Minilyong tawo sa kalibotan ang nagalaom sa Gingharian sa Diyos. Ilang gisundog si Jesus, nga nagtudlo sa iyang mga sumusunod sa pag-ampo: “Moabot na unta ang imong gingharian, matuman ang imong pagbuot dinhi sa yuta.”—Mateo 6:10, Ang Biblia, NCV.

Makapatingala nga daghang tawo ang interesado kaayo sa Gingharian sa Diyos, pero kadaghanang relihiyon ang morag way pagtagad niini. Ang historyanong si H. G. Wells miingon: “Gipasiugda pag-ayo ni Jesus ang pagtulon-an nga gitawag niyag Gingharian sa Langit samtang gibalewala kini sa kadaghanang relihiyong Kristiyano.”

Dili sama sa maong mga relihiyon, importante kaayo sa mga Saksi ni Jehova ang Gingharian sa Diyos. Pananglitan: Kining magasina gipatik sa 220 ka pinulongan. Halos 46 ka milyong kopya sa matag isyu ang ginaimprenta, mao nga kining magasina ang labing kaylap nga napanagtag sa kalibotan. Unsa ang pangunang mensahe sa magasin? Matikdi ang kompletong ulohan niini: Ang Bantayanang Torre Nagapahayag sa Gingharian ni Jehova.  *

Nganong naghago pag-ayo ang mga Saksi ni Jehova sa pagpahibalo, o pag-anunsiyo, sa Gingharian sa Diyos? Kay nagtuo mi nga ang Gingharian sa Diyos mao ang pangunang tema sa labing importanteng libro sa kalibotan—ang Bibliya. Kombinsido sab mi nga ang Gingharian sa Diyos lang ang bugtong solusyon sa mga problema sa tawo.

Gipaningkamotan sa mga Saksi ni Jehova nga masundog si Jesus sa paghatag ug dakong pagtagad sa Gingharian sa Diyos. Sa dinhi pa siya sa yuta, ang Gingharian sa Diyos mao ang labing importante sa iyang kinabuhi ug ministeryo. (Lucas 4:43) Nganong importante kaayo kang Jesus ang Gingharian? Unsay himoon niini alang kanimo? Palihog basaha ang tubag sa Bibliya sa sunod nga mga artikulo.