Pito ka Sugyot Alang sa Mapuslanong Pagbasa sa Bibliya

“Ang Bibliya dili lang ang labing himalitang libro sa tibuok kasaysayan kondili ang labing himalitang libro kada tuig.”—MAGASIN NGA TIME.

“Usahay mobasa kog Bibliya, apan laay kaayo kining basahon.”—KEITH, ILADONG MUSIKERO SA ENGLAND.

DAGHANG tawo ang dunay Bibliya pero wala kaayo sila makabenepisyo sa ilang pagbasa niini. Apan dunay mga tawo nga nakapahimulos pag-ayo sa ilang pagbasa sa Bibliya. Pananglitan, si Nancy miingon: “Sukad nga nagbasa kog Bibliya ug namalandong niini matag sayo sa buntag, gibati nako nga andam ko sa bisan unsang problema nga motungha nianang adlawa. Kini nga rutina mas nakatabang nako nga mawala ang akong depresyon kay sa ubang paagi nga akong nasulayan sa miaging 35 ka tuig.”

Bisan kon wala ka pa makabasa sa Bibliya, dili ba mainteres ka sa pagkahibalo nga ang uban natabangan niini? Kon tigbasa ka nag Bibliya, gusto ka bang makabenepisyog dugang sa imong pagbasa? Kon mao, sulayi ang pito ka sugyot nga gihisgotan niini nga artikulo.

1 Basaha kini uban ang hustong motibo

◼ Mahimong nagbasa kag Bibliya tungod kay maayo kini nga basahon, o obligado ka sa pagbasa niini, o tingali gusto kag giya sa pagkinabuhi niining gubot nga kalibotan. Apan mas makabenepisyo ka kon ang imong tumong mao ang pagkat-on bahin sa Diyos ug kon unsaon pagpadapat sa mensahe sa Bibliya diha sa imong kinabuhi.

Aron ipakita nga hinungdanon ang hustong motibo sa pagbasa ug Bibliya, ang Kasulatan naghisgot ug ilustrasyon diin ang Bibliya gipakasama sa samin. Kini nag-ingon: ‘Kon ang usa tigpaminaw lamang sa pulong, ug dili usa ka magtutuman, siya sama sa usa ka tawo nga nagtan-aw sa iyang nawong diha sa salamin. Kay siya motan-aw  sa iyang kaugalingon, ug siya molakaw ug dihadiha malimot kon unsang matanga siya nga tawo. Apan siya nga magasud-ong pag-ayo sa hingpit nga balaod nga iya sa kagawasan ug magpadayon diha niana, kini nga tawo, tungod kay siya dili usa ka malimtanong tigpaminaw, kondili usa ka magtutuman sa buluhaton, malipayon siya sa iyang pagbuhat niini.’—Santiago 1:23-25.

Ang tawo nga gihisgotan sa ilustrasyon nanamin apan wala siyay gihimong kausaban sa iyang dagway. Tingali igo lang siyang mitan-aw sa samin ug walay tuyo nga hapsayon ang iyang dagway. Sa susama, wala kaayo kitay kaayohang makuha kon dalidalion natog basa ang Bibliya o dili nato kini ipadapat. Apan kita magmalipayon gayod kon atong basahon ang Bibliya sa tuyo nga mahimong “magtutuman” niini, nga ipahiuyon ang atong hunahuna ug binuhatan sa sukdanan sa Diyos.

2 Pagpilig maayong hubad

◼ Lagmit daghan kag kapiliang hubad sa Bibliya. Tinuod, makabenepisyo ka sa bisan unsang hubad, apan dunay mga hubad nga kinaraan ang mga pulong ug lisod sabton. (Buhat 4:13) Giusab pa gani sa ubang hubad sa Bibliya ang mensahe niini tungod sa tradisyon. Pananglitan, sama sa gihisgotan sa unang mga artikulo niining magasina, gitangtang sa uban ang ngalan sa Diyos nga Jehova ug gipulihan kanag mga titulo sama sa “Diyos” o “Ginoo.” Busa pagpilig hubad sa Bibliya nga tukma ug sayon sabton aron ganahan kang mobasa.

Milyon-milyong tawo sa tibuok kalibotan ganahang mobasa sa mga hubad sa New World Translation a (sa Cebuano, Bag-ong Kalibotang Hubad). Pananglitan, ang usa ka tigulang nga lalaki sa Bulgaria mitambong sa tigom sa mga Saksi ni Jehova ug gihatagag kopya sa New World Translation. Siya miingon, “Dugay na kong nagbasag Bibliya, apan karon pa ko nakabasag hubad nga sayon sabton ug makatandog gayod sa kasingkasing.”

3 Pag-ampo

◼ Mas masabtan nimo ang Bibliya kon mangayo kag tabang sa Awtor niini, sama sa gihimo sa salmista, kinsa miingon: “Bukha ang akong mga mata, aron makatan-aw ako sa katingalahang mga butang gikan sa imong balaod.” (Salmo 119:18) Pag-ampo sa Diyos nga masabtan nimo ang iyang Pulong matag higayon nga imong basahon kini. Mahimo usab nimo siyang pasalamatan tungod sa pagtagana sa Bibliya, kay kon wala kini dili nato siya mailhan.—Salmo 119:62.

Tubagon ba sa Diyos ang maong mga pag-ampo? Tagda kon unsay nahitabo sa duha ka batan-ong magsoong babaye sa Uruguay. Kay wala nila masabti ang giingon sa Daniel 2:44, sila miampo sa Diyos nga unta dunay motabang kanila aron masabtan kini. Wala pa gani nila matiklop ang ilang Bibliya, diha nay duha ka Saksi ni Jehova nga miabot ug mibasa sa teksto nga ilang giampo, ug gipatin-aw kanila nga kini naghisgot bahin sa gobyerno sa tawo nga pulihan sa Gingharian sa Diyos. b Ang magsoon kombinsido nga gitubag sa Diyos ang ilang pag-ampo.

