Ang mga tawo sa tibuok kalibotan nag-antos sa grabe kaayong kainit ug sa mga kalamidad nga resulta niana. Matikdi ang mosunod nga mga report:

•   “Kini ang kinainitan nga bulan sa Hunyo sulod sa 174 ka tuig nga pagrekord sa temperatura sa tibuok kalibotan.”—National Oceanic and Atmospheric Administration, U.S. Department of Commerce, Hulyo 13, 2023.

•   “Ang Italy, Spain, France, Germany, ug Poland nag-antos sa grabeng heat wave ug ang temperatura gidahom nga mosaka pag 48°C [118°F] sa mga isla sa Sicily ug Sardinia – posibleng kinainitan nga temperatura nga marekord sukad sa Europe.”—European Space Agency, Hulyo 13, 2023.

•   “Samtang magkainit ang planeta, madahom nato nga mas mograbe ug mas kanunay ang pag-ulan, nga moresulta pod ug grabeng mga pagbaha.”—Stefan Uhlenbrook, direktor sa hydrology, tubig, ug cryosphere sa World Meteorological Organization, Hulyo 17, 2023.

 Nabalaka ba ka tungod sa nagkadaghan nga dili maayong report bahin sa klima? Konsideraha kon unsay giingon sa Bibliya bahin niining importanteng topiko.

 Oo. Ang mga heat wave sa tibuok kalibotan ug ang ubang klase sa pagkadaot sa klima mohaom sa mga hitabo nga gitagna sa Bibliya sa atong panahon. Pananglitan, gitagna ni Jesus nga makakita tag “makalilisang nga mga talan-awon,” o “makahahadlok nga mga butang.” (Lucas 21:11; Maayong Balita Biblia) Tungod sa pagtaas sa temperatura sa tibuok kalibotan, daghan ang nahadlok nga bug-os nga madaot sa tawo ang yuta.

 Dili. Gihimo sa Diyos ang yuta ingong atong permanenteng puy-anan; dili niya tugotan nga bug-os kining madaot sa mga tawo. (Salmo 115:16; Ecclesiastes 1:4) Gani, nagsaad siya nga iyang ‘laglagon ang mga nagadaot sa yuta.’—Pinadayag 11:18, footnote.

 Gipakita sa Bibliya nga kaya ug gustong protektahan sa Diyos ang yuta gikan sa kadaot.

•   “Gipalurang [sa Diyos] ang unos; ang mga balod sa dagat milinaw.” (Salmo 107:29) Ang Diyos naay gahom sa pagkontrol sa puwersa sa kinaiyahan. Kaya niyang ayohon ang mga problema nga giantos sa mga tawo karon tungod sa grabeng pagkadaot sa klima.

•   “Giatiman nimo ang yuta, nga gihimo kining mabungahon kaayo ug tabunok kaayo.” (Salmo 65:9) Sa tabang sa Diyos, ang yuta mahimong paraiso.

 Aron mahibalog dugang bahin sa saad sa Bibliya nga maulian ang yuta, tan-awa ang artikulong “Kinsay Makasalbar sa Yuta?”