-aw ang iyang kahimtang. Ang anak nga gimabdos pa niadto magpadayag usab sa samang tinamdan, nga moingon: “Ang gitudlo ko dili akoa, kondili iya sa nagpadala kanako.” (Juan 7:16) Maayong mangutana ta: ‘Nagpakita ba kog samang pagtahod ug pagpabili sa Pulong sa Diyos? O gipalabi ko ba ang akong kaugalingong mga ideya ug mga paagi sa pagtudlo?’ Matin-aw ang tubag ni Maria.

Gidangtag mga tulo ka bulan ang pagduaw ni Maria kang Elisabet, mao nga seguradong siya nadasig  ug nakapadasig. (Lucas 1:56) Sila magpahinumdom kanato nga mahinungdanon ang panaghigala. Kon makighigala kita niadtong tinuod nga nahigugma kang Jehova, kita mouswag gayod sa espirituwal ug masuod kaniya. (Proverbio 13:20) Apan, miabot na gayod ang panahon nga mopauli si Maria. Unsay isulti ni Jose dihang iyang masayran nga siya mabdos?

Si Maria ug si Jose

Lagmit wala maghulat si Maria nga mailhan na ang iyang pagmabdos ayha tug-anan si Jose. Una pa niana, mahimong naghunahuna si Maria kon unsa unyay reaksiyon sa ligdong, mahadlokon-sa-Diyos nga tawo sa iyang isulti. Apan iyang gitug-an ang tanang nahitabo kaniya. Lagmit imong mahanduraw nga si Jose nabalisa pag-ayo. Buot niyang motuo sa iyang hinigugma, apan ang iyang gitug-an kaniya wala pa mahitabo sukad. Wala hisgoti sa Bibliya kon unsay misantop sa kaisipan ni Jose o kon giunsa niya pagpangatarongan. Apan kini nagpahayag nga siya mihukom sa pagdiborsiyo kang Maria, kay ang mga kaslonon giisip niadto nga minyo na. Apan, kay dili niya gustong mapakaulawan o masilotan si Maria, mihukom siya sa pagdiborsiyo kaniya sa tago. (Mateo 1:18, 19) Seguradong naguol gayod si Maria sa pagkakita niining buotang lalaki nga nabalisa pag-ayo tungod sa maong kahimtang nga wala pa mahitabo sukad. Apan bisan pag si Maria wala tuohi, siya wala mayugot.

Wala itugot ni Jehova nga ipadayon ni Jose ang giisip niyang kinamaayohang plano nga buhaton. Pinaagi sa damgo, gisultihan siya sa manulonda sa Diyos nga ang pagmabdos ni Maria milagroso gayod. Pagkamakapahupay kadto! Dayon gisunod ni Jose ang giya ni Jehova sama sa gihimo ni Maria sukad sa sinugdan. Iyang giminyoan si Maria, ug nangandam sa pag-abaga sa talagsaong responsabilidad sa pag-atiman sa Anak ni Jehova.—Mateo 1:20-24.

Ang mga minyo ug kadtong nagplanong magminyo angayng makakat-og leksiyon gikan niining batan-ong magtiayon 2,000 ka tuig kanhi. Samtang nakita ni Jose nga gituman sa iyang batan-ong asawa ang mga katungdanan ug buluhaton ingong inahan, siya nalipay gayod nga gigiyahan siya sa manulonda ni Jehova. Tinong nakasabot si Jose nga hinungdanon ang pagsalig kang Jehova sa dihang himoon ang dagkong mga desisyon. (Salmo 37:5; Proverbio 18:13) Sa walay duhaduha siya padayong nagmaampingon ug nagmaluloton sa paghimog mga desisyon isip ulo sa pamilya.

Sa laing bahin, unsay atong ikahinapos bahin sa kaandam ni Maria nga makigminyo kang Jose? Bisag sa sinugdan wala tingali makasabot si Jose sa gisugilon ni Maria, siya nagpailob ug padayong nagsalig kaniya ingong umaabot nga ulo sa pamilya. Kadto usa gayod ka maayong leksiyon alang kaniya ingon man sa Kristohanong kababayen-an karon. Sa kataposan, ang maong mga hitabo lagmit nagtudlo gayod kang Jose ug Maria nga bililhon ang pagkamaminatud-on ug prangkang komunikasyon.

Dayag nga maayo kaayog pundasyon ang kaminyoon niining batan-ong magtiayon. Sila nahigugma kang Jehova nga Diyos labaw sa tanan ug nangandoy nga pahimut-an siya ingong kasaligan ug mabinationg mga ginikanan. Hinuon, makasinati silag dagkong mga panalangin ug mga suliran sa umaabot. Sa dili madugay kinahanglan nilang matutoon si Jesus, nga sa umaabot mahimong labing bantogang tawo nga nailhan sukad sa kalibotan.

[Hulagway sa panid 17]

Gugma sa Diyos ang labing maayong pundasyon sa kaminyoon