Makasaysayanhon kaayo ang 2020 rehiyonal nga kombensiyon kay kini ang unang tibuok kalibotang kombensiyon nga girekord ug matan-aw pinaagig Internet! Pero ang kadaghanang igsoon sa Malawi ug Mozambique naka-access sa kombensiyon bisag walay Internet. Sa unsang paagi?

 Ingong eksepsiyon, giaprobahan sa Komite sa mga Koordinetor ug Komite sa Pagpanudlo nga i-broadcast ang kombensiyon sa mga estasyon sa TV ug radyo sa Malawi ug Mozambique. Nganong kinahanglan kini? Ang Malawi usa sa kinamahalan ug Internet data sa tibuok kalibotan, maong pipila ra ka Saksi ang maka-access sa Internet didto. Si William Chumbi, nga membro sa Malawi Branch Committee, miingon: “Ang radyo ug TV mao ra gyoy paagi aron matagan-an ug espirituwal nga pagkaon ang mga igsoon.” Si Luka Sibeko, nga membro pod sa Malawi Branch Committee, miingon sab: “Kon wala pa gi-broadcast sa TV ug radyo ang kombensiyon, gamay ra gyod nga mga igsoon ang makabenepisyo sa kombensiyon.” Sa Mozambique, pipila ra ka igsoon ang makapalit ug gadyet, labaw nag Internet data.

 Tungod sa COVID-19 nga pandemic, naa nay mga estasyon sa TV ug radyo nga nag-broadcast ug mga tigom sa kongregasyon. a Gikontak sa atong mga igsoon ang maong mga estasyon ug mihangyog dugang nga oras aron i-broadcast ang kombensiyon.

 Sa Malawi, ang mga igsoon nag-atubang ug lisod nga kahimtang. Sagad, usa lang ka oras ang itugot sa mga estasyon nga maka-broadcast ang mga kustomer. Ang mga estasyon nabalaka nga ang taas nga programa basin makamenos sa ilang mga audience. Pero gisaysay sa mga igsoon nga ang atong buluhaton maoy alang sa kaayohan sa publiko. Bisan panahon sa lockdown, gusto natong tagan-an ug access ang publiko sa makapahupay nga maayong balita gikan sa Bibliya, nga makatabang sa mga tawo nga mahimong buotan ug makabaton ug malipayong pamilya. Pagkadungog niini, giaprobahan sa mga estasyon ang hangyo sa mga igsoon nga patas-an ang oras sa pag-broadcast.

 Sa Malawi, ang kombensiyon gi-broadcast sa usa ka estasyon sa TV ug usa ka estasyon sa radyo, nga parehong nationwide ug coverage ug posibleng milyonmilyon ang nakabenepisyo sa maong pag-broadcast. Sa Mozambique, ang kombensiyon gi-broadcast sa usa ka estasyon sa TV ug 85 ka estasyon sa radyo.

 Niining duha ka nasod, halos ₱1.5 million ($28,227) b ang naggasto sa pag-broadcast sa kombensiyon diha sa TV ug halos ₱1 million ($20,000) sa pag-broadcast sa radyo. Ang bayad sa pagpa-broadcast sa radyo nagdepende sa coverage sa estasyon. Dunay kapin sa ₱700 ($15) para sa gamayng estasyon ug kapig ₱130,000 ($2,777) para sa nationwide nga estasyon.

 Ang atong mga igsoon naningkamot pag-ayo aron magamit sa kinamaayohang paagi ang mga donasyon. Pananglitan, sa Malawi, nahangyo nila ang mga estasyon nga paubsan ang bayad, ug duna pa gani mihatag nilag 30% discount. Tungod niini nga mga discount, nakadaginot tag mga ₱85,000 ($1,711). Sa Mozambique, ang ubang estasyon mihatag ug discount tungod sa atong maayong reputasyon, sama sa atong pagbayad sumala sa gikauyonang kantidad ug sa hustong panahon.

 Mapasalamaton kaayo ang mga igsoon kay nakita o nadungog nila ang kombensiyon sa lokal nga mga estasyon. Si Patrick, nga ansiyano sa Malawi, miingon: “Mapasalamaton kaayo mi sa Nagamandong Lawas tungod sa ilang espesyal nga konsiderasyon panahon sa pandemic.” Si Isaac, nga taga-Malawi sab, miingon: “Wala mi magamit nga gadyet, maong mapasalamaton kaayo mi sa espesyal nga probisyon sa organisasyon ni Jehova kay nakapaminaw mi sa kombensiyon pinaagig radyo. Tungod ini, nakabenepisyo ang tibuok nakong pamilya sa kombensiyon. Para namo, pamatuod ni sa gugma ni Jehova sa iyang katawhan.”

 Ang 2020 nga kombensiyon mao ang unang kombensiyon nga natambongan sa usa ka magmamantala sa Mozambique. Siya miingon: “Kini nga kahikayan sa pagtan-awg kombensiyon diha sa TV nagpahinumdom nako nga si Jehova mao ang labing gamhanang Diyos. Ang pandemic wala makapugong niya sa paghatag kanamog espirituwal nga pagkaon ug pagtagana niini dinhi mismo sa among balay. Nakita nako ang pamatuod sa gugma taliwala sa mga alagad ni Jehova. Kombinsido ko nga mao ni ang tinuod nga relihiyon.”

 Ang ansiyano nga si Wyson miingon: “Gusto nakong pasalamatan ang matinumanong ulipon sa pag-atiman kanamo panahon sa pandemic. Kini nga probisyon nga makatambong sa kombensiyon diha sa TV ug radyo nakatabang gyod namo nga naglisod sa pinansiyal niining pobre nga nasod. Tungod niini, nakabenepisyo mi sa programa.”

 Para sa 2021 rehiyonal nga kombensiyon, ang Komite sa mga Koordinetor ug Komite sa Pagpanudlo naghimo na sab ug mga kahikayan sa pag-broadcast sa kombensiyon diha sa mga estasyon sa TV ug radyo sa pipila ka lugar. Giunsa nato pagsuportar ang mga galastohan niini nga paagi sa kombensiyon? Pinaagi sa mga donasyon para sa tibuok kalibotang buluhaton. Kadaghanan niini nga mga donasyon gi-donate gamit ang mga paagi nga makita sa donate.mr1310.com. Daghang salamat sa inyong mga donasyon.