Kinsa ang Diyos?

UNSAY imong tubag nianang pangutanaha? Gibati sa daghang tawo nga sila nakaila gayod sa Diyos—nga siya suod nilang higala. Apan ang ubang tawo nag-isip sa Diyos sama sa pag-isip nila sa ilang layong mga paryente. Sila nagtuo nga naglungtad ang Diyos apan kulang ang ilang kahibalo kaniya. Kon ikaw nagtuo sa Diyos, unsay imong tubag sa mga pangutana sa ubos?

1. Ang Diyos ba usa ka persona?

2. Aduna bay ngalan ang Diyos?

3. Si Jesus ba ang Labing Gamhanang Diyos?

4. Ang Diyos ba nagmahal kanako?

5. Giuyonan ba sa Diyos ang tanang relihiyon?

Kon pangutan-on nimo ang ubang mga tawo niini, lagmit lainlain ang ilang tubag. Busa dili ikatingala nga adunay daghang patuotuo ug sayop nga mga ideya bahin sa Diyos.

Nganong Hinungdanon ang Tubag?

Sa dihang nakigsulti si Jesu-Kristo sa usa ka relihiyosang babaye diha sa usa ka atabay, iyang gipasiugda nga kinahanglan gayod kitang mahibalo sa kamatuoran bahin sa Diyos. Kining babayehana nga usa ka Samaritana miila kang Jesus ingong propeta. Apan nalibog siya tungod kay ang iyang relihiyon lahi sa relihiyon ni Jesus. Sa dihang gitug-anan niya si Jesus bahin niini, simple lang ang tubag ni Jesus: “Kamo nagasimba sa wala ninyo mailhi.” (Juan 4:19-22) Busa alang kang Jesus, dili tanang diyosnong mga tawo ang tinuod nga nakaila sa Diyos.

Nagpasabot ba kana nga dili gayod nato  mailhan ang Diyos? Wala. Si Jesus mipadayon sa pagsulti sa babaye: “Ang matuod nga mga magsisimba magasimba sa Amahan uban sa espiritu ug sa kamatuoran, kay, sa pagkatinuod, ang Amahan nagapangita sa mga ingon kanila aron magasimba kaniya.” (Juan 4:23) Ikaw ba usab nagsimba sa Diyos “uban sa espiritu ug sa kamatuoran”?

Hinungdanon kaayo nga imong tinoon ang tubag niana. Ngano? Tungod kay gipasiugda ni Jesus ang kahinungdanon sa pagkuhag tukmang kahibalo sa dihang siya miampo: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Oo, ang imong paglaom sa umaabot nalangkit gayod sa imong pagkahibalo sa kamatuoran bahin sa Diyos!

Posible ba nga mahibaloan ang kamatuoran bahin sa Diyos? Oo, posible gayod! Sa unsang paagi? Si Jesus mitubag: “Ako ang dalan ug ang kamatuoran ug ang kinabuhi. Walay makaadto sa Amahan kon dili pinaagi kanako.” (Juan 14:6) Siya usab miingon: “Kon kinsa ang Amahan, walay usa nga nakaila gawas sa Anak, ug siya nga kaniya buot sa Anak nga ibutyag siya.”—Lucas 10:22.

Busa ang yawi aron mailhan ang Diyos makaplagan diha sa mga pagtulon-an ni Jesu-Kristo, ang Anak sa Diyos. Sa pagkatinuod, si Jesus nagsaad: “Kon tumanon ninyo ang akong pagtulon-an, tinuod gayod nga kamo akong mga tinun-an. Mahibalo kamo sa kamatuoran ug ang kamatuoran maghatag kaninyog kagawasan.”—Juan 8:31, 32, Ang Bag-ong Maayong Balita Biblia.

Nan, unsay tubag ni Jesus sa lima ka pangutana nga gihisgotan sa sinugdanan?

[Hulagway sa panid 4]

Ikaw ba nagsimba sa Diyos nga wala nimo mailhi?