PWATA A LAMOT: A kan múrinnéló ekkewe pisekin túmún ngeni aramas, áwewe chék ren ekkewe camera me intercom fán iten imw, me pokiten a lallapoló solá me atai allúk, iwe chómmóng aramas ra kan áeá ekkena sókkun camera me intercom mi tongeni túmúnúúr seni ekkewe aramas mi ngaw. Ekkewe chón imw ra tongeni kúna me fós ngeni ekkewe chón etto rer nge rese suuki asamer kewe. Neman sia meefi niwokkus atun sia afalafal ngeni chókkana pún ra tongeni kúnakich nge sise tongeni kúner. Iwe, ekkeei kapasen áchem repwe tongeni álisikich le meefi lúkúlúk atun sia afalafal ngeni emén lón camera are intercom.

MINNE KOPWE FÉRI:

• Kopwe eáni ekiek pwúng. Chómmóng chón imw mi wor camera are intercom lón imwer ra tipemecheres le fós ngenikich

• Chemeni pwe ekkóch camera ra tongeni poputá le record mwen óm tikki ewe bell me neman ewe chón imw a fen kakkatol en me aúseling ngonuk atun ka kerán chék tolong lón leenian we are kkan ngeni asaman we

• Ika ewe chón imw a pélúwenuk, iwe kopwe fós ngeni ewe intercom are camera usun nge ka wesewesen fós ngeni ena chón imw. Kopwe emelimel me fós fán kinamwe. Apasawu ewe pwóróus ka fen ammólnatá óm kopwe ereni atun kopwe fós ngeni me ppen asaman na. Ika mi wor néún camera, kosap kon kine ngeni. Ika ewe chón imw ese pélúweni, kosap likiti och pwóróus

• Mwirin ámi fósfengen me ewe chón imw, chemeni pwe neman a chúen kakkatol en are aúseling ngonuk