“Ako si Jehova nga Inyong Diyos Balaan”
Pakigsuod sa Diyos
“Ako si Jehova nga Inyong Diyos Balaan”
“BALAAN, balaan, balaan si Jehova nga Diyos.” (Pinadayag 4:8) Kanang mga pulonga nagpasiugda nga si Jehova ang labing balaan, usa ka hiyas nga naglakip sa kaputli ug kahinlo. Ang Diyos dili gayod makasala. Nagpasabot ba kini nga ang dili-hingpit nga mga tawo dili na makapakigsuod sa labing balaang Diyos? Wala! Atong tagdon ang makapalig-ong mga pulong nga narekord sa Levitico kapitulo 19.
Si Jehova miingon kang Moises: “Sultihi ang tibuok katigoman sa mga anak sa Israel, ug ingna sila, ‘Kamo magmabalaan, tungod kay ako si Jehova nga inyong Diyos balaan.’” (Bersikulo 2) Ang matag Israelitas kinahanglang magmabalaan. Ang pamulong nga “kamo magmabalaan” maoy usa ka sugo, dili usa ka sugyot. Ang Diyos ba nagsugo sa butang nga dili mahimo sa tawo?
Matikdi nga ang paghisgot ni Jehova sa iyang pagkabalaan wala magpasabot nga kinahanglan natong tupngan ang iyang pagkabalaan. Sa laing pagkasulti, wala niya dahoma nga ang iyang dili hingpit nga mga magsisimba sa Israel mahimong sama niya kabalaan. Imposible gayod kana. Walay sama kang Jehova tungod kay siya mao ang “Labing Balaang Usa.” (Proverbio 30:3) Apan, tungod kay si Jehova balaan, gusto niya nga ang iyang dili hingpit nga mga magsisimba magmabalaan kutob sa ilang maarangan. Sa unsang paagi ilang mahimo kana?
Human ihatag ang sugo nga magmabalaan, si Jehova, pinaagi kang Moises, naghatag ug mga lagda nga naglangkit sa tanang bahin sa ilang kinabuhi. Ang maong mga lagda angayng sundon sa mga Israelitas, ug kana naglakip sa mosunod: pagtahod sa mga ginikanan ug sa mga edaran (bersikulo 3, 32); paghatag ug konsiderasyon sa mga bungol, buta, ug mga sinakit (bersikulo 9, 10, 14); pagkamatinud-anon ug pagkadili-mapihigon (bersikulo 11-13, 15, 35, 36); ug paghigugma sa isigkamagsisimba sama sa paghigugma sa kaugalingon. (Bersikulo 18) Kon sundon sa mga Israelitas ang maong mga lagda ug ang uban pang mga sugo, sila ‘mahimong balaan alang sa ilang Diyos.’—Numeros 15:40.
Ang sugo nga magmabalaan nagtabang kanato nga masabtan ang panghunahuna ug mga paagi ni Jehova nga Diyos. Pananglitan, kon gusto natong masuod sa Diyos, kinahanglang himoon nato ang atong maarangan sa pagkinabuhi nga nahiuyon sa iyang mga lagda sa balaang panggawi. (1 Pedro 1:15, 16) Kon atong sundon ang maong mga lagda, atong matagamtam ang kinamaayohang paagi sa pagkinabuhi.—Isaias 48:17.
Ang sugo nga magmabalaan nagpakita usab nga si Jehova may pagsalig sa iyang mga magsisimba. Si Jehova dili mangayo ug labaw sa atong maarangan. (Salmo 103:13, 14) Nahibalo siya nga duna kitay mga katakos sa pag-ugmad sa pagkabalaan tungod kay kita hinimo sumala sa iyang dagway. (Genesis 1:26) Ikaw ba napalihok sa pagkat-on ug dugang kon sa unsang paagi mahimong mas masuod sa balaang Diyos nga si Jehova?
[Hulagway sa panid 9]
Duna kitay mga katakos sa pag-ugmad sa pagkabalaan