Nagkadaghan karon ang dili na maayog pamatasan. Singgitan sa walay pagtahod nga mga pasyente ang mga doktor; insultohon sa dili mapasalamatong mga kustomer ang mga waiter; himoag daotan sa init ug ulo nga mga pasahero ang mga flight attendant; bugalbugalan, hulgaon, ug pasakitan sa rebelyosong mga estudyante ang mga titser; ug naay mga politiko nga dili na maulawng mohimog daotan samtang ang uban magpakaaron-ingnong maayog pamatasan.

 Ang Bibliya naghatag ug kasaligang giya kon unsaon pagpakita ang maayong pamatasan. Gihisgotan pod ani kon nganong daghan karon ang wala nay maayong pamatasan.

 Bisan asa sa kalibotan, makita nato nga nagkadaghan na gyod ang walay maayong pamatasan.

•   Sumala sa usa ka survey sa Gallup, ang mga taga-America miingon nga ang moralidad sa mga tawo sa United States mas ubos pa gyod karon kay sa milabayng 22 ka tuig.

•   Sa laing survey sa kapig 32,000 ka tawo diha sa 28 ka nasod, 65 porsiyento ang miingon nga ang kawalay maayong pamatasan karon mas grabe kay sukad masukad.

 Gitagna sa Bibliya ang dili maayong pamatasan sa mga tawo karon.

•   “Sa kataposang mga adlaw moabot ang mga malisod nga panahon. Ang mga tawo maghunahuna lamang sa ilang kaugalingon ug sa kuwarta. Hambugiro sila, mapahitas-on, bugalbugalon, masupilon sa ilang mga ginikanan, dili mapasalamaton . . . . Wala silay kaluoy [ug] bangis.”—2 Timoteo 3:1-3, Maayong Balita Biblia.

 Para sa dugang impormasyon kon sa unsang paagi kini nga tagna natuman, basaha ang artikulo nga “Gitagna ba sa Bibliya ang Panghunahuna ug Binuhatan sa mga Tawo Karon?”

 Niini nga kalibotan nga nagkadaghan na ang walay maayong pamatasan, nakita sa minilyon nga ang Bibliya kasaligan gyod nga giya sa maayong pamatasan. Ang giingon niini bahin sa kon unsay husto ug sayop “kanunay [gyong] kasaligan, karon ug hangtod sa hangtod.” (Salmo 111:8) Niay pipila ka pananglitan:

•   Ang giingon sa Bibliya: “Buhata sa uban ang tanan nga gusto ninyong buhaton nila kaninyo.”—Mateo 7:12.

   Kahulogan: Angay natong trataron ang uban sa buotan ug matinahorong paagi, sama nga mao pod nay gusto nato nga buhaton nila kanato.

•   Ang giingon sa Bibliya: “Karon nga gisalikway na ninyo ang panglimbong, ang matag usa kaninyo magsultig tinuod sa iyang isigkatawo.”—Efeso 4:25.

   Kahulogan: Kinahanglang matinud-anon ta sa tanan natong isulti ug buhaton.

 Para sa dugang impormasyon niini nga topiko, basaha ang:

•   Bantayanang Torre nga nag-ulohang “Husto ug Sayop—Giya nga Imong Masaligan.”

•   Artikulo nga “Pagtahod sa Kalainan sa Matag Tawo—Sa Unsang Paagi Makatabang ang Bibliya?”