Sulat Gikan sa Rusya

Pagsangyaw sa Hilit Kaayong mga Dapit

ANG gamayng ayroplano nga among gisakyan migikan sa Yakutsk ug inanayng mipataas ibabaw sa Tuymaada Valley. Sa dapit nga among gigikanan adunay daghang lanaw nga nabagtok tungod sa grabeng kabugnaw ug kini lainlaig porma ug gidak-on. Ang among gisakyan milabay sa mga bukid sa Verkhoyanskiy nga naputos ug yelo nga nadan-agan sa sidlak sa adlaw. Human makabiyaheg 990 kilometros, kami mitugpa sa baryo sa Deputatskiy.

Kadto mao ang una nakong pagbiyahe sa Sakha Republic, nga nailhan usab nga Yakutia—usa ka lugar nga mas dako pa kay sa tibuok Kasadpang Uropa. Nindot kaayo ang maong lugar apan dili sayon ang pagpuyo didto tungod kay panahon sa ting-init, ang temperatura moabot ug 40 grado Celsius ug -70 grado Celsius usab kon tingtugnaw. Makita didto ang napreserbar nga dagkong mga mananap nga dugay nang napuo. Bisag pipila na ka tuig ang milabay sukad sa maong biyahe, daw kagahapon lang nga akong nakita ang gagmayng mga lungsod nga gitabonan sa baga kaayong gabon, maingon man ang talagsaong northern lights (aurora borealis), ug ang mga tawong Yakut nga mangayaon ug malahutayon.

Ang baryo sa Deputatskiy dili ra maoy among giadtoan. Kami sa akong kauban miadto sa uban pang mga baryo. Ang una mao ang Khayyr, nga 300 kilometros paamihanan, duol sa Laptev Sea, sa amihanang Siberia. Nganong nangadto kami sa maong mga baryo? Buweno, dihay usa ka Saksi ni Jehova nga nakaadto sa maong mga dapit ug nakakaplag siyag daghang tawo nga gustong mokat-on sa Bibliya. Kami nga taga-Yakutsk nga mga 1,000 kilometros gikan sa maong lugar mao ang kinadul-ang mga Saksi ni Jehova nga makatabang kanila. Gibati namo nga kining mga tawhana nanginahanglan gayod ug tabang.

Sa Deputatskiy, among nakaila ang usa ka tawo nga mobiyahe padulong sa Khayyr, ug iya kaming gitanyagan nga pasakyon sa iyang sakyanan ug mobayad lang kono kamig gamayng kantidad. Sa dihang nakita namo ang iyang sakyanan, medyo nagduhaduha kami tungod kay kini karaan na kaayo nga hinimo panahon pa sa Sobyet. Apan kami misugot na lang sa iyang tanyag ug migikan pagkagabii. Wala kami mahibalo kon unsay among masinatian diha sa dalan.

Ang lingkoranan sa sakyanan sama ka bugnaw sa nagyelong yuta sa maong lugar ug sa among hunahuna di gyod mawala ang kabugnaw niini. Busa mihangyo kami nga ihunong ang sakyanan ug dayon midalidalig pangukay sa among bag aron makakuhag laing sinina nga among ikasapaw. Apan misuhot gihapon ang kabugnaw.

Ang drayber, nga sinati sa maong lugar, alegre ikauban. Dayon kalit siyang nangutana, “Nakakita  na ba mo sa northern lights?” Kay wala pa ko makakita niana, iyang gihunong ang sakyanan ug nanggawas kami. Nakalimtan namo kadiyot ang katugnaw. Ako nahingangha sa nagkidlap-kidlap, lainlaig kolor nga kahayag—usa ka nindot nga talan-awon sa ibabaw nga daw makab-ot ra tungod sa kaduol.

Pagkakaadlawon, ang among sakyanan nalubong sa yelo. Among gitabangan ang drayber sa paghaw-as sa sakyanan. Makadaghang nalubong sa yelo ang among gisakyan samtang nagpadulong kami sa Khayyr. Pagsidlak sa adlaw akong nahibaloan nga miagi diay kami sa mibagtok nga mga suba! Udto na sa dihang miabot kami sa Khayyr, nga 16 ka oras nga biyahe gikan sa Deputatskiy. Nagtuo gyod ko nga masakit ko tungod sa grabeng kabugnaw sa among taas nga biyahe, apan maayo ra ang among pamati pagkasunod buntag. Medyo binhod lang ang mga tudlo sa akong mga tiil, tingali tungod sa grabeng kabugnaw. Maayo na lang kay gihatagan kog haplas sa mga tagadidto para sa akong tiil.

Kasagaran, adtoon namo ang mga tawo sa ilang balay aron sangyawan sa maayong balita. Apan didto sa Khayyr, ang mga tawo maoy miadto kanamo sa dihang nahibaloan nila ang among pag-abot! Sulod sa duha ka semana ug tunga, adlaw-adlaw namong gidumalahag pagtuon sa Bibliya ang mga tawo sugod sa sayong kabuntagon hangtod sa lawom nga kagabhion. Nalipay kaayo kami sa paghimamat sa buotan ug maabiabihong mga tawo didto nga interesado sa Bibliya. Daghang tigulang nga mga babayeng Yakut ang miingon kanamo: “Nagtuo kami nga dunay Diyos. Ang inyong pag-anhi dinhi sa hilit na kaayong dapit nagpamatuod nga aduna gayoy Diyos!”

Nahingangha kami sa pamaagi sa mga tawo didto. Pananglitan, magpondo silag mga bloke sa yelo sa kilid sa ilang balay. Kon manginahanglan silag tubig, magkuha lang silag usa ka bloke ug dayon ibutang kana sa dakong takori ug itak-ang aron matunaw. Giandaman kami sa mga tagadidto ug lamiang stroganina. Kini maoy lab-as nga isdang chir nga gibutangag yelo hangtod nga migahi ug dayon gihiwa ug nipis. Kini ituslo sa asin ug paminta ayha kaonon. Ang mga tawo nalipay usab sa pag-estorya kanamo bahin sa napreserbar nga mga parte sa mananap sama sa bangkil sa mammoth, ug napreserbar nga mga kahoy nga sagad makaplagan sa maong lugar.

Gikan sa Khayyr ako mibiyaheg gatosan ka kilometro, sagad sakay sa ayroplano aron adtoon ang mga interesado sa Bibliya sa ubang mga baryo sa Yakutia. Maabiabihon ug mabination kaayo ang mga tawo didto! Kas-a nakahimamat kog usa ka bata ug iyang nasayran nga nerbiyoson ko sa dihang mosakayg ayroplano. Iya kong gihimoag kard aron palig-onon ko. Iya kanang gidrowingan ug duha ka langgam nga goryon ug usa ka gamayng ayroplano ug gisulatan: “Sasha, kon mosakay kag ayroplano, ayawg kahadlok nga basig mahagsa mo. Mateo 10:29.” Natandog ko pag-ayo sa dihang gibasa nako ang maong teksto! Kana naghisgot sa giingon ni Jesus bahin sa mga goryon: “Walay usa kanila ang mahulog sa yuta nga dili mahibaloan sa inyong Amahan.”

Pipila lang kana sa daghan nakong kasinatian sa Yakutia. Kon maghunahuna ko sa maong bugnaw nga dapit, motungha dayon sa akong panumdoman ang mabination kaayong mga tawo nga nagpuyo sa maong hilit nga mga dapit.

[Mga hulagway sa panid 25]

Ang mga Yakut mabination ug maabiabihon