Niadtong Oktubre 10, 2022, Lunes sa buntag, gitirahan sa Russia ug mga missile ang mga siyudad sa Ukraine ingong balos sa grabeng pagpamomba duha ka adlaw ang milabay nga nakaguba sa importanteng tulay nga nagkonektar sa Crimea ug Russia. Nahitabo ni di pa dugay human magpasidaan ang ubang politiko nga basin hapit na ang Armagedon.

•   “Sukad kang [U.S. President John F.] Kennedy ug sa Cuban Missile Crisis, wala na ta makaatubang ug situwasyon nga moresultag Armagedon. … Para nako, imposibleng [mogamit] ug nuclear weapon nga dili moresultag Armagedon.”—U.S. President Joe Biden, Oktubre 6, 2022.

•   “Mouyon ko nga moresulta nig Armagedon. Mameligro niini ang tibuok planeta.”—Ukraine President Volodymyr Zelensky, dihang gipangutana siya sa resulta sa paggamit ug mga nuclear weapon, BBC News, Oktubre 8, 2022.

 Ang paggamit bag mga nuclear weapon moresultag Armagedon? Unsay giingon sa Bibliya?

 Dili. Ang pulong “Armagedon” kausa lang makita sa Bibliya, diha sa Pinadayag 16:16. Wala ni magtumong sa gubat tali sa mga nasod. Nagtumong ni sa gubat tali sa Diyos ug “sa mga hari sa tibuok gipuy-ang yuta.” (Pinadayag 16:14) Gamiton sa Diyos ang gubat sa Armagedon aron taposon ang pagmando sa tawo.—Daniel 2:44.

 Aron mahibalog dugang kon unsay mahitabo sa yuta panahon sa Armagedon, basaha ang artikulong Unsa ang Gubat sa Armagedon?

 Dili. Posible tingaling mogamit ang tawhanong mga magmamando ug mga nuclear weapon sa umaabot, pero dili tugotan sa Diyos nga malaglag ang yuta. Ang Bibliya nag-ingon:

•   “Ang yuta magpabilin hangtod sa hangtod.”—Ecclesiastes 1:4.

•   “Ang mga matarong manag-iya sa yuta, ug sila magpuyo niini hangtod sa hangtod.”—Salmo 37:29.

 Pero gipakita sa tagna sa Bibliya ug sa nagakahitabo karon nga sa dili madugay naa unyay dagkong kausaban sa yuta. (Mateo 24:3-7; 2 Timoteo 3:1-5) Sayra kon unsay giingon sa Bibliya bahin sa umaabot pinaagi sa among libreng interactive nga pagtuon sa Bibliya.