1 Palig-ona ang Imong Pagsalig sa Bibliya

“Ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagpanul-id sa mga butang.”—2 Timoteo 3:16.

UNSAY BABAG? Daghan ang nag-ingon nga ang Bibliya usa lamang ka basahon sa tawhanong kaalam. Ang pipila nagtuo nga dili tukma ang mga rekord niini bahin sa kasaysayan. Ang uban nag-ingon nga ang mga tambag sa Bibliya dili praktikal ug kinaraan na.

UNSAON NIMO PAGBUNTOG ANG BABAG? Kadtong nagkuwestiyon sa pagkakasaligan ug pagkamapuslanon sa Bibliya sagad wala magsusi niana. Mituo lang dayon sila kon unsay gisulti sa uban. Apan ang Bibliya nagpasidaan: “Si bisan kinsa nga walay kasinatian motuo sa tagsatagsa ka pulong, apan ang usa nga maalamon magapalandong sa iyang mga lakang.”—Proverbio 14:15.

Imbes motuo lang dayon sa gisulti sa uban bisag walay basehanan, nganong dili sundogon ang panig-ingnan sa mga Kristohanon sa unang siglo nga nagpuyo sa Berea, nga karon mao ang amihanang Gresya? Wala lamang sila motuo sa gisulti sa uban. Hinunoa, sila sa “adlaw-adlaw maampingong nagasusi sa Kasulatan kon tinuod ba kining mga butanga.” (Buhat 17:11) Atong tagdon sa makadiyot ang duha ka rason kon nganong ikaw bug-os makasalig sa Bibliya ingong inspiradong Pulong sa Diyos.

Tukma ang mga rekord sa Bibliya bahin sa kasaysayan. Latas sa katuigan, ang mga maduhaduhaon padayong nagkuwestiyon sa katukma sa Bibliya maylabot sa ngalan sa mga tawo ug mga lugar nga gihisgotan niini. Apan balikbalik nga napamatud-ang bakak ang ilang mga akusasyon, samtang ang rekord sa Bibliya napamatud-ang kasaligan.

Pananglitan, dihay panahon nga giduhaduhaan sa mga eskolar ang paglungtad sa hari sa Asirya nga si Sargon, nga gihisgotan sa Isaias 20:1. Apan, sa mga tuig sa 1840, nakubkoban sa mga arkeologo ang palasyo sa maong hari. Karon, si Sargon maoy usa sa labing iladong hari sa Asirya.

Ang mga kritiko nag-ingon nga wala maglungtad si Poncio Pilato, ang Romanong gobernador nga nagpapatay kang Jesus. (Mateo 27:1, 22-24) Apan niadtong 1961, nadiskobrehan duol sa siyudad  sa Cesarea sa Israel ang usa ka bato nga gikulitan sa ngalan ug posisyon ni Pilato.

Maylabot sa katukma sa mga kasaysayan nga narekord sa Bibliya, ang Oktubre 25, 1999 nga gula sa U.S.News & World Report nag-ingon: “Sa talagsaong paagi, gipamatud-an sa modernong arkeolohiya ang katukma sa kasaysayan diha sa Daan ug Bag-ong Tugon—nga mitakdo sa mga pangunang bahin sa mga asoy bahin sa mga patriarka sa Israel, sa paggawas sa mga Israelitas gikan sa Ehipto, sa monarkiya ni David, ug sa kahimtang sa kinabuhi sa mga tawo panahon ni Jesus.” Bisan tuod ang pagtuo sa Bibliya wala magdepende sa nadiskobrehan sa mga arkeologo, ang katukma sa mga kasaysayan nga narekord diha niana mao gayod ang imong madahom sa usa ka basahon nga gikan sa Diyos.

Ang praktikal nga kaalam diha sa Bibliya makahatag ug kaayohan sa tanang matang sa tawo. Bisan sa wala pa madiskobrehi ang mga mikrobyo ug ang papel niini sa pagkaylap sa sakit, ang Bibliya naghatag ug mga sugo bahin sa kahinlo nga mapuslanon gihapon hangtod karon. (Levitico 11:32-40; Deuteronomio 23:12, 13) Mas malipayon ang pamilya kon ipadapat sa matag membro niini ang tambag sa Bibliya bahin sa ilang pagpakiglabot sa usag usa. (Efeso 5:28–6:4) Mahimong mas maayong empleyado o mas buotang amo ang usa kon iyang ipadapat ang mga prinsipyo sa Bibliya. (Efeso 4:28; 6:5-9) Ang pagpadapat sa mga prinsipyo sa Bibliya makahatag usab ug mga kaayohan sa emosyon. (Proverbio 14:30; Efeso 4:31, 32; Colosas 3:8-10) Ang maong praktikal nga mga tambag maoy atong madahom gikan sa atong Maglalalang.

UNSAY KAAYOHAN? Ang kaalam nga makaplagan diha sa Bibliya makahimo sa usa ka tawo nga maalamon. (Salmo 19:7) Dugang pa, kon kita mosalig sa Bibliya, kini makatabang kanato nga maugmad ang ikaduhang paagi sa pagbaton ug lig-ong pagtuo nga dili mahimo sa ubang mga basahon.

Alang sa dugang impormasyon, tan-awa ang kapitulo 2, “Ang Bibliya—Usa ka Basahong Gikan sa Diyos,” sa librong Unsay Tinuod nga Gitudlo sa Bibliya? a

[Footnote]