ANG BIBLIYA MAKABAG-O SA KINABUHI

“Wala Na Ko Magtinguha nga Bag-ohon ang Kalibotan”

Sumala sa giasoy ni Jukka Sylgren

NATAWO: 1966

NASOD: FINLAND

KANIADTO: AKTIBISTA

KAAGI: Hilig na kog kinaiyahan sukad pa sa pagkabata. Sagad mamasiyo ang akong pamilya sa nindot nga mga lasang ug lanaw duol sa among lungsod sa Jyväskylä, sa Central Finland. Ganahan sab kog hayop. Sa bata pa ko, gusto nakong halogon ang matag iring ug iro nga akong makita! Sa nagdako ko, ako naglagot kay sagad giabusohan sa mga tawo ang mga hayop. Ngadtongadto mianib ko sa usa ka organisasyong nanalipod sa mga hayop, diin nahimamat ko ang mga tawong sama nakog panglantaw.

Nangampanya mi dapig sa katungod sa mga hayop. Nanagtag mig impormasyon ug nag-organisar ug mga demonstrasyon batok sa nanindag produktong gama sa balhibo sa hayop ug sa mga laboratoryong naggamit ug hayop sa ilang eksperimento. Nagporma pa gani mig bag-ong organisasyon nga manalipod sa mga hayop. Kay mihimo mig radikal nga mga paagi aron iduso ang among kawsa, sagad ikasangka namo ang mga polis. Daghang beses kong gidakop ug gikasohan.

Gawas nga nabalaka ko sa mga hayop, may uban pang problema sa kalibotan nga akong gikabalak-an. Unya, mianib ko sa pipila ka organisasyon, apil ang Amnesty International ug Greenpeace. Bug-os kong gisuportahan ang ilang kalihokan. Akong gilabanan ang katungod sa mga kabos, gigutom, ug ubang timawa.

Apan sa inanay nakaamgo kong dili nako mabag-o ang kalibotan. Bisag ang maong mga organisasyon nakapatul-id sa pipila ka gagmayng problema, ang dagkong problema daw nagkagrabe. Morag ang tibuok kalibotan kontrolado sa daotang mga puwersa ug walay nagpakabana. Gibati kong wa koy mahimo.

GIBAG-O SA BIBLIYA ANG AKONG KINABUHI: Nasubo kay way mahimo, ako nakahunahuna sa Diyos ug sa Bibliya. Nag-Bible study ko sa una uban sa mga Saksi ni Jehova. Bisag nakauyon ko sa mga Saksi kay sila maluloton ug matinagdanon  kanako, dili pa ko andam niadto nga magbag-o sa akong kinabuhi. Apan niining higayona, nausab na ang akong panglantaw.

Gikuha ko ang Bibliya ug misugod pagbasa niini. Nakapahupay gayod kini kanako. Daghang teksto sa Bibliya ang nagtudlo kanato nga atimanon ang mga hayop. Pananglitan, ang Proverbio 12:10 nag-ingon nga “ang maayong mga tawo mag-amoma sa ilang mga hayop.” (Good News Translation) Nasabtan sab nako nga dili pagbuot sa Diyos ang mga problema sa kalibotan. Migrabe hinuon ang atong mga problema kay daghan ang wala magsunod sa iyang giya. Natandog ko pag-ayo dihang akong nakat-onan ang gugma ug pagkamapailobon ni Jehova.—Salmo 103:8-14.

Niadtong panahona, nakakita kog kupon nga naghangyo sa librong Unsay Tinuod nga Gitudlo sa Bibliya? ug gipadala kini. Wala madugay usa ka magtiayong Saksi ang miduaw ug mitanyag nakog Bible study, nga akong gidawat. Misugod sab kog tambong sa Kristohanong mga tigom sa Kingdom Hall. Ingong resulta, ang kamatuoran migamot sa akong kasingkasing.

Sa tabang sa Bibliya, nakahimo kog daghang kausaban. Mihunong ko pagpanigarilyo ug sobrang pag-inom. Giusab nako ang akong panagway ug sinultihan. Ug may pagtahod na ko sa sekular nga awtoridad. (Roma 13:1) Gitalikdan na nako ang imoral ug mahilayong pagkinabuhi.

Nalisdan ko pag-ayo sa pag-ugmad ug hustong panglantaw sa mga organisasyong akong gianiban. Kadto dili gyod sayon. Sa primero, naghunahuna ko nga kon moluwat ko sa maong mga organisasyon, sama rag nagluib ko nila. Sa kadugayan, nasabtan nako nga ang Gingharian sa Diyos mao ang bugtong paglaom sa katawhan. Busa bug-os kong gisuportahan ang maong Gingharian ug gitabangan ang uban nga makakat-on bahin niana.—Mateo 6:33.

MGA KAAYOHAN NGA AKONG NABATONAN: Ingong aktibista, pihigon ko ang mga tawo sa duha ka grupo—maayo o daotan—ug andam kong mobatok niadtong giisip kong daotan. Apan tungod sa Bibliya, wala na koy pagdumot sa uban. Hinuon, naningkamot kong maugmad ang Kristohanong gugma alang sa tanan. (Mateo 5:44) Usa ka paagi nga gipakita ko ang gugma mao ang pagsangyaw sa maayong balita sa Gingharian sa Diyos. Nalipay ko kay akong nakita nga kini nga buluhaton nakahatag ug kalinaw, kalipay, ug tinuod nga paglaom sa mga tawo.

Kay gisalig na nako ang tanan kang Jehova, ako may kalinaw na sa hunahuna. Kombinsido ko nga ingong Maglalalang, dili niya itugot nga magpadayon hangtod sa hangtod ang pag-abuso sa mga hayop ug tawo o malaglag ang atong matahom nga yuta. Hinunoa, sa dili na madugay, gamiton niya ang iyang Gingharian aron tul-iron ang tanang kadaot. (Isaias 11:1-9) Nakahatag nakog dakong kalipay dili lang ang pagkahibalo niini nga kamatuoran kondili ang pagpaambit usab niini sa uban. Wala na ko magtinguha nga bag-ohon ang kalibotan.

[Hulagway sa panid 12]

[Hulagway sa panid 12]

[Credit Line]

Animalia

[Hulagway sa panid 13]