Natawo ko sa Ciudad Obregón sa amihanang Mexico, ug ikalima ko sa siyam ka anak. Nagpuyo mi sa utlanan sa siyudad, diin ang akong papa nag-atiman ug gamayng uma. Nindot ang among lugar, ug ang among pamilya nagkahiusa ug malipayon. Ikasubo, dihang singko anyos pa lang ko, nadaot ang among uma sa kusog kaayong bagyo ug kinahanglan ming mobalhin sa laing lungsod.

 Miasenso si Papa. Pero nahimo pod siyang alkoholiko. Nakaapektar ni sa iyang relasyon kang Mama ug kanamong mga anak. Nakakat-on mi sa paggamit ug sigarilyo, nga kinawat namo kang Papa. Pag-edad nakog sayis, nahubog ko sa unang higayon. Wala madugay, nagbulag ang akong ginikanan ug misamot ang akong bisyo.

 Gidala mi ni Mama dihang miipon siyag laing lalaki. Dili niya entregohag kuwarta si Mama, ug dili mi mabuhi sa kinitaan ni Mama. Busa kami sa akong mga igsoon nangitag bisan unsang trabaho nga among mahimo, pero dili gihapon ni makasapar sa among panginahanglan. Naglimpiya bota ko ug namaligyag pan, mantalaan, chewing gum, ug uban pa. Magsuroysuroy sab ko sa siyudad aron mangitag pagkaon sa basurahan sa mga dato.

 Pag-edad nakog 10, gitanyagan kog trabaho sa usa ka tawo diha sa labayanag basura sa siyudad. Gidawat to nako, miundang kog eskuwela, ug mibiya ko sa balay. Wa ray usa ka dolyar ang iyang isuhol nako kada adlaw ug hatagan ko niyag pagkaon nga kinuha sa basurahan. Nagpuyo ko sa barongbarong nga ang materyales gikan ra pod sa basurahan. Ang among silingan himalikas ug imoral. Daghan ang adik ug alkoholiko. Kinalisoran to nga bahin sa akong kinabuhi; maghilak ko kada gabii ug mangurog sa kahadlok. Tungod sa akong kapobre ug kakulag edukasyon, mibati kog kaulaw sa kaugalingon. Tulo ka tuig kong nagpuyo sa labayanag basura, hangtod nga mibalhin ko sa laing estado sa Mexico. Didto, nagtrabaho ko sa uma, nga mangutlog bulak, manguhag gapas, mamutol ug tubo, ug mangalot ug patatas.

 Paglabayg upat ka tuig, mibalik ko sa Ciudad Obregón. Ang akong tiya nga tambalan nagpapuyo nako sa iyang balay. Ngil-ad kaayo ang akong mga damgo ug naguol kaayo ko maong makahunahuna kog hikog. Usa ka gabii niana, miampo ko sa Diyos: “Ginoo, kon tinuod ka, gusto kong makaila nimo ug alagaran ti ka hangtod sa hangtod. Kon naay tinuod nga relihiyon, gusto kong mahibalo ana.”

 Interesado gyod ko nga makakat-on bahin sa Diyos. Bisan sa bata pa ko, daghan kog gisudlang simbahan nga lainlaig sekta, pero nadismayar ko niining tanan. Wala kaayo sila magtudlo bahin sa Bibliya ug wala nila matagbaw ang akong espirituwal nga panginahanglan. Ang pipila kuwarta ray gihunahuna, samtang ang uban imoral ug mga membro.

 Pag-edad nakog 19, usa sa akong mga bayaw nga lalaki miingon nga gipakita kaniya sa mga Saksi ni Jehova ang giingon sa Bibliya bahin sa paggamit ug larawan diha sa pagsimba. Gibasahan ko niya sa Exodo 20:4, 5. Kini nag-ingon nga dili ta angayng maghimog kinulit nga mga larawan. Ang bersikulo 5 nag-ingon: “Ayawg yukbo nila o katental sa pag-alagad nila kay ako, si Jehova nga imong Diyos, maoy Diyos nga nangayog eksklusibong debosyon.” Unya gipangutana ko niya, “Kon naggamit ang Diyos ug larawan sa paghimog mga milagro o kon gusto niya nga gamiton kana sa pagsimba, nganong iya man ning gidili?” Kini nga pangutana nakapahunahuna nako. Human niana, kadaghan mi makahisgot bahin sa Bibliya. Ganahan kaayo ko sa among panag-estorya nga dali rang molabay ang oras.

 Sa ulahi, gidala ko niya sa usa ka tigom sa mga Saksi ni Jehova. Nakadayeg kaayo ko sa akong nakita ug nadungog. Bisan ang mga batan-on dunay bahin sa programa, ug maayo kaayo silang mohatag ug bahin! Nakahunahuna ko, ‘Nindota sa ginatudlo nila dinhi no!’ Bisag taas kog buhok ug naglago lang, mainiton kong giabiabi sa mga Saksi. Giimbitar pa gani kog panihapon sa usa ka pamilya human sa tigom!

 Sa akong pagtuon sa Bibliya uban sa mga Saksi ni Jehova, nakat-onan nako nga si Jehova nga Diyos usa ka mahigugmaong Amahan kinsa nagmahal nato bisag unsa pay atong kahimtang sa kinabuhi, rasa, o edukasyon. Wala gyod siyay pagpihig. (Buhat 10:34, 35) Sa kataposan, natagbaw ra gyod ang akong espirituwal nga panginahanglan. Malipayon na kaayo ko.

 Nausab pag-ayo ang akong kinabuhi! Miundang ko sa pagpanigarilyo, pag-abusog alkoholikong ilimnon, ug pagpamalikas. Ang kayugot nga akong gibati sukad sa akong pagkabata nag-anam ka wala, hasta ang akong ngil-ad nga mga damgo. Dili na ubos ang akong pagtan-aw sa kaugalingon, nga maoy akong pagtuo sa una tungod sa akong giantos sa bata pa ko ug sa akong kakulag edukasyon.

 Naa koy buotang asawa nga nahigugma kang Jehova ug dako kaayog tabang nako. Nag-alagad ko karon ingong nagapanawng tigdumala sa mga Saksi ni Jehova, nga nagduaw ug mga kongregasyon aron sa pagdasig ug pagtudlo sa akong mga igsoon sa pagtuo. Tungod sa makapaalim nga gahom sa Bibliya ug sa maayo kaayong edukasyon nga gihatag sa Diyos, wala na nako ikaulaw ang kaugalingon.