4 Basaha kini adlaw-adlaw

◼ Daghan ang modangop sa Pulong sa Diyos panahon lamang sa mga kalisdanan. Usa ka magpapatik ug basahon miingon nga “midaghan ang namalit ug Bibliya” human moatake sa United States ang mga terorista niadtong Septiyembre 11, 2001. Apan ang Bibliya nagdasig kanato nga basahon kini adlaw-adlaw, nga nag-ingon: “Kining basahon sa balaod kinahanglang dili mahilayo sa imong baba, ug sa hinayng tingog kinahanglang magbasa ka niini adlaw ug gabii, aron ikaw mag-amping sa pagbuhat sumala sa tanang nahisulat niini; kay sa ingon magmalamposon ka sa imong dalan ug sa ingon molihok ka nga maalamon.”—Josue 1:8.

Ang kahinungdanon sa regular nga pagbasa sa Bibliya mahimong itandi sa usa ka tawong nakadesidir  nga mokaog sustansiyadong pagkaon human atakeha sa kasingkasing. Makabenepisyo kaha siya kon himoon lang niya kana sa dihang mohuot na ang iyang dughan? Dili gayod. Kinahanglang regular siyang mokaon ug sustansiyadong pagkaon aron seguradong makabenepisyo siya. Sa susama, ang adlaw-adlaw nga pagbasa sa Bibliya motabang kanimo nga “magmalamposon.”

5 Sulayi ang lainlaing paagi sa pagbasa

◼ Maayong sugdan ang pagbasa sa Bibliya gikan sa Genesis ngadto sa Pinadayag. Apan pwede sab nimong lahion ang imong paagi. Aniay pipila ka sugyot.

Basaha ang asoy bahin sa usa ka karakter. Basaha ang mga kapitulo o basahon sa Bibliya nga naghisgot sa usa ka partikular nga alagad sa Diyos, sama ni:

• Jose: Genesis 37-50.

• Ruth: Ruth 1-3.

• Jesus: Mateo 1-28; Marcos 1-16; Lucas 1-24; Juan 1-21. c

Isentro ang pagtagad sa usa ka ulohan. Basaha ang mga teksto bahin sa ulohan nga imong napili. Pananglitan, paghimog panukiduki bahin sa pag-ampo, dayon basaha ang tambag sa Bibliya bahin niini maingon man ang uban pang pag-ampo nga girekord sa Bibliya. d

Pagbasag kusog. Dako ang benepisyo kon basahog kusog ang Bibliya. (Pinadayag 1:3) Mahimo kining basahon ingong pamilya, nga ang matag membro magpulipulig basa sa mga parapo o kaha asaynan sila sa pagbasa sa gisulti sa lainlaing karakter sa Bibliya. Ang uban ganahang maminaw ug rekording sa Bibliya. Usa ka babaye miingon: “Naglisod ko pagsugod ug basa sa Bibliya mao nga gisulayan nako ang pagpaminaw sa girekord nga pagbasa sa Bibliya. Karon mas ganahan na ko sa Bibliya kay sa nobela.”

6 Pamalandong

◼ Tungod kay puliki ug daghag kabaldahan ang kinabuhi karon, wala na kaayoy panahon alang sa pagpamalandong. Apan, sama ra nga ang pagkaon kinahanglang mahilis aron mahimsog kita, kinahanglan usab natong pamalandongon ang atong mabasa sa Bibliya aron makabenepisyo kita. Mahimo nato kini pinaagi sa paggahin ug panahon nga hunahunaon ang atong nabasa ug sa pagpangutana sa atong kaugalingon: ‘Unsay akong nakat-onan bahin kang Jehova nga Diyos? Sa unsang paagi mapadapat nako kini? Sa unsang paagi magamit nako kini sa pagtabang sa uban?’

Ang pagpamalandong makatabang aron ang mensahe sa Bibliya matisok sa atong kasingkasing ug mas malipay kita nga mobasa sa Pulong sa Diyos. Ang Salmo 119:97 nag-ingon: “Gihigugma ko gayod ang imong balaod! Kini ang akong gipalandong sa tibuok nga adlaw.” Gihunahuna sa salmista ang Pulong sa Diyos sa tibuok adlaw. Tungod niini mas napabilhan niya ang iyang nakat-onan.

7 Pangayog tabang aron masabtan kini

◼ Ang Diyos nahibalo nga dili nato masabtan ang iyang Pulong sa atong kaugalingong paningkamot. Ang Bibliya mismo nag-ingon nga kini naundan ug “pipila ka butang nga lisod sabton.” (2 Pedro 3:16) Ang basahon sa Buhat naghisgot bahin sa Etiopianhong eunuko nga wala makasabot sa iyang gibasa diha sa Bibliya. Gipadala sa Diyos ang usa sa Iyang mga alagad aron sa pagtabang kaniya. Ingong resulta, ang Etiopianhon “nagpadayon sa pagpanaw nga nagmaya.”—Buhat 8:26-39.

Ikaw usab mas makabenepisyo sa imong pagbasa sa Bibliya pinaagi sa pagpangayog tabang nga masabtan ang imong gibasa. Kontaka ang mga Saksi ni Jehova sa inyong lugar, o pagsulat sa adres nga makita sa panid 4 niining magasina alang sa libreng pagtuon sa Bibliya.

[Mga footnote]